دست ساقی میں فروزاں تھے سبو رات گئے

 دستِ ساقی میں فروزاں تھے سبُو رات گئے

اور ادھر شیخ تھا مصرُوف وضُو رات گئے

سو گیا تان کے چادر تِرے قدموں میں کوئی

سازشیں کرتے رہے مِل کے عدُو رات گئے

کون اس شہر میں ہمرازِ الم ہے میرا

کون آیا ہے لیے جام و سبُو رات گئے

کس لیے پھر عشرتِ رفتہ کے فسانے چھیڑے

چشمِ تمکیں میں اُتر آیا لہُو رات گئے

ظُلمتِ شب نے چھُپائے ہیں سبھی عیب مِرے

کون دیکھے گا مِرا چاکِ رفُو رات گئے

گڑ گئی زیرِ زمیں چشمِ تمنّا جس دم

تب کہیں چاند چلا کر کے وضُو رات گئے

چشمِ شمشیر تھی خوں بار دمِ صُبحِ نشور

جانے کیا کہتے رہے زخمِ گلُو رات گئے

کون روتا تھا دمِ نزع سرھانے میرے

کون تھا پاس کھڑا مثلِ سبُو رات گئے

نور احمد شیخ