اجالا دشت جنوں میں بڑھانا پڑتا ہے

 اجالا دشت جنوں میں بڑھانا پڑتا ہے

کبھی کبھی ہمیں خیمہ جلانا پڑتا ہے

یہ مسخروں کو وظیفے یوں ہی نہیں ملتے

رئیس خود نہیں ہنستے ہنسانا پڑتا ہے

بڑی عجیب یہ مجبوریاں سماج کی ہیں

منافقوں سے تعلق نبھانا پڑتا ہے

ہر ایک رات کو مہتاب دیکھنے کے لیے

 ہر ایک رات کو مہتاب دیکھنے کے لیے

میں جاگتا ہوں تِرا خواب دیکھنے کے لیے

نہ جانے شہر میں کس کس سے جھوٹ بولوں گا

میں گھر کے پھولوں کو شاداب دیکھنے کے لیے

اسی لیے میں کسی اور کا نہ ہو جاؤں

مجھے وہ دے گیا اک خواب دیکھنے کے لیے

ابھی بچھڑا ہے وہ کچھ روز تو یاد آئے گا

 ابھی بچھڑا ہے وہ کچھ روز تو یاد آئے گا

نقش روشن ہے مگر نقش ہے دُھندلائے گا

گھر سے کس طرح میں نکلوں کہ یہ مدھم سا چراغ

میں نہیں ہوں گا تو تنہائی میں بُجھ جائے گا

اب مِرے بعد کوئی سر بھی نہیں ہو گا طلوع

اب کسی سمت سے پتھر بھی نہیں آئے گا

چلتے چلتے سال کتنے ہو گئے

 چلتے چلتے سال کتنے ہو گئے

پیڑ بھی رَستے کے بوڑھے ہو گئے

چاند کو میں چھُو نہیں پایا، مگر

خواب سب میرے سنہرے ہو گئے

اُنگلیاں مضبوط ہاتھوں سے چھُٹیں

بھیڑ میں بچے اکیلے ہو گئے

جب تک سفید آندھی کے جھونکے چلے نہ تھے

 جب تک سفید آندھی کے جھونکے چلے نہ تھے

اتنے گھنے درختوں سے پتے گرے نہ تھے

اظہار پر تو پہلے بھی پابندیاں نہ تھیں

لیکن بڑوں کے سامنے ہم بولتے نہ تھے

ان کے بھی اپنے خواب تھے اپنی ضرورتیں

ہمسائے کا مگر وہ گلا کاٹتے نہ تھے

موسم گیا گلاب گئے تتلیاں گئیں

کیا کیا نواحِ چشم کی رعنائیاں گئیں

موسم گیا، گلاب گئے، تتلیاں گئیں

جھوٹی سیاہیوں سے ہیں شجرے لکھے ہوئے

اب کے حسب نسب کی بھی سچائیاں گئیں

کس ذہن سے یہ سارے محاذوں پہ جنگ تھی

کیا فتح ہو گیا کہ صف آرائیاں گئیں

کچھ عارضی اجالے بچائے ہوئے ہیں لوگ

کچھ عارضی اجالے بچائے ہوئے ہیں لوگ

مٹھی میں جگنوؤں کو چھپائے ہوئے ہیں لوگ

اس شخص کو تو قتل ہوۓ دیر ہو گئی

اب کس لیے یہ بھیڑ لگائے ہوئے ہیں لوگ

برسوں پرانے درد نہ اٹھکیلیاں کریں

اب تو نئے غموں کے ستائے ہوئے ہیں لوگ

وہ تڑپ جائے اشارہ کوئی ایسا دینا

وہ تڑپ جائے اشارہ کوئی ایسا دینا

اس کو خط لکھنا تو میرا بھی حوالہ دینا

اپنی تصویر بناؤ گے تو ہو گا احساس

کتنا دشوار ہے خود کو کوئی چہرہ دینا

اس قیامت کی جب اس شخص کو آنکھیں دی ہیں

اے خدا! خواب بھی دینا تو سنہرا دینا

خط اس کے اپنے ہاتھ کا آتا نہیں کوئی

خط اس کے اپنے ہاتھ کا آتا نہیں کوئی

کیا حادثہ ہوا ہے؟ بتاتا نہیں کوئی

گڑیا جوان کیا ہوئی میرے پڑوس کی

آنچل میں جگنوؤں کو چھپاتا نہیں کوئی

جب سے بتا دیا ہے نجومی نے میرا نام

اپنی ہتھیلیوں کو دِکھاتا نہیں کوئی

اب جو بادل ہیں دھواں تھے پہلے

اس بلندی پہ کہاں تھے پہلے

اب جو بادل ہیں دھواں تھے پہلے

نقش مٹتے ہیں تو آتا ہے خیال

ریت پر ہم بھی کہاں تھے پہلے

اب ہر اک شخص ہے اعجاز طلب

شہر میں چند مکاں تھے پہلے

گھر تو ہمارا شعلوں کے نرغے میں آ گیا

گھر تو ہمارا شعلوں کے نرغے میں آ گیا

لیکن تمام شہر اجالے میں آ گیا

یہ بھی رہا ہے کوچۂ جاناں میں اپنا رنگ

آہٹ ہوئی تو چاند دریچے میں آ گیا

اب تو محبتوں کا محبت سے دے جواب

میں خود سے ہار کر تِرے خیمے میں آ گیا

اسے بھی اے خدا مشہور کر دے

اذیت اس کی ذہنی دور کر دے

اسے بھی اے خدا مشہور کر دے

اسی میں فتح کا تیری ہے امکاں

مجھے گھر میں مِرے محصور کر دے

یہ چہرے، یہ فریب آلود چہرے

انہیں کوئی نظر سے دور کر دے

جانے آیا تھا کیوں مکان سے میں

جانے آیا تھا کیوں مکان سے میں

کیا خریدوں گا اس دکان سے میں

ہو گیا اپنی ہی انا سے ہلاک

دب گیا اپنی ہی چٹان سے میں

ایک رنگین سی بغاوت پر

کٹ گیا سارے خاندان سے میں

اب یہ معیار شہریاری ہے

اب یہ معیار شہریاری ہے

کون کتنا بڑا مداری ہے

ہم نے روشن چراغ کر تو دیا

اب ہواؤں کی ذمہ داری ہے

صرف باہر نہیں محاذ کھلا

میرے اندر بھی جنگ جاری ہے

اس حادثے کو دیکھ کے آنکھوں میں درد ہے

اس حادثے کو دیکھ کے آنکھوں میں درد ہے

اپنی جبیں پہ اپنے ہی قدموں کی گرد ہے

آ، تھوڑی دیر بیٹھ کے باتیں کریں یہاں

تیرے تو یار! "لہجے" میں اپنا سا درد ہے

کیا ہو گئیں نہ جانے تِری گرم جوشیاں؟

موسم سے آج ہاتھ "سوا" تیرا سرد ہے

اداس اداس طبیعت جو تھی بہلنے لگی

اداس اداس طبیعت جو تھی، بہلنے لگی

ابھی میں رو ہی رہا تھا کہ رُت بدلنے لگی

ذرا تھمے تھے کہ پھر ہو گئے رواں آنسو

جو رک گئی تھی وہ غم کی برات چلنے لگی

ٹھہر گئی ہے کہاں آ کے ڈھلتے ڈھلتے رات

مِری نظر بھی چراغوں کے ساتھ جلنے لگی

میں سمندر تھا مجھے چین سے رہنے نہ دیا

میں سمندر تھا مجھے چین سے رہنے نہ دیا

خامشی سے کبھی دریاؤں نے بہنے نہ دیا

اپنے بچپن میں جسے سن کے میں سو جاتا تھا

میرے بچوں نے وہ قصہ مجھے کہنے نہ دیا

کچھ طبیعت میں تھی آوارہ مزاجی شامل

کچھ بزرگوں نے بھی گھر میں مجھے رہنے نہ دیا