جس وقت خدا کی رحمت سے مدحت کا شعور آ جاتا ہے

 عارفانہ کلام حمد نعت منقبت

جس وقت خُدا کی رحمت سے مِدحت کا شعور آ جاتا ہے

الفاظ چمکنے لگتے ہیں، آواز میں نُور آ جاتا ہے

لاتا ہوں تصوّر میں جس دم، اخلاقِ کریمانہ اس کا

قرآن کے پیکر میں ڈھل کر، وہ جانِ زبور آ جاتا ہے

اک میں ہی نہیں کہتا لوگو، تاریخ گواہی دیتی ہے

اس نام پہ مرنے والوں کو جینے کا سرور آ جاتا ہے

مت سمجھیے کہ پذیرائی بہت ملتی ہے

مت سمجھیے کہ پذیرائی بہت ملتی ہے

سچ کہا جائے تو رُسوائی بہت ملتی ہے

بزمِ احباب میں جانے کا سبب یہ بھی ہے

ایسی تقریب میں تنہائی بہت ملتی ہے

تجھ کو مرہم کی توقع ہے؟ جہاں خلقتِ شہر

رِستے زخموں کی تماشائی بہت ملتی ہے

ہونے کو تو اس شہر میں کیا کیا نہیں ہوتا

 ہونے کو تو اس شہر میں کیا کیا نہیں ہوتا 

حیرت ہے کہ اک شخص ہمارا نہیں ہوتا

دل صورتِ دریا ہے تو دریا کے کنارے

وہ بھی چلا آتا ہے جو پیاسا نہیں ہوتا

ہر شکل شریفانہ تو ہو سکتی ہے لیکن

ہر شخص حقیقت میں فرشتہ نہیں ہوتا

کبھی کبھار ملاقات کا بہانہ بنے

 کبھی کبھار ملاقات کا بہانہ بنے

پھر اس کے بعد بلا سے کوئی فسانہ بنے

عجب نہیں ہے کہ اس بار دو اناؤں کی جنگ

جہان بھر کی تباہی کا شاخسانہ بنے

وہ سب جہان کا ہے سب جہان اس کا ہے

بس ایک میرے لیے اس کے دل میں جا نہ بنے

یہیں سے لوٹ چلو واسطہ خدا کا ہے

 یہیں سے لوٹ چلو واسطہ خدا کا ہے

کہ اب انا کا نہیں مسئلہ بقا کا ہے

تِرے چراغ کا بُجھنا انوکھی بات نہیں

بہت دنوں سے یہی مشغلہ ہوا کا ہے

یہ اور بات کہ چُپ ہیں مروتاً، ورنہ

گِلہ ہمیں بھی سخن ہائے ناسزا کا ہے

خونرنگ خموشی کی گرہ کھولنے والے

خوں رنگ خموشی کی گِرہ کھولنے والے

یاں کاٹ دئیے جاتے ہیں سر بولنے والے

ہر پنجرہ کسی دوسرے پنجرے میں پڑا ہے

اڑ کر بھی کہاں جائیں گے پر تولنے والے

ممکن ہے کسی روز قلم کر دیئے جائیں

یہ ہاتھ کتابوں کے ورق پھولنے والے

رکھنا تھا لڑائی میں اصولوں کا بھرم بھی

رکھنا تھا لڑائی میں اصولوں کا بھرم بھی

گرنے نہ دیا خاک پہ دشمن کا علم بھی

تنہا بھی نظر آؤں تو تنہا نہ سمجھنا

ہوتے ہیں مِرے ساتھ کئی اہلِ عدم بھی

جانا ہے جدھر جس کو چلا جائے خوشی سے

اب سامنے موجود خدا بھی ہے صنم بھی

شام تنہائی قیامت سے کڑی ہے اور میں

شامِ تنہائی قیامت سے کڑی ہے اور میں

ایک برچھی سی کلیجے میں گڑی ہے اور میں

میرے بکھرے ہوئے ٹکڑے تو سمیٹے جائیں

آپ کو جشن منانے کی پڑی ہے اور میں

باعثِ شرم ہے یارو! مِرا دریا ہونا

سامنے خلقِ خدا پیاسی کھڑی ہے اور میں

نظر انداز ہو کر بھی اسی محفل کا حصہ ہوں

نظر انداز ہو کر بھی اسی محفل کا حصہ ہوں

کسی کی آنکھ کا تارا کسی کے دل کا حصہ ہوں

مِری پیوستگی کا امتحاں لیتا ہوا دریا

کسی دن جان جائے گا کہ میں ساحل کا حصہ ہوں

فرشتوں جیسی سیرت کی توقع مجھ سے مت رکھنا

بشر زادہ ہوں اور دنیائے آب و گل کاحصہ ہوں

ملال یہ ہے مسائل کا حل بناتے ہوئے

ملال یہ ہے مسائل کا حل بناتے ہوئے

گنوا کے بیٹھ گئے آج، کل بناتے ہوئے

گھسے پٹے ہوئے لہجوں میں کچھ نہیں رکھا

نیا ہی رنگ نکالو غزل بناتے ہوئے

بظاہر ایک ہی پل میں بدل گیا سب کچھ

کئی زمانے لگے ایک پل بناتے ہوئے

منظر میں کوئی اور تصور میں کوئی اور

منظر میں کوئی اور تصور میں کوئی اور

ہے تال میں دھن اور کوئی سُر میں کوئی اور

چہرے پہ تو کچھ اور ہی تحریر تھا لیکن

تصویر جھلکتی تھی دلِ حر میں کوئی اور

میں حیرتی حسن ازل کیا ہوں مگر سن

مجھ سا بھی نہیں اہلِ تحیر میں کوئی اور

اس تکلم کی ادا پر کوئی کیا بات کرے

اس تکلم کی ادا پر کوئی کیا بات کرے

ہونٹ چپ ہوں تو تِرا رنگِ حنا بات کرے

دیکھ ہم خاک نشینوں سے زمانے کا سلوک

جیسے سوکھے ہوئے پتوں سے ہوا بات کرے

مجھ کو ہر فیصلہ منظور, مگر آخری بار

وہ مِرے سامنے آ کر تو ذرا بات کرے

جو میں سوئے طیبہ چلوں کبھی تو سفر میں ایسا کمال ہو

نعت سرور عالمﷺ 

جو میں سوئے طیبہ چلوں کبھی تو سفر میں ایسا کمال ہو

نہ ستائیں راہ کے پیچ و خم، نہ بدن تھکن سے نڈھال ہو

مِری خاک خشت میں ڈھال کر اسے چن دو روضۂ پاک میں

نہ ہی فاصلوں کا گلہ رہے، نہ جدائیوں کا ملال ہو

تِرا عشق میرا خزانہ ہے، تِرا ذکر مِری کمائی ہے

میں وہ دن نہ دیکھوں خدا کرے کہ مِری طلب زر و مال ہو

اے خدا شکر ہے دنیا کے نکل جانے سے

اے خدا شکر ہے دنیا کے نکل جانے سے

ایک بت کم تو ہوا دل کے صنم خانے سے

میں بہت دیر کہانی میں نہیں رہنے کا

یہ حقیقت بھی نکل جائے گی افسانے سے

کتنے ٹکڑوں میں بٹا شیشۂ جاں دیکھو نا

اک ذرا جسم کی دیوار کو لرزانے سے

انہیں بتاؤ جو کہتے ہیں کیا بچا مرے پاس

انہیں بتاؤ جو کہتے ہیں کیا بچا مِرے پاس

ہر ایک چیز لٹا کر خدا بچا مرے پاس

اٹھانے والے اٹھا لے گئے خزینۂ زر

میں خوش نصیب ہوں رختِ دعا بچا مرے پاس

کئی سماعتیں خائف ہیں اس لیے مجھ سے

سکوتِ شہر میں سنگِ صدا بچا مرے پاس

میں بے صدا نہ جہاں میں کسی طور بھی ہوا

میں بے صدا نہ جہاں میں کسی طور بھی ہوا

کبھی زباں، کبھی زنجیرِ پا کا شور ہوا

نگوں تو خیر کہاں ہو سکا حریفوں سے

ہر اک محاذ پہ میں سر بلند اور ہوا

ہوا خموش تو حسنِ سخن کی داد ملی

میں جل بجھا تو مِری روشنی پہ غور ہوا

ابد کنار اجالوں سے ہیں بھرے ہوئے ہم

ابد کنار اجالوں سے ہیں بھرے ہوئے ہم

ہوا کے رحم و کرم پر نہیں دھرے ہوئے ہم

سناں پہ سج کے بھی سچائی کی گواہی دی

ہزار زندوں پہ بھاری رہے مَرے ہوئے ہم

ہجومِ رنگ پہ شعلہ زنی کا شائبہ تھا

گلاب چھو نہ سکے آگ سے ڈرے ہوئے ہم

خواہ بے ساز و رخت ہیں ہم لوگ

خواہ بے سازورخت ہیں ہم لوگ

والئ تاج و تخت ہیں ہم لوگ

چھاؤں دیتے ہیں، پھل لٹاتے ہیں

چلتے پھرتے درخت ہیں ہم لوگ

چھو گئے تھے کسی کلی سے کہیں

آج تک لخت لخت ہیں ہم لوگ

یہ بد قماش جو اہل عطا بنے ہوئے ہیں

یہ بد قماش جو اہلِ عطا بنے ہوئے ہیں

بشر تو بن نہیں سکتے، خدا بنے ہوئے ہیں

میں جانتا ہوں کچھ ایسے عظیم لوگوں کو

جو ظلم سہہ کے سراپا دعا بنے ہوئے ہیں

وہ مجھ سے ہاتھ چھڑا لے تو کچھ عجب بھی نہیں

اسے خبر ہے کہ حالات کیا بنے ہوئے ہیں

کہاں وہ پیکر نوری کہاں یہ ذرہ خاک

ہدیۂ نعت بحضور سرور کائناتﷺ

کہاں وہ پیکر نوری کہاں یہ ذرۂ خاک

زہے نصیب، کہ ہاتھ آ گیا ہے دامنِ پاک

مقام آپﷺ کا مخلوق پر کھلا ہی نہیں

احاطہ کیسے کرے جن و انس کا ادراک

جبینِ عرش تِرے نقشِ پا کی ہے ممنون

تِرے وجود کا احسان مند عالمِ خاک