میں نے مہکائے ہیں شعلے میں نے دہکائے ہیں پھول

 ابنِ آدم

میں نے مہکائے ہیں شعلے، میں نے دہکائے ہیں پھول

میں نے کاٹے ہیں صنوبر، میں نے چُومے ہیں ببول 

میں نے ڈھالے ہیں عزائم، میں نے توڑے ہیں اصول 

ولولے میرے  پیمبر، ہمہمے میرے رسول 

کون کہتا ہے کہ میں فانی ہوں مشتِ خاک ہوں 

میں زمیں کا فخر ہوں، میں  نازشِ افلاک ہوں

دل کے داغوں میں ستاروں کی چمک باقی ہے

 دل کے داغوں میں ستاروں کی چمک باقی ہے

شبِ فرقت ابھی دو چار پلک باقی ہے

سرخ ہونٹوں کے دیے ذہن میں روشن ہیں ابھی

ابھی افکار میں زلفوں کی مہک باقی ہے

بازوؤں میں تِرے پیکر کی لطافت رقصاں

انگلیوں میں تِری باہوں کی لچک باقی ہے

شاید اس کا نامہ رنگیں اک دن چمکے دست صبا میں

شاید اس کا نامۂ رنگیں اک دن چمکے دستِ صبا میں

شاید کوئی تارا چمکے، فرقت کی گھنگھور گھٹا میں

لاکھ اندھیرے رستہ روکیں، لاکھ بگولے سر ٹکرائیں

آ نکلے ہیں دِیے🪔 جلانے،۔ ہم دیوانے تیز ہوا میں

چاند سے چہرے بجھے بجھے ہیں، قاتل آنکھیں لٹی لٹی ہیں

شہرِ وفا کی خبریں ہم کو مل جاتی ہیں دشتِ وفا میں

یہاں کسی نے چراغ وفا جلایا تھا

یہاں کسی نے چراغِ وفا جلایا تھا 

تبھی یہ غم کدۂ دل بھی جگمگایا تھا

جنوں کی شوخ اداؤں نے فاش کر ہی دیا

وہ ایک راز خِرد نے جسے چھپایا تھا

شبِ بہار کی شہ زادیو! خبر ہے تمہیں

ابھی ابھی کوئی ناشاد مسکرایا تھا

سنگ دشنام کو گوہر جانا

سنگِ دُشنام کو گوہر جانا

ہم نے دشمن کو بھی دلبر جانا

ننگِ الفت ہی رہا پروانہ

اس کو آتا ہے فقط مر جانا

پوچھ لینا در و دیوار کا حال

اے بگولو! جو مِرے گھر جانا

شہریاروں کے غضب سے نہیں ڈرتے یارو

شہریاروں کے غضب سے نہیں ڈرتے یارو

ہم اصولوں کی تجارت نہیں کرتے یارو

خونِ حسرت ہی سہی، خونِ تمنا ہی سہی

ان خرابوں میں کوئ رنگ تو بھرتے یارو

پھر تو ہر خاک نشیں عرشِ بریں پر ہوتا

صرف آہوں سے مقدر جو سنورتے یارو

چمکنے لگا ہے ترا غم بہت

چمکنے لگا ہے تِرا غم بہت

دِیے ہو چلے اب تو مدھم بہت

گھٹاؤں میں طوفاں کے آثار ہیں

تِری زلف ہے آج برہم بہت

یہاں لہلہائے ہیں اشکوں میں باغ

نہ اترائے پھولوں پہ شبنم بہت

مے کشو بادۂ احمر کا چھلکتا ہوا جام

مرگِ آزر (منٹو کی یاد میں)

مے کشو! بادۂ احمر کا چھلکتا ہوا جام

لبِ ساقی کے چناروں کی طرف لوٹ گیا

آہ، وہ انجمِ افتادہ سرِ جادۂ غم

ظلمتیں لے کے ستاروں کی طرف لوٹ گیا

خارزاروں پہ چھڑک کر دلِ سرکش کا لہو

آخرِ کار بہاروں کی طرف لوٹ گیا

وہی محتسب کی ملامتیں وہی ایک وضح حسیں مری

وہی محتسب کی ملامتیں وہی ایک وضحِ حسیں مِری

وہی رنگ رنگ سبُو مِرا، وہی داغ داغ جبیں مِری

تِرا شہر شہرِ عجیب ہے، یہاں کون ہے جو غریب ہے

کوئی کہہ رہا ہے فلک مِرا، کوئی کہہ رہا ہے زمیں مِری

مِری حسرتوں کے دیار میں، تِری جستجو سے بہار ہے

تِرا نقشِ پا ہے جہاں کہیں، ہے جبینِ شوق وہیں مِری

سر وہی سنگ وہی لذت آزار وہی

سر وہی، سنگ وہی، لذتِ آزار وہی

ہم وہی، لوگ وہی، کوچۂ دلدار وہی

اک جہنم سے دھکتا ہُوا، تاحدِ نظر

وقت کی آگ وہی، شعلۂ رفتار وہی

شیشہٴ چشم پہ چھایا ہُوا اک زلف کا عکس

قریہٴ دار وہی، سایۂ دیوار وہی

آس کے رنگیں پتھر کب تک غاروں میں لڑھکاؤ گے

آس کے رنگیں پتھر کب تک غاروں میں لڑھکاؤ گے

شام ڈھلے ان کہساروں میں اپنا کھوج نہ پاؤ گے

جانے پہچانے سے چہرے اپنی سمت بلائیں گے

قدم قدم پر لیکن اپنے سائے سے ٹکراؤ گے

ہر ٹیلے کی اوٹ سے لاکھوں وحشی آنکھیں چمکیں گی

ماضی کی ہر پگڈنڈی پر نیزوں میں گھِر جاؤ گے

دل کے صحرا میں کوئی آس کا جگنو بھی نہیں

دل کے صحرا میں کوئی آس کا جگنو بھی نہیں

اتنا رویا ہوں کہ اب آنکھ میں آنسو بھی نہیں

قصۂ درد لیے پھِرتی ہے گلشن کی ہوا

میرے دامن میں تِرے پیار کی خوشبو بھی نہیں

چھِن گیا میری نگاہوں سے بھی احساسِ جمال

تیری تصویر میں پہلا سا وہ جادو بھی نہیں

سروں پر چرخ زنگاری رہے گا

سروں پر چرخِ زنگاری رہے گا

 میاں! یہ سال بھی بھاری رہے گا

 وہی خُوئے سِتمگاراں رہے گی

 وہی آئینِ خُوں خواری رہے گا

 رہے گا صبر بھی سینوں میں، لیکن

بہ مجبوری، بہ لاچاری رہے گا