تم آئے ہو تمہیں بھی آزما کے دیکھ لیتا ہوں

 تم آئے ہو، تمہیں بھی آزما کے دیکھ لیتا ہوں

تمہارے ساتھ بھی کچھ دور جا کر دیکھ لیتا ہوں

ہوائیں جن کی اندھی کھڑکیوں پر سر پٹکتی ہیں

میں ان کمروں میں پھر شمیں جلا کر دیکھ لیتا ہوں

عجب کیا اس قرینے سے کوئی صورت نکل آئے

تِری باتوں کو خوابوں سے ملا کر دیکھ لیتا ہوں

شام ہوتی ہے تو یاد آتی ہے ساری باتیں

شام ہوتی ہے تو یاد آتی ہے ساری باتیں

وہ دوپہروں کی خموشی وہ ہماری باتیں

آنکھیں کھولوں تو دکھائی نہیں دیتا کوئی

بند کرتا ہوں تو ہو جاتی ہیں جاری باتیں

کبھی اک حرف نکلتا نہیں منہ سے میرے

کبھی اک سانس میں کر جاتا ہوں ساری باتیں

خشک پلکوں پہ بھی نمناک ستارے ہی رہے

 خشک پلکوں پہ بھی نمناک ستارے ہی رہے

ہم ہمیشہ تیری یادوں کے سہارے ہی رہے

تم ہمارے نہ رہے، اور کسی کے ہو کر

ہم کسی اور کے ہو کر بھی تمہارے ہی رہے

ہم تو سمجھے تھے کہ آؤ گے ہماری خاطر

ہم نے گیسو جو سنوارے تھے سنوارے ہی رہے

دل کو یاد شام ہجر پھر اداس کر گئی

دل کو یادِ شامِ ہجر پھر اداس کر گئی

پھر چراغِ وصل سے روشنی اتر گئی

دیکھ اے فسردگی، زندگی عجیب ہے

خواہشِ بہار اگر مر گئی، تو مر گئی

ساری رات ایک خواب دیکھتا رہا ہوں میں

ایک ہی خیال میں زندگی گزر گئی

ترا وجود ہی سب سے بڑی حقیقت ہے

ترا وجود ہی سب سے بڑی حقیقت ہے

تجھے بھلا نہیں سکتا، یہی محبت ہے

گلہ نہیں ہے تری بے تعلقی سے مجھے

میں جانتا ہوں تجھے بھولنے کی عادت ہے

دلِ حزیں کو بڑی دیر میں ہوا معلوم

یہی کہ تیری محبت میری ضرورت ہے

چشم و لب کیسے ہوں رخسار ہوں کیسے تیرے

چشم و لب کیسے ہوں رخسار ہوں کیسے تیرے

ہم خیالوں میں بناتے رہے نقشے تیرے

تیرے ساونت کو سُولی کی زباں چاٹ گئی

جسم ابھی گرم تھا اور بال تھے گیلے تیرے

کیا کہوں کیا تِرے افسردہ دلوں پر گزری

کیسے تاراج ہوئے آئینہ خانے تیرے

یہ کون خواب میں چھو کر چلا گیا مرے لب

یہ کون خواب میں چھُو کر چلا گیا مِرے لب

پکارتا ہوں تو دیتے نہیں صدا مِرے لب

یہ اور بات کسی کے لبوں تلک نہ گئے

مگر قریب سے گزرے ہیں بارہا مِرے لب

اب اس کی شکل بھی مشکل سے یاد آتی ہے

وہ جس کے نام سے ہوتے نہ تھے جدا مِرے لب

کس جھٹپٹے کے رنگ اجالوں میں آ گئے

کس جھٹپٹے کے رنگ اجالوں میں آ گئے

ٹکڑے شفق کے دھوپ سے گالوں میں آ گئے

افسردگی کی لَے بھی تِرے قہقہوں میں تھی

پت جھَڑ کے سُر بہار کے جھالوں میں آ گئے

اڑ کر کہاں کہاں سے پرندوں کے قافلے

نادِیدہ پانیوں کے خیالوں میں آ گئے

روشنی رہتی تھی دل میں زخم جب تک تازہ تھا

روشنی رہتی تھی دل میں زخم جب تک تازہ تھا

اب جہاں دیوار ہے، پہلے وہاں دروازہ تھا

درد کی اک موج ہر خواہش بہا کر لے گئی

کیا ٹھہرتیں بستیاں، پانی ہی بے اندازہ تھا

رات ساری خواب کی گلیوں میں ہم چلتے رہے

کھڑکیاں روشن تھیں، لیکن بند ہر دروازہ تھا

اک پھول میرے پاس تھا اک شمع میرے ساتھ تھی

اک پھول میرے پاس تھا اک شمع میرے ساتھ تھی

باہر خزاں کا زور تھا اندر اندھیری رات تھی

ایسے پریشاں تو نہ تھے ٹوٹے ہوئے سناٹے

جب عشق کی تیرے مِرے غم پر بسر اوقات تھی 

کچھ تم کہو تم نے کہاں کیسے گزارے روز و شب

اپنے نہ ملنے کا سبب تو گردش حالات تھی

یہ کہنا تو نہیں کافی کہ بس پیارے لگے ہم کو

یہ کہنا تو نہیں کافی کہ بس پیارے لگے ہم کو

انہیں کیسے بتائیں ہم کہ وہ کیسے لگے ہم کو

مکیں تھے یا کسی کھوئے ہوئی جنت کی تصویریں

مکاں اس شہر کے بھولے ہوئے سپنے لگے ہم کو

ہم ان کو سوچ میں گم دیکھ کر واپس چلے آئے

وہ اپنے دھیان میں بیٹھے ہوئے اچھے لگے ہم کو

مسلسل یاد آتی ہے چمک چشم غزالاں کی

مسلسل یاد آتی ہے چمک چشمِ غزالاں کی

اکیلی ذات ہے اور رات ہے جنگل بیاباں کی

ذرا دیکھو ہوائے صبح کیسے کھینچ لائی ہے

اکیلی پنکھڑی میں دلکشی سارے گلستاں کی 

انہیں گلیوں میں کھلتے تھے ملاقاتوں کے دروازے

انہیں گلیوں میں چلتی ہیں ہوائیں شامِ ہجراں کی

رات پھر رنگ پہ تھی اس کے بدن کی خوشبو

رات پھر رنگ پہ تھی اس کے بدن کی خوشبو

دل کی دھڑکن تھی کہ اڑتے تھے لہو میں جگنو

جیسے ہر شے ہو کسی خواب فراموش میں گم

چاند چمکا نہ کسی یاد نے بدلا پہلو

صبح کے زینۂ خاموش پہ قدموں کے گلاب

شام کی بند حویلی میں ہنسی کا جادو

بہت رک رک کے چلتی ہے ہوا خالی مکانوں میں

بہت رک رک کے چلتی ہے ہوا خالی مکانوں میں

بجھے ٹکڑے پڑے ہیں سگریٹوں کے راکھ دانوں میں

دھوئیں سے آسماں کا رنگ میلا ہوتا جاتا ہے

ہرے جنگل بدلتے جا رہے ہیں کارخانوں میں

بھلی لگتی ہے آنکھوں کو نئے پھولوں کی رنگت بھی

پرانے زمزمے بھی گونجتے رہتے ہیں کانوں میں

تم آئے ہو تمہیں بھی آزما کر دیکھ لیتا ہوں

تم آئے ہو، تمہیں بھی آزما کر دیکھ لیتا ہوں

تمہارے ساتھ بھی کچھ دور جا کر دیکھ لیتا ہوں

ہوائیں جن کی اندھی کھڑکیوں پر سر پٹکتی ہیں

میں ان کمروں میں پھر شمعیں جلا کر دیکھ لیتا ہوں

عجب کیا اس قرینے سے کوئی صورت نکل آئے

تِری باتوں کو خوابوں سے ملا کر دیکھ لیتا ہوں

ہر لمحہ ظلمتوں کی خدائی کا وقت ہے

ہر لمحہ ظلمتوں کی خدائی کا وقت ہے

شاید کسی کی چہرہ نمائی کا وقت ہے

کہتی ہے ساحلوں سے یہ جاتے سمے کی دھوپ

ہشیار! ندیوں کی چڑھائی کا وقت ہے

ہوتے ہی شام آنکھ سے آنسو رواں ہوئے

یہ وقت قیدیوں کی رہائی کا وقت ہے

لبھاتا ہے اگرچہ حسن دریا ڈر رہا ہوں میں

لبھاتا ہے اگرچہ حسن دریا ڈر رہا ہوں میں

سبب یہ ہے کہ اک مدت کنارے پر رہا ہوں میں

یہ جھونکے جن سے دل میں تازگی آنکھوں میں ٹھنڈک ہے

انہی جھونکوں سے مرجھایا ہوا شب بھر رہا ہوں میں

تِرے آنے کا دن ہے تیرے رستے میں بچھانے کو

چمکتی دھوپ میں سائے اکھٹے کر رہا ہوں میں

رخصت شب کا سماں پہلے کبھی دیکھا نہ تھا

رخصتِ شب کا سماں پہلے کبھی دیکھا نہ تھا

اتنا روشن آسماں پہلے کبھی دیکھا نہ تھا

دور تک پھیلا ہوا صحرا نظر آیا مجھے

ایک ذرہ بھی جہاں پہلے کبھی دیکھا نہ تھا

دیدنی تھا موجِ دریا کا نشاطِ بے پناہ

جلوۂ آبِ رواں پہلے کبھی دیکھا نہ تھا

ہاتھ سے ناپتا ہوں درد کی گہرائی کو

ہاتھ سے ناپتا ہوں درد کی گہرائی کو

یہ نیا کھیل ملا ہے مِری تنہائی کو

تھا جو سینے میں چراغِ دلِ پُرخوں نہ رہا

چاٹیے بیٹھ کے اب صبر و شکیبائی کو

دلِ افسردہ کسی طرح بہلتا ہی نہیں

کیا کریں آپ کی اس حوصلہ افزائی کو

مونس دل کوئی نغمہ کوئی تحریر نہیں

مونسِ دل کوئی نغمہ کوئی تحریر نہیں

حرف میں رس نہیں آواز میں تاثیر نہیں

آ ہی جاتا ہے اجڑتی ہوئی دنیا کا خیال

باور آیا کہ تِرا درد ہمہ گیر نہیں

ہجر اک وقفۂ بیدار ہے دو نیندوں میں

وصل اک خواب ہے جسکی کوئی تعبیر نہیں