ہوئے وقت آخری مہرباں دم اولیں جو خفا ہوئے

 ہوئے وقتِ آخری مہرباں،۔ دمِ اولیں جو خفا ہوئے 

وہ ابد میں آ کے گلے ملے جو ازل میں ہم سے جدا ہوئے

یہ الٰہی کیسا غضب ہوا؟ وہ سمائے مجھ میں تو کیا ہوئے 

مِرا دل بنے تو تڑپ گئے، مرا سر بنے تو جدا ہوئے

گرے ذات میں تو ہے جملہ اوست اٹھے جب صفت میں ہمہ از دست 

کہا کون ہو؟ تو ملے رہے،۔ کہا نام کیا؟ تو جدا ہوئے 

چوری سے دو گھڑی جو نظارے ہوئے تو کیا

 چوری سے دو گھڑی جو نظارے ہوئے تو کیا

چلمن تو بیچ میں ہے اشارے ہوئے تو کیا

بوسہ دہی کا لطف ملا، حُسن بڑھ گیا

رُخسار لال لال تمہارے ہوئے تو کیا

بے پردہ منہ دکھا کے مِرے ہوش اڑاؤ تم

پردے کی آڑ سے جو نظارے ہوئے تو کیا

سمجھ کے حور بڑے ناز سے لگائی چوٹ

 سمجھ کے حور بڑے ناز سے لگائی چوٹ

جو اس نے آئینہ دیکھا تو خود ہی کھائی چوٹ

نظر لڑی جو نظر سے تو دل پر آئی چوٹ 

گرے کلیم سرِ طور ایسی کھائی چوٹ 

بڑے دماغ سے مارا نظر سے جب مارا 

بڑے غرور سے آئی جو دل پر آئی چوٹ 

وہ بت پری ہے نکالیں نہ بال و پر تعویذ

 وہ بت پری ہے نکالیں نہ بال و پر تعویذ

ہیں دونوں بازو پہ اس کے ادھر ادھر تعویذ

وہ ہم نہیں جو ہوں دیوانے ایسے کاموں سے

کسے پلاتے ہو پانی میں گھول کر تعویذ

اٹھے گا پھر نہ کلیجے میں میٹھا میٹھا درد

اگر لکھے مرے دل پر تری نظر تعویذ

محشر میں چلتے چلتے کروں گا ادا نماز

محشر میں چلتے چلتے کروں گا ادا نماز

پڑھ لوں گا پل صراط پہ مائل قضا نماز

سر جائے عمر بھر کی ہو یا رب ادا نماز

آئے مری قضا تو پڑھوں میں قضا نماز

مانگی نجات ہجر سے تو موت آ گئی

روزے گلے پڑے جو چھڑانے گیا نماز

نکلی جو روح ہو گئے اجزائے‌ تن خراب

 نکلی جو روح ہو گئے اجزائے‌ تن خراب

اک شمع بجھ گئی تو ہوئی انجمن خراب

کیوں ڈالتا ہے خاک کہ ہو گا کفن خراب

میں ہوں سفید پوش نہ کر پیرہن خراب

جی میں یہ ہے کہ دل ہی کو سجدے کیا کروں

دیر و حرم میں لوگ ہیں اے جان من خراب

میں ہی مطلوب خود ہوں تو ہے عبث

میں ہی مطلوب خود ہوں تو ہے عبث

آج سے تیری جستجو ہے عبث

سادگی میں ہے لاکھ لاکھ بناؤ

آئینہ تیرے روبرو ہے عبث

مجھ کو دونوں سے کچھ مزا نہ ملا

دل عبث دل کی آرزو ہے عبث

پیار اپنے پہ جو آتا ہے تو کیا کرتے ہیں

 پیار اپنے پہ جو آتا ہے تو کیا کرتے ہیں

آئینہ دیکھ کے منہ چوم لیا کرتے ہیں

وصل کا لطف مجھے وصل سے پہلے ہی ملا

جب کہا یار نے گھبرا کے یہ کیا کرتے ہیں

اس قدر تھا مجھے الفت میں بھروسا ان پر

کی جفا بھی تو یہ سمجھا کہ وفا کرتے ہیں

کیا روز حشر دوں تجھے اے داد گر جواب

 کیا روز حشر دوں تجھے اے داد گر جواب

اعمال نامہ کا تو ہے پیشانی پر جواب

رک رک کے ہنس کے یوں ہی تو دے فتنہ گر جواب

دیتا ہے اور لطف مجھے تیرا ہر جواب

کس سے مثال دوں تری زلف دراز کو

عمر‌ طویل خضر ہے اک مختصر جواب