راہ وفا پہ کم ہیں خسارے ہمارے دوست

راہ وفا پہ کم ہیں خسارے ہمارے دوست

ہیں اس سفر کے اپنے ستارے ہمارے دوست

کچھ سانپ چاہیے تھے خزانے کے واسطے

اتنے میں آستیں سے پکارے ہمارے دوست

اک دن سنبھل ہی جاتا ہے دنیا سے ہارا شخص

لیکن جو اپنے آپ سے ہارے ہمارے دوست

روتا ہوں تو ہنستا ہوں بہت دیدۂ نم پر

 روتا ہوں تو ہنستا ہوں بہت دیدۂ نم پر

یہ کس نے مجھے چھوڑا مِرے رحم و کرم پر

آواز لگاتا ہے یہ مجھ میں کوئی رہرو

چلنا نہ خبردار مِرے نقشِ قدم پر

اس شہر میں قرطاس پہ سچ کس طرح اُترے

تلوار لٹکتی ہو جہاں نوکِ قلم پر

اسی کو دوست رکھا دوسرا بنایا نہیں

 اُسی کو دوست رکھا دوسرا بنایا نہیں

کئی بناتے ہیں میں نے خدا بنایا نہیں

یہ بستی رات کا کس طرح سامنا کرے گی

یہاں کسی نے بھی دن میں دِیا بنایا نہیں

پتہ کرو کہ یہ نقاش کس قبیل کا ہے

پرندہ جب بھی بنایا، رِہا بنایا نہیں

ہجر کا حل نہیں اس ہجر میں خود حل ہو جا

 ہجر کا حل نہیں اس ہجر میں خود حل ہو جا

مجھ سے دانائی مِری کہتی ہے؛ پاگل ہو جا

رنگ جتنے بھی مِرے پاس تھے سب بھر دئیے ہیں

اب تو اے یار کی تصویر! مکمل ہو جا

قطرۂ اشک سہی، کام لے دریا دلی سے

اُٹھ کے پلکوں سے مِرے شہر پہ بادل ہو جا

ستم کے راج میں میں پا شکستہ کیا کرتا

 ستم کے راج میں میں پا شکستہ کیا کرتا

کھڑا نہ رہتا اگر دست بستہ، کیا کرتا

حدِ نگاہ تلک دوسرا نہیں مسکن

جو میرے گھر بھی نہ آتا تو رستہ کیا کرتا

خرید لیتا کسی شاہ کا جلال مجھے

اب اپنے آپ کو اتنا بھی سستا کیا کرتا

خلقت شہر میں اپنوں کا ستایا ہوا شخص

 خلقتِ شہر میں اپنوں کا ستایا ہوا شخص

مر ہی جائے گا کسی کرب میں آیا ہوا شخض

اپنے ہاتھوں سے کسی قبر میں رکھ آؤں گا

اپنے کاندھے پہ کوئی خود سا اُٹھایا ہوا شخص

اتنے صدمات میں زندہ ہے تو اک معجزہ ہے

وقت کے ہاتھ سے برسوں کا مٹایا ہوا شخص

خود سے بھی اجنبی سا لگتا ہے

 خود سے بھی اجنبی سا لگتا ہے

مجھ کو جو زندگی سا لگتا ہے

ہر کسی بار درد دیتا ہے

وقت بھی آدمی سا لگتا

تُو بدل کر کبھی کبھی مجھ کو

اپنا جیسا کسی سا لگتا ہے

مرے دکھ درد ہر اک آنکھ سے اوجھل پڑے تھے

 مِرے دکھ درد ہر اک آنکھ سے اوجھل پڑے تھے

شکر صد شکر کہ بس روح پہ ہی بل پڑے تھے

کسی مقصد سے تِرے پاس نہیں آئے ہیں

کہیں جانا ہی تھا سو تیری طرف چل پڑے تھے

ایک میں ہی نہیں شب چھت پہ بسر کرتا تھا

چاند کے پیچھے کئی اور بھی پاگل پڑے تھے

اس نے چھوڑا ہے کچھ ایسے کہ کمی رہتی ہے

 اس نے چھوڑا ہے کچھ ایسے کہ کمی رہتی ہے

اس لیے روز یہ آنکھوں میں نمی رہتی ہے

دھوپ کی ساری تمازت کا اثر کوئی نہیں

دل کے موسم میں فقط برف جمی رہتی ہے

منزلوں پہ ہے نئی راہ، نیا اذنِ سفر

ہر کسی سانس پہ ہجرت کی ٹھنی رہتی ہے

ایک ہی دشت ہے یہ بھی نہ کھنگالا میں نے

 ایک ہی دشت ہے یہ بھی نہ کھنگالا میں نے

دل پہ لینا نہیں تھا پاؤں کا چھالا میں نے

گھر کے ڈھ جانے میں غفلت مِری شامل تھی مگر

سارا ملبہ در و دیوار پہ ڈالا میں نے

کاش میں اپنے عزاداروں کو بتلا سکتا

کیسا دکھ تھا وہ جسے موت سے ٹالا میں نے

ترا کرم کہ میں جب مات تک پہنچ جاتا

تِرا کرم کہ میں جب مات تک پہنچ جاتا

تو کوئی ہاتھ مِرے ہاتھ تک پہنچ جاتا

میں اس کی بزم میں چپ چاپ ہی رہا کرتا

مگر وہ پھر بھی مِری بات تک پہنچ جاتا

میں بھاؤ تاؤ اگر کرتا تو وہ خواب فروش

قیاس ہے مِری اوقات تک پہنچ جاتا

میری بڑھا کے اور بھی الجھن چلا گیا

میری بڑھا کے اور بھی الجھن چلا گیا

آنکھیں برستی چھوڑ کے ساون چلا گیا

گلّک میں پیسے پورے کھلونے کے ہیں مگر

مشکل یہ آ پڑی ہے،۔۔ کہ بچپن چلا گیا

دنیا کمانے کا ہوا درویش کو خیال

پھر کیا تھا پَل میں ہاتھ سے ہر فن چلا گیا

اندھیرے منہ ترا کالا ضرور ہوتا ہے

اندھیرے! منہ تِرا کالا ضرور ہوتا ہے

کہ شب کے بعد اجالا ضرور ہوتا ہے

یہاں اب اس لیے بھی بیڑیاں نہیں پڑتیں

کہ ہر زبان پہ تالا ضرور ہوتا ہے

کچھ اور ہو نہ ہو صحرا کی خاک چھاننے سے

جنوں کا لطف دوبالا ضرور ہوتا ہے

وقت کے ہاتھ سے گزرے ہوئے لمحوں کی طرح

وقت کے ہاتھ سے گزرے ہوئے لمحوں کی طرح

بھول جاؤ گے مجھے تم بھی تو لوگوں کی طرح

راہ میں، ہر کسی پتھر کو نہ ٹھوکر پہ رکھو

کچھ پڑے سنگ بھی ہوتے ہیں نگینوں کی طرح

جسم ہلکان ہو زخموں سے تو ایسا بھی نہیں

خون بہہ سکتا ہے آنکھوں سے بھی اشکوں کی طرح

آ گئے اب تو ہر اک در پہ ہی دہشت والے

آ گئے اب تو ہر اک در پہ ہی دہشت والے

مر گئے لوگ تو اس شہر کی حرمت والے

وہ جو ہجرت تھی کہانی میں لہو سے منسوب

کیا وہی لوگ وطن سے تھے محبت والے

اب ہے جذبوں میں تجارت بھی ملاوٹ کی طرح

رہ گئے اب تو سبھی رشتے ضرورت والے

یہاں پہ بادشاہت ہے یہاں محکوم رہنا ہے

یہاں پہ بادشاہت ہے، یہاں محکوم رہنا ہے

ابھی ساری بہاروں کو خیالوں کو سوالوں میں

یہاں جمہور کے قصے رہیں گے چند حوالوں تک

ذہن رہ جائیں گے قیدی غلامی کے نصابوں میں

اگر یہ روشنی آزادی ‎اظہار ہی گم ہے

سبق کس کا دیا جاتا ہے بچوں کو کتابوں میں

دیکھے نہ فقیری کو کوئی شک سے ہماری

دیکھے نہ فقیری کو کوئی شک سے ہماری

دیوار میں در بنتا ہے دستک سے ہماری

بازار میں بیٹھے تھے لیے ٹوٹا ہوا دل

سو بحث تو بنتی نہ تھی گاہک سے ہماری

ہم خاک نشینوں کی سمجھ میں نہیں آتا

اس شہر کو کیا ملتا ہے چشمک سے ہماری

وہی بے وجہ سی اداسیاں کبھی وحشتیں ترے شہر میں

 وہی بے وجہ سی اداسیاں کبھی وحشتیں تِرے شہر میں

تُو گیا تو مجھ سے بچھڑ گئیں سبھی رونقیں ترے شہر میں

مِری بے بسی کی کتاب کا کوئی ورق تُو نے پڑھا نہیں

تجھے کیا خبر کہاں مر گئیں مِری خواہشیں ترے شہر میں

سبھی ہاتھ مجھ پہ اٹھے یہاں سبھی لفظ مجھ پہ کسے گئے

مِری سادگی کے لباس پر پڑیں سلوٹیں ترے شہر میں

مٹے ماضی کے کتبوں کو گرا کر بھول جاتا ہوں

مِٹے ماضی کے کتبوں کو گِرا کر بھُول جاتا ہوں

میں یوں خوابوں کی اب قبریں بنا کر بھُول جاتا ہوں

بڑے ہی شوق سے لکھتا ہوں میں سب نام اب دل پر

پھر اس کے بعد خود ان کو مِٹا کر بھُول جاتا ہوں

جوانی کے زمانے کو کھڑے بارش کے پانی میں

میں کاغذ کی کوئی کشتی بہا کر بھُول جاتا ہوں

وہ جو چاند تاروں کی ماند پر سر شام راہ سے بچھڑ گئیں

وہ جو چاند تاروں کی ماند پر سرِ شام راہ سے بچھڑ گئیں

وہ رتیں تھیں تیرے شباب کی کہیں موسموں میں ٹھہر گئیں

بڑی مختصر تھیں وہ ساعتیں تِرے قرب میں، تِری چاہ میں

تھیں وہ شامیں پیڑوں کی اوٹ تک ہٹی دھوپ پَل میں اتر گئیں

دلِ بے خبر یہ امید کیوں، نہ تراش لمحوں سے خواب پھر

تمہیں جن رتوں کی تلاش ہے وہ رتیں تو آ کے گزر گئیں