شکستہ خواب کے ملبے میں ڈھونڈھتا کیا ہے

شکستہ خواب کے ملبے میں ڈھونڈھتا کیا ہے

کھنڈر کھنڈر ہے یہاں دھول کے سوا کیا ہے

نظر کی دھند میں ہیں بھولی بسری تصویریں

پلٹ کے دیکھنے والے، یہ دیکھنا کیا ہے؟

ابھی تو کاٹ رہی ہے ہر ایک سانس کی دھار

ازل جب آئے تو دیکھوں کہ انتہا کیا ہے

ایک پودا جو اگا ہے اسے پانی دینا

ایک پودا جو اگا ہے اسے پانی دینا

اپنے آنگن کو نئی رُت کی کہانی دینا

تِری آواز سے جب ٹوٹے مِرے گھر کا سکوت

در و دیوار کو بھی سحر بیانی دینا

پونچھ لینا مِری پلکوں سے لہو کی بوندیں

مِری آنکھوں کو اگر منظر ثانی دینا

کہاں ہے کوئی خدا کا خدا کے بندوں میں

کہاں ہے کوئی خدا کا خدا کے بندوں میں 

گھرا ہوا ہوں ابھی تک انا کے بندوں میں 

نہ کوئی سمت مقرر، نہ کوئی جائے قرار 

ہے انتشار کا عالم ہوا کے بندوں میں 

وہ کون ہے جو نہیں اپنی مصلحت کا غلام 

کہاں ہے بُوئے وفا، اب وفا کے بندوں میں 

وہ جو سب کا بہت چہیتا تھا

وہ جو سب کا بہت چہیتا تھا

قبر کی ساعتوں میں تنہا تھا

جس نے دنیا کو خوب دیکھا تھا

اس کی آنکھوں میں قہقہہ سا تھا

رنج کیا خواب کے بکھرنے کا

کچھ نہ تھا ریت کا گھروندا تھا

میں اندھیرے میں ہوں روشنی دے خدا

میں اندھیرے میں ہوں روشنی دے خدا

آگہی دے خدا، 🙏 آگہی دے خدا

تیرے بندے کا دل بجھ نہ جائے کہیں 

غم دئیے ہیں بہت، کچھ خوشی دے خدا

یا خدا، یا خدا! کی صدا لب پہ ہو

وجد کرتی ہوئی زندگی دے خدا

موسم تو بدلتے ہیں لیکن کیا گرم ہوا کیا سرد ہوا

موسم تو بدلتے ہیں لیکن، کیا گرم ہوا، کیا سرد ہوا

اے دوست ہمارے آنگن میں رہتی ہے ہمیشہ زرد ہوا

سب اپنے شناسا چھوڑ گئے رستے میں ہمیں غیروں کی طرح

چہرے پہ ہمارے ڈال گئی لا کر یہ کہاں کی گرد ہوا؟

چھُوٹے نہ کبھی پھولوں کا نگر کوشش تو یہی ہے اپنی مگر

اک روز اڑا لے جائے گی، پتوں کی طرح بے درد ہوا

تھوڑی سی شہرت بھی ملی ہے تھوڑی سی بدنامی بھی

تھوڑی سی شہرت بھی ملی ہے تھوڑی سی بدنامی بھی

میری سیرت میں اے قیصر خوبی بھی ہے خامی بھی

کتنے عاشق سنبھل گئے ہیں میرا فسانہ سن سن کر

میرے حق میں جیسی بھی ہو کام کی ہے ناکامی بھی

محفل محفل ذکر ہمارا سوچ سمجھ کے کر واعظ

اپنے مخالف بھی ہیں کتنے اور ہیں کتنے حامی بھی

اب اپنی ذات سے آگے سفر کیا جائے

اب اپنی ذات سے آگے سفر کِیا جائے

ہر ایک مرحلۂ درد سر کِیا جائے

شکارِ کم نظری کیوں ہو کوئی میری طرح

کشادہ زاویۂ ہر نظر کِیا جائے

رہی ہے اپنی روش مختلف تو پھر ہر کام

خلافِ رسم ہی شام و سحر کِیا جائے

ہم نے جو راہ منتخب کی ہے

ہم نے جو راہ منتخب کی ہے

یاد رکھنا بڑے غضب کی ہے

جان کی اپنی، فکر کب کی ہے

ہم نے کس سے اماں طلب کی ہے

جانتے ہیں سبب تباہی کا

کب ہمیں جستجو سبب کی ہے

اک نظر تو میری طرف بھی دیکھ

اک نظر تو میری طرف بھی دیکھ

پھر مِرے دشمنوں کی صف بھی دیکھ

دیکھ خلوت میں سر خمیدہ مجھے

اور جلوت میں سر بکف بھی دیکھ

ابر نیساں! گزر نہ جا یوں ہی

تہی آغوشئ صدف بھی دیکھ

ہونے لگے ہیں رستے رستے آپس کے ٹکراؤ بہت

ہونے لگے ہیں رستے رستے، آپس کے ٹکراؤ بہت

ایک ساتھ کے چلنے والوں میں بھی ہے الگاؤ بہت

بہکے بہکے سے بادل ہے کیا جانے یہ جائیں کدھر

بدلی ہوئی ہواؤں کا ہے ان پر آج دباؤ بہت

سوچ کا ہے یہ پھر کہ یارو! پیچ و خم کی دنیا میں

ڈھونڈ رہے ہو ایسا رستہ جس میں نہیں گھماؤ بہت