یہ جستجو میں نہ جانے کس کی چراغ آنکھوں کے جل رہے ہیں

 یہ جستجو میں نہ جانے کس کی چراغ آنکھوں کے جل رہے ہیں

کہ قید ہستی سے ہم نکل کر افق کی راہوں پہ چل رہے ہیں

یہ وقت جانے عذاب کیسے شدید مجھ پر اتارتا ہے

یہ چاند تارے حسین منظر نظر میں جیسے پگھل رہے ہیں

کہیں امیدوں کی یہ قناتیں جو ٹوٹتیں تو غضب ہی ہوتا

مِرے عزائم مِرے ارادے بلندیوں پر سنبھل رہے ہیں

یہ سلوٹ وقت کے ماتھے پہ کچھ اچھا نہیں لگتا

 یہ سلوٹ وقت کے ماتھے پہ کچھ اچھا نہیں لگتا

کہ چہرہ آئینے میں دیر تک اپنا نہیں لگتا

تِری یادوں کی خوشبو یوں ہمیشہ ساتھ رہتی

میں تنہائی میں گھر کر بھی کبھی تنہا نہیں لگتا

نہ سنگریزے، نہ خارِ گل، نہ تلوے خونچکاں اپنے

نہ جانے کیوں تِرے کوچے کا یہ رستہ نہیں لگتا

مرے ہاتھوں کی تحریروں میں رکھتا

 مرے ہاتھوں کی تحریروں میں رکھتا

وہ اپنا خواب تعبیروں میں رکھتا

زباں میری سمجھتا کیا زمانہ

میں اپنی سوچ تصویروں میں رکھتا

چلا کرتا مقدر ساتھ میرے

دعا شامل جو تعبیروں میں رکھتا

زندگی کے اس سفر میں حادثہ کچھ بھی نہیں

 زندگی کے اس سفر میں حادثہ کچھ بھی نہیں

ٹوٹ کر بکھرے تھے کتنے پر ہوا کچھ بھی نہیں

ہو گیا نم خود بخود ہی سادہ لمحوں کا ورق

تجھ کو لکھنا تھا بہت کچھ پر لکھا کچھ بھی نہیں

کون مجھ میں جھیلتا ہے خامشی سے کرب جاں

کوئی اندر ٹوٹتا ہے پر صدا کچھ بھی نہیں

قربتوں کے سارے لمحے دوریوں میں کھو گئے

 قربتوں کے سارے لمحے دوریوں میں کھو گئے

خواب کچھ آنکھوں میں لیکن جاتے جاتے بو گئے

یاد جب آئی تِری تو منتظر پہروں رہے

اپنی تنہائی سے آخر پھر لپٹ کر سو گئے

عہدِ طفلی! نوجوانی کھو گئی کس موڑ پر

حادثے ہونے تھے جتنے وہ تو آخر ہو گئے

عجب تضاد ہے سچائیوں سے آگے بھی

 عجب تضاد ہے سچائیوں سے آگے بھی

مِرا وجود ہے پرچھائیوں سے آگے بھی

کسی کا حسن فریب‌ِ نشاط دیتا ہے

نگارِ وقت کی انگڑائیوں سے آگے بھی

چلا ہے تلخ حقائق کا کارواں جیسے

مِرے یقین کی بینائیوں سے آگے بھی