اک اشک بہا ہو گا اک شعر ہوا ہو گا

 اک اشک بہا ہو گا

اک شعر ہوا ہو گا

چپ چاپ پڑے ہیں ہم

دل راکھ ہوا ہو گا

اک خواب سہارا تھا

وہ ٹوٹ گیا ہو گا

دعا کے پھول کھلاتے ذرا نکھر جاتے

 دعا کے پھول کھلاتے، ذرا نکھر جاتے

قبولیت کی گھڑی آتی، اور مر جاتے

فنا کے خواب کئی دن سے آ رہے ہیں مجھے

میں دیکھتا ہوں پرندوں کو جھیل پر جاتے

قبولیت سے ہمیں کیا بھلا شکایت ہو

دعا ہی اونگھنے لگتی ہے عرش پر جاتے

اے میاں کون یہ کہتا ہے محبت کی ہے

 اے میاں کون یہ کہتا ہے محبت کی ہے

بات یہ ہے کہ یہاں بات ضرورت کی ہے

پھر کوئی چاک گریبان لیے پھرتا ہے

حضرت عشق نے پھر کوئی شرارت کی ہے

بس یونہی ایک ہیولیٰ سا نظر آیا تھا

اور پھر دل نے دھڑکنے کی جو شدت کی ہے

یہ عکس آپ ہی بنتے ہیں ہم سے ملتے ہیں

 یہ عکس آپ ہی بنتے ہیں ہم سے ملتے ہیں

کہ ناخنوں کے بغیر اپنے زخم چھلتے ہیں

خبر ملی ہے کہ تو خواب دیکھتی ہے ابھی

خبر ملی ہے تری سمت پھول کھلتے ہیں

ہمیں یہ وقت کی بخیہ گری پسند نہیں

اگرچہ وقت کے ہاتھوں سے زخم سلتے ہیں

اس سے دل کے موسم کا اندازہ ہوتا ہے

 اس سے دل کے موسم کا اندازہ ہوتا ہے

چہرہ جسم کی بستی کا دروازہ ہوتا ہے

اوس پڑوس کے ستره باغ گواہی دیتے ہیں

پھول تمہارے چھونے سے ہی تازه ہوتا ہے

چیزیں اپنی ضد سے ہی پہچانی جاتی ہیں

شور یقیناً چپ کا ہی آوازہ ہوتا ہے

یہ جو ماتھوں پہ ہیں شکن والے

 یہ جو ماتھوں پہ ہیں شکن والے

پہلے یہ بھی تھے حسنِ ظن والے

شب بہشتوں میں مچ گیا کہرام

چھڑ گئے تذکرے وطن والے

دنیا دنیا پکارنے لگے تھے

مل کے سارے ہی دِین و دھن والے

میں تری مانتا لیکن جو مرا دل ہے نا

 میں تِری مانتا لیکن جو مِرا دل ہے نا

در کا پتھر ہے ہٹانا اسے مشکل ہے نا

یہ تِرا حسن کچھ ایسا نہیں پُوجیں جس کو

لیکن اے یار تِرے گال کا جو تِل ہے نا

جو مِرے واسطے دن رات دعا کرتے ہیں

دشمن جاں یہ بتا ان میں تو شامل ہے نا

پہلے ہم اشک تھے پھر دیدۂ نمناک ہوئے

پہلے ہم اشک تھے پھر دیدۂ نمناک ہوئے

اک جوئے آب رواں ہاتھ لگی، پاک ہوئے

اور پھر سادہ دلی دل میں کہیں دفن ہوئی

اور پھر دیکھتے ہی دیکھتے چالاک ہوئے

اور پھر شام ہوئی، رنگ اڑے جام بنے

اور پھر ذکر چھڑا، تھوڑے سے غمناک ہوئے

ہماری آنکھیں بھی صاحب عجیب کتنی ہیں

ہماری آنکھیں بھی صاحب عجیب کتنی ہیں

کہ دل جو روئے تو کم بخت ہنسنے لگتی ہیں

تمہارے شہر سے چلیے کہ تنگ دستی نے

تمہارے شہر کی گلیاں بھی تنگ کر دی ہیں

یہ ہم ہیں بے ہنراں، دیکھیے ہنر مندی

جو کوئی کام کریں ہم تو پوریں جلتی ہیں

دل کوئی پھول نہیں اور ستارہ بھی نہیں

دل کوئی پھول نہیں اور ستارا بھی نہیں
کارِ دنیا کا نہیں، اور تمہارا بھی نہیں
ہم کسی سمت چلیں، راہ لگیں کھو جائیں
راہِ گم گشتہ ہیں، سو ایسا اشارا بھی نہیں
ہم کو تو وصل کے قابل نہیں جانا تم نے
ہم چلے جائیں کہیں تم کو گوارا بھی نہیں

گلی کا عام سا چہرہ بھی پیارا ہونے لگتا ہے

گلی کا "عام" سا "چہرہ" بھی پیارا ہونے لگتا ہے

محبت میں تو "ذرہ" بھی "ستارا" ہونے لگتا ہے

یہاں گم سم سے لوگوں پر کبھی پلکیں نہیں اٹھیں

اشارا" کرنے والوں کو "اشارا" ہونے لگتا ہے"

ہماری "زندگی" پر ہے ہمارے "عشق" کا سایہ

کہ ہم جو "کام" کرتے ہیں "خسارا" ہونے لگتا ہے

کہ حسن عشق پہ قربان کر دیا جائے

پیادے بھیج کے "اعلان" کر دیا جائے

کہ حسن عشق پہ "قربان" کر دیا جائے

جو شہر والے ہیں مصروف دنیاداری میں

تو چاند گاؤں کا "مہمان" کر دیا جائے

میں جا رہا ہوں پرندے بھی ساتھ لے جاؤں

تمہارے "شہر" کو "ویران" کر دیا جائے