کیا اُگاؤں گا زمیں درد کی بنجر لے کر
میں بھلا جاؤں کہاں ایسا مقدر لے کر
کتنا نادان ہے انسان زمانے بھر میں
پُوجتا رہتا ہے بھگوان کو پتھر لے کر
چاک کرتی ہے اُجالوں کے مقدر کو سدا
تِیرہ بختی ہے مِری ہاتھ میں خنجر لے کر
کون نِکلا ہے یہ سانسوں کی تحفظ کے لیے
دل میں طُغیانی و آنکھوں میں سمندر لے کر
جانے کیوں ایسے گُزرتے ہیں شب و روز یہاں
کسی وِیرانے کے سناٹوں کا منظر لے کر
اب خیالوں کی نزاکت سے تجھے بَیر نہ ہو
کیسے بھُلاؤں تجھے لفظوں کا دفتر لے کر
خضر بھی رشک کرے میرے مقدر پہ اثر
ایسا آ جاتا کوئی بختِ سکندر لے کر
اثر سعید
No comments:
Post a Comment