پیغام زندگی نے دیا موت کا مجھے

 پیغام زندگی نے دیا موت کا مجھے

مرنے کے انتظار میں جینا پڑا مجھے

اس انقلاب کی بھی کوئی حد ہے دوستو

نا آشنا سمجھتے ہیں اب آشنا مجھے

کشتی پہنچ سکے گی یہ تا ساحلِ مراد

دھوکا نہ دے خدا کے لیے نا خدا مجھے

مریض عشق کا کیا ہے جیا جیا نہ جیا

مریضِ عشق کا کیا ہے جیا، جیا، نہ جیا

ہے ایک سانس کا جھگڑا لیا، لیا، نہ لیا

بدن" ہی آج، اگر "تار تار" ہے میرا"

تو ایک چاکِ گریباں سیا، سیا، نہ سیا

یہ اور بات کہ، تُو ہر راہِ خیال میں ہے

کہ تیرا نام زباں سے لیا، لیا، نہ لیا

وہ عالم ہے کہ منہ پھیرے ہوئے عالم نکلتا ہے

وہ عالم ہے کہ منہ پھیرے ہوئے عالم نکلتا ہے

شبِ فرقت کے غم جھیلے ہوؤں کا دَم نکلتا ہے

الٰہی خیر ہو الجھن پہ الجھن بڑھتی جاتی ہے

نہ میرا دَم نہ ان کے گیسوؤں کا خم نکلتا ہے

قیامت ہی نہ ہو جاۓ جو پردے سے نکل آؤ

تمہارے منہ چھپانے میں تو یہ عالم نکلتا ہے

گہوارہِ مرقد بھی صفی کام نہ آیا

گہوارۂ مرقد بھی صفی کام نہ آیا

آرام نہ آیا،۔ مجھے آرام نہ آیا

خورشید پہ موقوف نہیں سامنے تیرے

وہ کون ہے جو لرزہ بر اندام نہ آیا

صد شکر کہ پوچھا تو حشر میں مجھ سے

قاتل کا مگر یاد مجھے نام نہ آیا

پا لیا جو پانا تھا کیا بتائیں کیا پایا

پا لیا جو پانا تھا،۔ کیا بتائیں کیا پایا

نقدِ ناروا پایا،۔ بختِ نارسا پایا

دلربا نے دل پایا، دل نے دلربا پایا

کھو کے دل یہ خوش ہیں ہم جیسے کچھ پڑا پایا

ضبط کی کوئی حد ہے،۔ انتہا تحمل کا

غم نے دل کو جب چھیڑا سازِ بے صدا پایا

کھینچ لو سینہ مجروح سے پیکاں اپنا

کھینچ لو سینۂ مجروح سے پیکاں اپنا

دیکھ لوں دل سے نکلتے ہوئے ارماں اپنا

ہے یہی ضعف تو اے دستِ جنوں کیا حاصل

ہاتھ پہنچا بھی اگر تا بہ گریباں اپنا

ٹھوکریں کھاتے مِرے ساتھ کہاں چلئے گا

راستہ لیجئے اے خضرِ بیاباں اپنا

مہربان تو نے وہ انداز نظر چھوڑ دیا

مہربان تُو نے وہ انداز نظر چھوڑ دیا

ہم نے اس واسطے آنا ہی ادھر چھوڑ دیا

ہم نے اے بے خبری! تجھ پہ تو گھر

تُو نے غیروں کا ہمیں دست نگر چھوڑ دیا

چیختے چیختے بلبل نے ذرا دم جو لیا

اک نیا تُو نے شگوفہ گلِ تر چھوڑ دیا

دیدہ اشکبار کیا کہنا

دیدۂ اشکبار کیا کہنا

واہ ابرِ بہار کیا کہنا

حال جنت کا سن چکے واعظ

اب اسے بار بار کیا کہنا

اڑ کے پہنچا کسی کے دامن تک

آج میرا غبار کیا کہنا

چارہ سوز جگر کب قرب جانانہ ہوا

چارۂ سوزِ جگر کب قربِ جانانہ ہوا

شمع کے پہلو میں جل کر خاک پروانہ ہوا

ایک قطرہ آبِ نیساں کا صدف کی گود میں

فرضِ حسنِ تربیت سے درِ یک دانہ ہوا

التفاتِ عشق سے بڑھتا رہا القابِ حسن

جان سے جاناں ہوا، جاناں سے جانانہ ہوا

غزل اس نے چھیڑی مجھے ساز دینا

غزل اس نے چھیڑی مجھے ساز دینا 

ذرا عمرِ رفتہ کو آواز دینا 

قفس لے اڑوں میں، ہوا اب جو سنکے 

مدد اتنی اے بال و پرواز دینا 

نہ خاموش رہنا مِرے ہم صفیرو 

جب آواز دوں، تم بھی آواز دینا 

سوز و گداز عشق کے قابل نہیں رہا

سوز و گدازِ عشق کے قابل نہیں رہا

جس سے فروغِ حسن تھا وہ دل نہیں رہا

اللہ رے بے حجابئ حسنِ نظارہ سوز

پردہ نگاہِ شوق کا حائل نہیں رہا

یوسفؑ کا حسن عشقِ زلیخا کو دے دعا

عودِ شباب اب کوئی مشکل نہیں رہا

مری لحد پہ کوئی سوگوار تک نہ رہا

مِری لحد پہ کوئی سوگوار تک نہ رہا

ہوا چلی کہ چراغِ مزار تک نہ رہا

ہوئے بھی حضرتِ ناصح تو کب کرم فرما

جب اپنے دل پہ ہمیں اختیار تک نہ رہا

جنوں میں ہم نے جہاں کی ہے جادہ فرسائی

وہاں جو دیکھئے اب کوئی خار تک نہ رہا