دریا میں ڈوب جاوے کہ یا چاہ میں پڑے

 دریا میں ڈوب جاوے کہ یا چاہ میں پڑے

اے عشق پر نہ کوئی تِری راہ میں پڑے

مت پوچھ جورِ غم سے دلِ ناتواں کا حال

بجلی تو دیکھی ہو گی کبھی کاہ میں پڑے

اک دم بھی دیکھ سکتا نہیں ہم کو اس کے پاس

خاک اس فلک کے دیدۂ بدخواہ میں پڑے

مجھ سے ہوا نشے میں ہم آغوش آشنا

مجھ سے ہوا نشے میں ہم آغوش آشنا

یا رب اسی طرح رہے بے ہوش آشنا

کم حوصلہ ہیں ہم کو کہاں دید کی نظر

ہے مصلحت جو ہم سے ہی روپوش آشنا

اے نوجوانو! اتنا اکڑتے ہو کیوں کبھی

ہم سے بھی اس جوانی کا تھا جوش آشنا

تڑپے ہے بہت یہ دل افگار ہمارا

تڑپے ہے بہت یہ دلِ افگار ہمارا

آ جائے شتابی کہیں دل دار ہمارا

بیرنگ ہے کچھ آئینہ دل کا یہاں عکس

ہے بو قلموں جلوہ گر یار ہمارا

جذبہ ہے ستم کا کہ کشش مہر کی ہے واں

جاتا ہے جو دل ہو کے یہ ناچار ہمارا

رو رو کے کیا ابتر سب کام مرے دل کا

رو رو کے کیا ابتر سب کام مِرے دل کا

کھویا مِری آنکھوں نے آرام مرے دل کا

آغازِ محبت میں دیکھا تو یہ کچھ دیکھا

کیا جانیۓ کیا ہو گا انجام مرے دل کا

جس دن سے ہوا پیدا اس دن سے ہوا شیدا

دیوانہ و سودائی ہے نام مرے دل کا

وہ پیار اب رہا نہ ترا اور نہ چاہ وہ

وہ پیار اب رہا نہ تِرا اور نہ چاہ وہ

باتیں ہی ایک رہ گئیں کہنے کو آہ وہ

پوچھا جو حال اس نے تو میں اور چپ ہوا

تا ضد میں آ کے لگ ہی پڑے خواہ مخواہ وہ

بے چین ہم کو آپ ہی کرتا ہے ناز سے

رکھتا ہے اور سر پہ ہمارے گناہ وہ

اپنی طرف سے ہم نے تم سے بہت نباہا

اپنی طرف سے ہم نے تم سے بہت نباہا

پر آہ کیجیۓ کیا تم نے ہمیں نہ چاہا

گزری ہے رات مجھ میں اور دل میں طرفہ صحبت

ایدھر تو میں نے کی آہ، اودھر سے وہ کراہا

ان ہی بتوں نے، یہ جو کافر ہیں اس اودھ کے

کعبہ سمجھ کے میرے اس دل کے گھر کو ڈھاہا

گر کیجے رقم کچھ تری وحدت کے بیاں کا

گر کیجے رقم کچھ تِری وحدت کے بیاں کا

تو چاہیے خامہ بھی اسی ایک زباں کا

تُو ہے تو مِری جان و دل و جسم ہے ورنہ

کیسا یہ دل اور کیسا یہ جی اور میں کہاں کا

رکھتے ہیں نہ کچھ نام ہی اپنا نہ نشان ہم

کیا نام و نشان پوچھو ہو بے نام و نشاں کا

آسان نہ سمجھیو تم نخوت سے پاک ہونا

آسان نہ سمجھیو تم نخوت سے پاک ہونا

اک عمر کھو کے ہم نے سیکھا ہے خاک ہونا

کِھلتا برنگ گُل یہ کب مژدۂ صبا سے

تھا اسکی تیغ سے تو اس دل کو چاک ہونا

کیا جانیۓ کہ باہم کیوں ہمیں اور اس میں

موقوف ہو گیا ہے اب وہ تپاک ہونا

گر عشق سے کچھ مجھ کو سروکار نہ ہوتا

گر عشق سے کچھ مجھ کو سروکار نہ ہوتا
تو خوابِ عدم سے کبھی بیدار نہ ہوتا
یا رب میں کہاں رکھتا تِرا داغِ محبت
پہلو میں اگر میرے دلِ زار نہ ہوتا
دنیا میں تو دیکھا نہ سوائے غم و اندوہ
میں کاش کے اس بزم میں ہشیار نہ ہوتا

عشق کب تک آگ سینہ میں مرے بھڑکائے گا

عشق کب تک آگ سینہ میں مِرے بھڑکائے گا
راکھ تو میں ہو چکا کیا خاک اب سُلگائے گا
لے چلی ہے اب تو قسمت تیرے کوچہ کی طرف
دیکھیے پھر بھی خدا اس طرف ہم کو لائے گا
کر چکے صحرا میں وحشت پھر چکے گلیوں میں ہم
دیکھیے اب کام ہم کو عشق کیا فرمائے گا

کیا پوچھتے ہو یارو حال تباہ میرا

کیا پوچھتے ہو یارو! حالِ تباہ میرا
بے مہر ہو گیا ہے وہ رشکِ ماہ میرا
تیری یہ کم نگاہی اور میرا یہ تڑپنا
تُو ہی بتا کہ کیونکر ہو گا نِباہ میرا
سودا ہوا ہے مجھ کو زلفوں کا تیری یاں تک
نشتر لگے تو نکلے لوہو سیاہ میرا

مت پوچھ کہ رحم اس کو مرے حال پہ کب تھا

مت پوچھ کہ رحم اس کو مِرے حال پہ کب تھا
اب کہنے سے کیا فائدہ، جب تھا، کبھی تب تھا
اتنا بھی تو بے چین نہ رکھ دل کو مِرے تُو
آخر یہ وہی دل ہے جو آرام طلب تھا
کیا دل کے لگانے کا سبب پوچھے ہے ہمدم
بے چیز تو البتہ نہیں کچھ تو سبب تھا

جس نے کہ مے عشق سے اک جام نہ پایا

جس نے کہ مۓ عشق سے اِک جام نہ پایا
اس دوڑ میں اس نے تو کبھی نام نہ پایا
ہر ایک ہدایت کی نہایت ہے و لیکن
اس عشق کے آغاز کا انجام نہ پایا
کیا شکوہ کریں کنجِ قفس کا دلِ مضطر
ہم نے تو چمن میں بھی ٹک آرام نہ پایا

پیغام نہ ملنے کا مجھے یار نے بھیجا

پیغام نہ ملنے کا مجھے یار نے بھیجا
تحفہ یہ نیا میرے ستم گار نے بھیجا
تا ہو ترے اطراف میں پھر پھر کے معطر
نکہت کو تِرے یاں گل و گلزار نے بھیجا
ناچار چھپا کبک دری شرم سے جا کر
کہسار میں اس کو تِری رفتار نے بھیجا

دیکھیں گے پھر ان آنکھوں سے ہم روئے یار بھی

دیکھیں  گے پھر ان آنکھوں سے ہم روئے یار بھی
ہووے گا یہ تمام کبھی انتظار بھی
آئینہ ہی کو کب تئیں دکھلاؤ گے جمال
باہر کھڑے ہیں کتنے اور امیدوار بھی
دشمن تو تھے ہی پر تِری اس دوستی میں اب
بے زار ہم سے ہو گئے ہیں دوستدار بھی

کہیں جو دل نہ لگاویں تو پھر اداس پھریں

کہیں جو دل نہ لگاویں تو پھر اداس پھریں
وگر لگاویں تو مشکل کہ بے حواس پھریں
ہمیں بھی ہوئے اجازت کہ شمع رو تجھ پر
پتنگ کی نمط اک دم تو آس پاس پھریں
تِری گلی میں بھلا اتنی تو ہمیں ہو راہ
کہ جب تک اپنا وہاں جی ہو بے ہراس پھریں

سیر ہے تجھ سے مری جان جدھر کو چلیے

سیر ہے تجھ سے مِری جان، جدھر کو چلئے
تُو ہی گر ساتھ نہ ہووے تو کدھر کو چلئے
خواہ کعبہ ہو کہ بت خانہ غرض ہم سے سن
جس طرف دل کی طبیعت ہو، ادھر کو چلئے
زلف تک رخ سے نگہ جاوے نہ اک دن کے سوا
شام کو پہنچئے منزل، جو سحر کو چلئے

آتش غم نے ملک دل پھونک دیا جلا دیا

آتشِ غم نے ملکِ دل پھونک دیا، جلا دیا
باقی جو کچھ کہ رہ گیا اشک نے لے بہا دیا
کہتے تھے ہم کہ روزِ ہجر کہتے ہیں کس کو کیا ہے چیز
ہائے فلک نے سو وہ دن آج ہمیں دِکھا دیا
ایک یہی چراغِ دل جلتا تھا میرے حال پر
آہِ سحر نے میری آہ اس کو بھی اب بجھا دیا

دل خدا جانے کس کے پاس رہا

دل خدا جانے کس کے پاس رہا
ان دنوں جی بہت اداس رہا
کیا مزا مجھ کو وصل میں اس کے
میں رہا بھی تو بے حواس رہا
یوں کھلا، اپنا یہ گلِ امید
کہ سدا دل پہ داغِ یاس رہا

صیاد کی مرضی ہے کہ اب گل کی ہوس میں

صیاد کی مرضی ہے کہ اب گُل کی ہوس میں
نالے نہ کریں مُرغ گرفتارِ قفس میں
ایک وقت میں تھی نالۂ مجنوں سے ہم آواز
اب تک ہے اثر اس لیے آواز جَرَس میں
اِس ملنے سے ہو دل کو بھلا کیونکہ تسلی
ایک بار کہیں چھپ کے ملے لاکھ برس میں