کہیں جو دل نہ لگاویں تو پھر اداس پھریں

کہیں جو دل نہ لگاویں تو پھر اداس پھریں
وگر لگاویں تو مشکل کہ بے حواس پھریں
ہمیں بھی ہوئے اجازت کہ شمع رو تجھ پر
پتنگ کی نمط اک دم تو آس پاس پھریں
تِری گلی میں بھلا اتنی تو ہمیں ہو راہ
کہ جب تک اپنا وہاں جی ہو بے ہراس پھریں
اٹھا دے ہم سے جو بیٹھے ہوؤں کو اب کے فلک
تو آرزو ہے یہ جی میں کہ بے قیاس پھریں
نہ خط کسی کا پڑھے ہے حسن نہ وہ عرضی
کہاں تلک لئے ہم اپنا التماس پھریں

میر حسن دہلوی