پہلے پیمانے چھلکاؤ پھر کوئی رنگین غزل

 پہلے پیمانے چھلکاؤ، پھر کوئی رنگین غزل

آنکھوں کو مےخانہ بناؤ، پھر کوئی رنگین غزل

یوں تو دن بھر ایسی ویسی باتیں ہوتی رہتی ہیں

کوئی اچھا شعر سناؤ، پھر کوئی رنگین غزل

میں آخر کیا بات کروں ان بوجھل بوجھل لمحوں میں

تم اک دن فرصت میں آؤ، پھر کوئی رنگین غزل

شام غم ہے تری یادوں کو سجا رکھا ہے

شامِ غم ہے تِری یادوں کو سجا رکھا ہے

میں نے دانستہ چراغوں کو بجھا رکھا ہے

اور کیا دوں میں گلستاں سے محبت کا ثبوت

میں نے کانٹوں کو بھی پلکوں پہ سجا رکھا ہے

جانے کیوں برق کو اس سمت توجہ ہی نہیں

میں نے ہر طرح نشیمن کو سجا رکھا ہے

کوئی سوغات وفا دے کے چلا جاؤں گا

 کوئی سوغاتِ وفا دے کے چلا جاؤں گا

تجھ کو جینے کی ادا دے کے چلا جاؤں گا

میرے دامن میں اگر کچھ نہ رہے گا باقی

اگلی نسلوں کو دعا دے کے چلا جاؤں گا

تیری راہوں میں مرے بعد نہ جانے کیا ہو

میں تو نقشِ کفِ پا دے کے چلا جاؤں گا

مقابلے تو غلط فہمیاں بڑھاتے ہیں

 مقابلے تو غلط فہمیاں بڑھاتے ہیں

یہ ولولے تو غلط فہمیاں بڑھاتے ہیں

قریب آؤ تو شاید سمجھ میں آ جائے

کہ فاصلے تو غلط فہمیاں بڑھاتے ہیں

ہے میرے ساتھ مرے دشمنوں سے ربط انہیں

یہ سلسلے تو غلط فہمیاں بڑھاتے ہیں

ایسا منظر کبھی تو پاؤں میں

 ایسا منظر کبھی تو پاؤں میں

وہ سنبھل جائیں لڑکھڑاؤں میں

ڈوبنا ہی اگر مقدر ہے

تیری آنکھوں میں ڈوب جاؤں میں

کیا کہا، تم کو بھول کر دیکھوں

اس سے بہتر ہے مر نہ جاؤں میں

خود پکارے گی جو منزل تو ٹھہر جاؤں گا

 خود پکارے گی جو منزل تو ٹھہر جاؤں گا

ورنہ خوددار مسافر ہوں، گزر جاؤں گا

آندھیوں کا مجھے کیا خوف میں پتھر ٹھہرا

ریت کا ڈھیر نہیں ہوں جو بکھر جاؤں گا

زندگی اپنی کتابوں میں چھپا لے، ورنہ

تیرے اوراق کے مانند بکھر جاؤں گا

اس راز کو کیا جانیں ساحل کے تماشائی

 اس راز کو کیا جانیں ساحل کے تماشائی

ہم ڈوب کے سمجھے ہیں دریا! تِری گہرائی

جاگ اے مِرے ہمسایہ خوابوں کے تسلسل سے

دیوار سے آنگن میں اب دھوپ اتر آئی

چلتے ہوئے بادل کے سائے کے تعاقب میں

یہ تشنہ لبی مجھ کو صحراؤں میں لے آئی

ناکامی قسمت کا گلہ چھوڑ دیا ہے

 ناکامئ قسمت کا گِلہ چھوڑ دیا ہے

تدبیر سے تقدیر کا رخ موڑ دیا ہے

وہ جرم بھی اک عظمتِ کردار ہے جس نے

ٹوٹا ہوا اک رشتۂ دل جوڑ دیا ہے

دل ڈوب چلا آخرِ شب خشک ہیں آنکھیں

آ جا، کہ ستاروں نے بھی دم توڑ دیا ہے