دل تو ایسا ہے کہ ہر شام سہانی مانگے

یوں تجھے مِری تشنہ دہانی مانگے

جس طرح خواب میں پیاسا کوئی پانی مانگے

میں نے منظوم تو کی تیرے بدن کی خوشبو

اور کیا مجھ سے تِری مست جوانی مانگے

اسکے خط اسکی میں تصویریں بھی واپس کردوں

نامہ بر اس سے کہو، اپنی زبانی مانگے

اپنی سانسیں مری سانسوں میں ملا کے رونا

اپنی سانسیں مِری سانسوں میں ملا کے رونا 

جب بھی رونا، مجھے سینے سے لگا کے رونا 

قیدِ "تنہائی" سے نکلا ہوں ابھی "جانِ" سفر 

مجھ سے ملنا، مجھے زلفوں میں چھپا کے رونا

اتنا "سفاک" نہ تھا "گھر" کا یہ منظر پہلے 

تِری یادوں کے چراغوں کو بجھا کے رونا 

رستوں پہ نہ بیٹھو کہ ہوا تنگ کرے گی

رستوں پہ نہ بیٹھو کہ ہوا تنگ کرے گی

بچھڑے ہوئے لوگوں کی صدا تنگ کرے گی

مت ٹوٹ کے چاہو اسے آغازِ سفر میں 

بچھڑے گا تو اک ایک ادا تنگ کرے گی

اتنا بھی اسے یاد نہ کر شامِ غریباں

مہکے گی فضا بوئے حنا تنگ کرے گی

وہ جو ملنے کے جتن کرتا تھا جانے کیا کیا

وہ جو ملنے کے جتن کرتا تھا جانے کیا کیا

اب وہ کرتا ہے نہ ملنے کے بہانے کیا کیا

اگرچہ اک عمر ہوئی شہرِ نگاراں چھوڑے

پھر بھی ہوتے رہے مشہور فسانے کیا کیا

اب ملاقات کی فرصت ہی نہیں ملتی ہمیں

ہم نے دیکھے تھے کبھی خواب سہانے کیا کیا

یہ بھی ممکن ہے اسی دشت سے دریا نکلے

یہ بھی ممکن ہے اسی دشت سے دریا نکلے

مِرے سائے سے مِرے جسم کا لاوا نکلے

کس قدر عام سے تھے تیرے خدوخال، مگر

دل میں "اترے" تو وہی حسن سراپا نکلے

گھومتا پھرتا ہوں گلیوں میں طبیعت کے خلاف

کسی دروازے سے شاید تِرا چہرہ نکلے

اس سے پہلے کہ کسی گھاٹ اتارے جاتے

اس سے پہلے کہ کسی گھاٹ اتارے جاتے

ہم ہی بیتاب تھے، ہم مفت میں مارے جاتے

حدِ ادراک سے آگے تھی تِرے قرب کی شام

ڈھونڈنے تجھ کو کہاں چاند ستارے جاتے 

خود ہی آ جاتا ہے تُو اپنی ہوس کی زد میں

ورنہ صدقے تِری چاہت میں اتارے جاتے

محبتوں میں بھی مال و منال مانگتے ہیں

محبتوں میں بھی مال و منال مانگتے ہیں

یہ کیسے لوگ ہیں، اجرِ وصال مانگتے ہیں

سمجھ میں آیا نہیں، ان کا مدعا کیا ہے؟

لکھیں جواب تو پھر وہ سوال مانگتے ہیں

محبتوں کی دکانیں اجڑنے والی ہیں

عروج دیکھ چکے، اب زوال مانگتے ہیں

اس بار اس نے رنج جدائی نہیں دیا

اس بار اس نے رنجِ جدائی نہیں دیا

بچھڑے تو کوئی رنج دکھائی نہیں دیا

وہ کر رہا تھا لطف مگر بے دلی کے ساتھ

دل نے مجھے بھی اذنِ رسائی نہیں دیا

ترکِ تعلقات پہ مائل تھے ہم، مگر

رستہ کسی کو کوئی دکھائی نہیں دیا

محسوس یہ ہوتا ہے زمانے کے لیے تھے

محسوس یہ ہوتا ہے زمانے کے لیے تھے

ورنہ یہ مراسم تو نبھانے کے لیے تھے

اک عمر کی تحقیق سے یہ راز کھلا ہے

ہم لوگ تو بس یونہی فسانے کے لیے تھے

تم شام ڈھلے کیسے نکل پڑتے ہو گھر سے

یہ گھر تو مِری جان! بسانے کے لیے تھے

یہ شہر چھوڑ دوں تری رسوائی ختم ہو

یہ شہر چھوڑ دوں تِری رسوائی ختم ہو

احباب کی یہ حاشیہ آرائی ختم ہو

وہ کون تھا جو میری انا ساتھ لے گیا

اس پیکرِِ سراب کی رعنائی ختم ہو

سب کچھ گنوا دیا ہے مِرے واسطے تو پھر

میرے قریب آ، مِری تنہائی ختم ہو

مرے خدا یہ محبت کہاں سے آتی ہے

یہ پر اسرار اذیت کہاں سے آتی ہے

مِرے خدا یہ محبت کہاں سے آتی ہے

الگ ہوۓ تھے سمجھ سوچ کر خوشی سے ہم

تو پھر یہ بُوۓ رفاقت کہاں سے آتی ہے

گزر گئی ہے اسی جستجو میں عمرِ عزیز

تِرے لبوں میں حلاوت کہاں سے آتی ہے

اسے اک سلطنت اک راجدھانی چاہیے تھی

اسے اک سلطنت اک راجدھانی چاہیے تھی

محبت میں بھی اس کو حکمرانی چاہیے تھی

تجھے معلوم تھا کہ خودسری ہے شوق اس کا

تجھے اے دل! مِری عزت بچانی چاہیے تھی

بچھڑنے کا وہ پہلے سے تہیہ کر چکا تھا

اسے میری طرف سے بدگمانی چاہیے تھی