میں ڈھونڈنے نکلا تھا کبھی خاک میں دنیا

 میں ڈھونڈنے نکلا تھا کبھی خاک میں دنیا

گم ہوتی گئی وسعتِ افلاک میں دنیا

میں خاک ہوں ملتے ہیں سبھی میری حدوں سے

میں چاک ہوں گھومے مِری پیچاک میں دنیا

میں مانگنے والا نہیں درویش ہوں صاحب

مل جائے گی تم کو مِری پوشاک میں دنیا

لفظ ترتیب سے رکھتا ہوں میں تمثیل کے ساتھ

لفظ ترتیب سے رکھتا ہوں میں تمثیل کے ساتھ

کون کرتا ہے بیاں فلسفہ تفصیل کے ساتھ

اشک پیدا ہوا آنکھوں کی زمیں سے یک دم

آئینہ ٹوٹ گیا ہجر کی تکمیل کے ساتھ

میری آواز بہت دُور تلک جائے گی

آیتِ ہجر سُناؤں گا میں ترتیل کے ساتھ

آواز کے ٹوٹے ہوئے پیکر سے گرا تھا

آواز کے ٹوٹے ہوئے پیکر سے گِرا تھا

وہ لفظ جو کٹ کر مِرے اندر سے گرا تھا 

سب پھول کھلے تھے تِرے ہونٹوں کی چھووّن سے 

ہر رنگ تِری آنکھ کے منظر سے گرا تھا 

ٹوٹا تھا ستارا بھی کوئی خواب میں آ کر 

جگنو بھی کوئی رات کی چادر سے گرا تھا

دل کے احساس میں شامل ہے ضرورت اس کی

دل کے احساس میں شامل ہے ضرورت اس کی

میرے سینے میں دھڑکتی ہے محبت اس کی

آئینہ ہو کہ بھی میں دیکھ نہیں پاتا اسے 

آن کی آن بدل جاتی ہے صورت اس کی

میرے ہاتھوں سے یہ کشکول گرے تو مانو 

یوں تو مشہور ہے دنیا میں سخاوت اس کی

ہوا نہ مجھ سے کوئی ہمکلام گردش میں

ہُوا نہ مجھ سے کوئی ہم کلام گردش میں 

دھواں ہوۓ ہیں مِرے صبح و شام گردش میں

خیال و خواب ہوا ہر زمانۂ وحشت 

اتر چکے ہیں سبھی خوش خرام گردش میں

میں بھاگتا ہوں سرِ دشتِ کربلا اور پھر 

اضافہ کرتے ہیں آ کر امام گردش میں

خوشا کے وقت سے اذن سفر ملا ہے مجھے

خوشا کے وقت سے اذنِ سفر ملا ہے مجھے 

تمام شہر سرِ رہگزر ملا ہے مجھے

میں ڈھال سکتا ہوں ہر شے کو اپنے سانچے میں 

مِرے عزیز! بلا کا ہنر ملا ہے مجھے

یہ سوچتا ہوں مجھے کس طرح سے مل پاتا 

سکوں بھی وہ جو تجھے دیکھ کر ملا ہے مجھے

بنے ہیں دشت میں دیوار و در وغیرہ بھی

بنے ہیں دشت میں دیوار و در وغیرہ بھی

ہمارے ساتھ ہے زعمِ سفر وغیرہ بھی

مِرے مدار میں وہ خوف سے اتر نہ سکے 

خلا میں لٹکے ہیں شمس و قمر وغیرہ بھی

یہ کس ستارے سے آئی ہے منظروں میں چمک 

دمک اٹھے ہیں مِرے بام و در وغیرہ بھی

لفظوں میں اپنے اشک پرو کر دکھاؤں گا

لفظوں میں اپنے اشک پِرو کر دکھاؤں گا 

میں شاعری سے درد کے سانچے بناؤں گا

چہرے سے اپنے گردِ ماہ و سال ایک دن 

جھاڑوں گا، آئینے کا تمسخر اڑاؤں گا

ہر کیفیت سے لطف اٹھانا ہے شام تک 

رو کر لکھوں گا ہنس کے تِرے گیت گاؤں گا

وہ خواب ٹوٹ گیا سازشیں نئی ہوئی ہیں

وہ خواب ٹوٹ گیا سازشیں نئی ہوئی ہیں

شکستگی سے یہ آنکھیں شکستہ بھی ہوئی ہیں

احد کے لطف پہ موقوف ہے کرم کی نظر 

وضاحتیں تو بہت آدمی نے دی ہوئی ہیں

ہماری آنکھ سے اشجار نم شگفتہ ہوئے 

ہمارے خون سے یہ ٹہنیاں ہری ہوئی ہیں

یہ جو سائے ستا رہے تھے مجھے

یہ جو سائے ستا رہے تھے مجھے

کس لیے آزما رہے تھے مجھے

خود ہی منظر سے ہٹ گئے ہو تم 

راستے سے ہٹا رہے تھے مجھے

اپنے اندر جو جھانک کر دیکھا 

کتنے ہی درد کھا رہے تھے مجھے

لفظ بکھرے تو حقیقت کی طرف داری کی

لفظ بکھرے تو حقیقت کی طرفداری کی 

آئینہ توڑ دیا،۔۔۔۔ اور عزاداری کی

اے شب ہجر! گزر جا کہ دمِ رخصتِ خواب 

میری آنکھوں میں کھٹکتی ہے تیری تاریکی

دل نے بازارِ تمنا سے پری کی خاطر 

پھول ہی پھول چنے جب بھی خریداری کی

مجھے تو اب بھی یاد ہے گئے دنوں میں کیا ہوا

مجھے تو اب بھی یاد ہے گئے دنوں میں کیا ہوا 

وہ کشتیاں جلی ہوئیں، وہ قافلہ لٹا ہوا

فقیر کی دعا ہوں میں الست کی صدا ہوں میں 

سنو گے ایک دن مجھے لبوں پہ ہوں رکا ہوا

مثالِ وصل دی گئی زمیں کو فصل دی گئی 

اک اور نسل دی گئی بدن سے رابطہ ہوا