میں ڈھونڈنے نکلا تھا کبھی خاک میں دنیا

 میں ڈھونڈنے نکلا تھا کبھی خاک میں دنیا

گم ہوتی گئی وسعتِ افلاک میں دنیا

میں خاک ہوں ملتے ہیں سبھی میری حدوں سے

میں چاک ہوں گھومے مِری پیچاک میں دنیا

میں مانگنے والا نہیں درویش ہوں صاحب

مل جائے گی تم کو مِری پوشاک میں دنیا

میں اس کو بھگو کر ہی نہ رکھ دوں سرِ امکاں

آئے نہ مِرے دیدۂ نمناک میں دنیا

آتا ہے عذاب اس کا دبے پاؤں زمیں پر

ملتی ہے اچانک خس و خاشاک میں دنیا

چمکے تھے کبھی ہست کے آثار فضا میں

رکھی تھی کہیں انفس و آفاق میں دنیا

ہاتھ اس کے لگا ہوں سو یہ تڑپائے گی مجھ کو

بیٹھی تھی ازل سے جو مِری تاک میں دنیا

پوچھا جو کسی نے کہ گماں کیا ہے فدا بول

میں چپ تھا کہ آئی مِرے ادراک میں دنیا

نوید فدا ستی