محبت کے سوا حرف و بیاں سے کچھ نہیں ہوتا

 محبت کے سوا حرف و بیاں سے کچھ نہیں ہوتا 

ہوا ساکن رہے تو بادباں سے کچھ نہیں ہوتا 

چلوں تو مصلحت یہ کہہ کے پاؤں تھام لیتی ہے 

وہاں جانا بھی کیا حاصل جہاں سے کچھ نہیں ہوتا 

ضرورت مند ہے صید افگنی مشاق ہاتھوں کی 

فقط یکجائی تیر و کماں سے کچھ نہیں ہوتا 

مسلسل بارشیں بھی سبزہ و گل لا نہیں سکتیں 

زمیں جب بے نمو ہو آسماں سے کچھ نہیں ہوتا 

خلا میں تیر اندازی سے کیا گلزار پاؤ گے 

میسر اس جنون رائیگاں سے کچھ نہیں ہوتا

گلزار بخاری