سورج ڈھلنے میں تھوڑی دیر باقی ہے

 سورج ڈھلنے میں تھوڑی دیر باقی ہے

ابھی چند ساعتوں کے بعد

شام کے سائے گزرگاہوں پر پھیلنے لگیں گے

اور ٹریفک کسی مریض کے دل کی طرح

خودبخود تیز ہوجائے گی

پرندے جب شام کو آشیانوں کی طرف لوٹتے ہیں 

وہ ایک لمحہ جو اب نہیں ہے

 اب

وہ ایک لمحہ جو اب نہیں ہے

گزر چکا ہے

وہ ایک لمحہ جو اب نہیں ہے

ہے آنے والا

گزر چکا ہے جو ایک لمحہ وہ میں نہیں ہوں

مجبوریوں کا پاس بھی کچھ تھا وفا کے ساتھ

 مجبوریوں کا پاس بھی کچھ تھا وفا کے ساتھ

وہ راستے سے پھِر گیا کچھ دور آ کے ساتھ

قُربِ بدن سے کم نہ ہوئے دل کے فاصلے

اک عمر کٹ گئی کسی نا آشنا کے ساتھ

ساتھ اسکے رہ سکے نہ بغیر اسکے رہ سکے

یہ ربط ہے چراغ کا کیسا ہوا کے ساتھ

بارہا شب کو یوں لگا ہے مجھے

 بارہا شب کو یوں لگا ہے مجھے

کوئی سایہ پکارتا ہے مجھے

جیسے یہ شہر کل نہیں ہو گا

جانے کیا وہم ہو گیا ہے مجھے

میں ستاروں کا ایک نغمہ ہوں

بیکراں رات نے سنا ہے مجھے

ہر چند ہم نے اپنی زباں سے کہا نہیں

 ہر چند ہم نے اپنی زباں سے کہا نہیں

وہ حال کون سا ہے جو تُو نے سنا نہیں

ایسا بھی اب نہیں ہے کہ نازِ صبا اٹھائیں

محفل میں دیکھتا ہے تو پہچانتا نہیں

یوں بھی ہزار روگ ہیں دل کو لگے ہوئے

پھر اس پہ یہ ملال کہ وہ پوچھتا نہیں

اسی کو ترک وفا کا گماں ستانے لگے

 اسی کو ترکِ وفا کا گماں ستانے لگے

جسے بھلاؤں تو کچھ اور یاد آنے لگے

اسے سنبھال کے رکھو، خزاں میں لَو دے گی

یہ خاکِ لالہ و گُل ہے، کہیں ٹھکانے لگے

تجھے میں اپنی محبت سے ہٹ کے دیکھ سکوں

یہاں تک آنے میں مجھ کو، کئی زمانے لگے

شب کو یہ سلسلہ ہے برسوں سے

شب کو یہ سلسلہ ہے برسوں سے

گھر کا گھر جاگتا ہے برسوں سے

جانے کیا ہے کہ اس ندی کے پار

اک دِیا جل رہا ہے برسوں سے

چلنے والے رکے رہیں کب تک

راستہ بن رہا ہے برسوں سے

نقش تو بنائے ہیں کچھ غزل کی صورت میں

نقش تو بنائے ہیں کچھ غزل کی صورت میں

یہ کتابِ فردا ہے، دیکھیے گا فرصت میں

خیر و شر کی خبروں کو مانتے تو سب ہی ہیں

کس کو ہوش رہتا ہے جبر اور ضرورت میں

دونوں درد دیتی ہیں آہِ سرد دیتی ہیں

فرق کچھ نہیں ایسا نفرت و محبت میں

دل حسن کو دان دے رہا ہوں

دل حسن کو دان دے رہا ہوں

گاہک کو دکان دے رہا ہوں

شاید کوئی بندۂ خدا آئے

صحرا میں اذان دے رہا ہوں

جو فصل ابھی کٹی نہیں ہے

میں اس کا لگان دے رہا ہوں

ٹھہر جاتے ہیں کہ آداب سفر جانتے ہیں

ٹھہر جاتے ہیں کہ آداب سفر جانتے ہیں

ورنہ منزل کو بھی ہم راہگزر جانتے ہیں

نامرادان محبت کو حقارت سے نہ دیکھ

یہ بڑے لوگ ہیں، جینے کا ہنر جانتے ہیں

شرط ویرانی سے واقف ہی نہیں شہر کے لوگ

در و دیوار بنا کر اسے گھر جانتے ہیں

زندگی موت کے پہلو میں بھلی لگتی ہے

زندگی موت کے پہلو میں بھلی لگتی ہے

گھاس اس قبر پہ کچھ اور ہری لگتی ہے

روز کاغذ پہ بناتا ہوں میں قدموں کے نقوش

کوئی چلتا نہیں، اور ہمسفری لگتی ہے

آنکھ مانوسِ تماشا نہیں ہونے پاتی

کیسی صورت ہے کہ ہر روز نئی لگتی ہے

ہماری زندگی سب کی گھٹائی جا رہی ہے

ہماری زندگی سب کی گھٹائی جا رہی ہے

دوا کے نام پہ مٹی کھلائی جا رہی ہے

سنو! یہ کس لیے اجلت میں مر رہے ہیں لوگ

یہ کائنات دوبارہ بنائی جا رہی ہے؟

یہ کیا نظام ہے جس میں حرام زادوں کو

حلال زادوں کے آدھی کمائی جا رہی ہے

عمر بھر کاوش اظہار نے سونے نہ دیا

 عمر بھر کاوشِ اظہار نے سونے نہ دیا

حرفِ نا گفتہ کے آزار نے سونے نہ دیا

دشت کی وسعت بے قید میں کیا نیند آتی

گھر کی قیدِ در و دیوار نے سونے نہ دیا

تھک کے سو رہنے کو رستے میں ٹھکانے تھے بہت

ہوسِ سایۂ دیوار نے سونے نہ دیا

وہ مرے دل کی روشنی وہ مرے داغ لے گئی

وہ مِرے دل کی روشنی، وہ میرے داغ لے گئی
ایسی چلی ہوائے شام، سارے چراغ لے گئی
شاخ و گُل و ثمر کی بات کون کرے، کہ ایک رات
بادِ شمال آئی تھی، باغ کا باغ لے گئی
وقت کی موجِ تُند رو آئی تھی، سُوئے مے کدہ
میری شراب پھینک کر میرے ایاغ لے گئی

عشق میں جس کے یہ احوال بنا رکھا ہے

عشق میں جس کے یہ احوال بنا رکھا ہے
اب وہی کہتا ہے اِس وضع میں کیا رکھا ہے
لے چلے ہو مجھے اس بزم میں یارو! لیکن
کچھ مِرا حال بھی پہلے سے سُنا رکھا ہے
حالِ دل کون سنائے اُسے، فُرصت کس کو
سب کو اُس آنکھ نے باتوں میں لگا رکھا ہے

دیکھنے کے لیے اک شرط ہے منظر ہونا

دیکھنے کے لیے اِک شرط ہے منظر ہونا
دوسری شرط ہے پھر آنکھ کا پتھر ہونا
وہیں دیوار اٹھا دی مِرے معماروں نے
گھر کے نقشے میں مقرر تھا جہاں در ہونا
مجھ کو دیکھا تو فلک زاد رفیقوں نے کہا
اس ستارے کا مقدر ہے زمیں پر ہونا

دلوں میں درد بھرتا آنکھ میں گوہر بناتا ہوں

دلوں میں درد بھرتا، آنکھ میں گوہر بناتا ہوں
جنہیں مائیں پہنتی ہیں میں وہ زیور بناتا ہوں
غنِیمِ وقت کے حملے کا مجھ کو خوف رہتا ہے
میں کاغذ کے سپاہی کاٹ کر لشکر بناتا ہوں
پرانی کشتیاں ہیں میرے ملاحوں کی قسمت میں
میں ان کے بادباں سِیتا ہوں اور لنگر بناتا ہوں

جانے کسی نے کیا کہا تیز ہوا کے شور میں

جانے کسی نے کیا کہا تیز ہوا کے شور میں
مجھ سے سُنا نہیں گیا تیز ہوا کے شور میں
 میں بھی تجھے نہ سُن سکا تُو بھی مجھے نہ سُن سکا
تجھ سے ہُوا مکالمہ، تیز ہوا کے شور میں
کشتیوں والے بے خبر بڑھتے رہے بھنور کی سمت
اور میں چیختا رہا تیز ہوا کے شور میں

ترک ان سے رسم و راہ و ملاقات ہو گئی

تَرک ان سے رسم و راہ و ملاقات ہو گئی
یوں مِل گئے کہیں تو کوئی بات ہو گئی
دل تھا اُداس عالمِ غُربت کی شام تھی
کیا وقت تھا کہ تم سے ملاقات ہو گئی
یہ دشتِ ہول خیز  یہ منزل کی دُھن یہ شوق
یہ بھی خبر نہیں کہ کہاں رات ہو گئی

دل کے اندر درد آنکھوں میں نمی بن جائیے

دل کے اندر درد آنکھوں میں نمی بن جائیے
اس طرح ملیے کہ جزوِ زندگی بن جائیے
اک پتنگے نے یہ اپنے رقص کے آخر میں کہا
روشنی کے ساتھ رہیے، روشنی بن جائیے
جس طرح دریا بجھا سکتا نہیں صحرا کی پیاس
اپنے اندر ایک ایسی تشنگی بن جائیے