آہ جاتی ہے فلک پر رحم لانے کے لیے

 عارفانہ کلام حمد نعت منقبت

آہ جاتی ہے فلک پر رحم لانے کے لیے

بادلو! ہٹ جاؤ دے دو راہ جانے کے لیے

اے دعا! ہاں عرض کر عرش الٰہی تھام کے

اے خدا! اب پھیر دے رخ گردشِ ایام کے

صلح تھی جن سے اب وہ بر سرِ پیکار ہیں

وقت اور تقدیر دونوں درپئے آزار ہیں

گھر سے جنگل کی طرف جب تیرا دیوانہ چلا

گھر سے جنگل کی طرف جب تیرا دیوانہ چلا

ساتھ میں روتا ہوا ہر اپنا بے گانہ چلا

پاؤں کے چھالوں سے کانٹوں کی بجھائی میں نے پیاس

آج جنگل میں بھی ساقی! دورِ پیمانہ چلا

پی رہے ہیں سب نگاہوں سے محبت کی شراب

جو تِری محفل میں آیا، بھر کے پیمانہ چلا

جائیں گے وہیں خوش دل دیوانہ جہاں ہو

جائیں گے وہیں، خوش دلِ دیوانہ جہاں ہو

گھر لیں گے وہیں اب کے پری خانہ جہاں ہو

پانی کے عوض مستیٔ رنگیں ہو برستی

پر اتنے ہی ٹکڑے پہ کہ مے خانہ جہاں ہو

پھر دیکھیۓ بد مستئ ارمانِ ہوس کار

فردوسِ نظر، نرگسِ مستانہ جہاں ہو

تا کجا شورش فریاد نہ آئے لب تک

تا کجا شورشِ فریاد نہ آئے لب تک

صبر اک شے ہے مگر پھر بھی کہاں تک، کب تک

جلوہ آنکھوں کو دکھاؤ گے یہ مانا میں نے

پر یہ روتا ہے کہ آنکھیں ہی نہ ہوں گی تب تک

رحم کر دردِ جگر! جان نکل جائے گی

یوں ہی آئے گا جو کھنچ کھنچ کے کلیجا لب تک

ہاں ساقی مستانہ بھر دے مرا پیمانہ

ہاں ساقئ مستانہ بھر دے مِرا پیمانہ

گھنگھور گھٹا ہے یا اڑتا ہوا مے خانہ

ہوتی ہیں شبِ غم میں یوں دل سے مِری باتیں

جس طرح سے سمجھائے دیوانے کو دیوانہ

کیا تم نے کہا دل سے، کیا دل نے کہا تم سے

بیٹھو تو سنائیں ہم اک روز یہ افسانہ

ہو چکے شکوے شکایت پھر خدا کے سامنے

ہو چکے شکوے شکایت پھر خدا کے سامنے

تم جو آ بیٹھو گے یوں ہی سر جھکا کے سامنے

وصل کی شب آسماں تاروں کے جامِ زرنگار

چاند کی کشتی میں لایا ہے لگا کے سامنے

کر رہے تھے غیر سے میری برائی آج وہ

کیا ہی جھینپے کی جو اک 'تسلیم' جا کے سامنے

یاد میں تیری جہاں کو بھولتا جاتا ہوں میں

یاد میں تیری جہاں کو بھولتا جاتا ہوں میں

بھولنے والے، کبھی تجھ کو بھی یاد آتا ہوں میں

اک دھندلا سا تصور ہے کہ دل بھی تھا یہاں

اب تو سینے میں فقط اک ٹیس سی پاتا ہوں میں

آرزؤں کا شباب اور مرگ حسرت ہائے ہائے

جب بہار آئی گلستاں میں تو مرجھاتا ہوں میں

غیر کی باتوں کا آخر اعتبار آ ہی گیا

غیر کی باتوں کا آخر اعتبار آ ہی گیا

میری جانب سے تِرے دل میں غبار آ ہی گیا

جانتا تھا کھا رہا ہے بے وفا جھوٹی قسم

سادگی دیکھو کہ پھر بھی اعتبار آ ہی گیا

پوچھنے والوں سے گو میں نے چھپایا دل کا راز

پھر بھی تیرا نام لب پر ایک بار آ ہی گیا

گاہ درد و رنج و غم ہے گاہ ارماں دل میں ہے

گاہ درد و رنج و غم ہے، گاہ ارماں دل میں ہے

ایک جانِ زار سو سو طرح کی مشکل میں ہے

چٹکیاں لینا،۔ مچل جانا،۔ بگڑنا،۔ روٹھنا

ہائے اک کم سِن کی کیا کیا یاد آتی دل میں ہے

اس قدر بے درد ہے دل تیرے کوچے میں صنم

جیسے اک ٹوٹا ہوا ساغر کسی محفل میں ہے

بتا نصیب کہ ہم بے وطن کدھر جائیں

بتا نصیب! کہ ہم بے وطن کدھر جائیں
یہی زمیں ہے، یہی آسماں جدھر جائیں
کوئ بتاۓ کہ گزرے ہوۓ خوشی کے دن
کہاں ملیں گے، انہیں ڈھونڈنے اگر جائیں
جگر میں داغ، کلیجے میں زخم، سر پر خاک
شکستہ حال کہاں لے کے چشمِ تر جائیں

چوری کہیں کھلے نہ نسیم بہار کی

چوری کہیں کھلے نہ نسیمِ بہار کی

خوشبو اڑا کے لائی ہے گیسوئے یار کی

جرأت تو دیکھئے گا نسیمِ بہار کی

یہ بھی بلائیں لینے لگی زلفِ یار کی

اللہ رکھے اس کا سلامت غرورِ حسن

آنکھوں کو جس نے دی ہے سزا انتظار کی

سوئے مے کدہ نہ جاتے تو کچھ اور بات ہوتی

سُوئے میکدہ نہ جاتے تو کچھ اور بات ہوتی
وہ نگاہ سے مے پلاتے تو کچھ اور بات ہوتی
گو ہوائے گلستاں نے میرے دل کی لاج رکھ لی
وہ نقاب خود اٹھاتے تو کچھ اور بات ہوتی
یہ بجا کہ کلی نے کھِل کر کیا گلستان مُعطر
مگر آپ مسکراتے تو کچھ اور بات ہوتی

تم اور فریب کھاؤ بیان رقیب سے

تم اور فریب کھاؤ بیانِ رقیب سے
تم سے تو کم گِلہ ہے زیادہ نصیب سے
گویا تمہاری یاد ہی میرا علاج ہے
ہوتا ہے پہروں ذکر تمہارا طبیب سے
برباد دل کا آخری سرمایہ تھی، امید
وہ بھی تو تم نے چھین لیا مجھ غریب سے

درس خودداری

درسِ خودداری

یقین ان کی عنایت کا زینہار نہ کر
بہشت بھی جو یہ بت دیں تو اعتبار نہ کر
ہر ایک اشک تماشائے صد گلستان ہے
امیدِ عیش کو شرمندۂ بہار نہ کر
وہ مرگِ عشق کی لذت سے آشنا ہی نہیں
دعائے خضرؑ پہ آمین بار بار نہ کر