رنگ اردو دنیا بھر کے نامور کلاسیک اور نوجوان اردو شعراء کے شاہکار کلام پر مبنی بلاگ🌷Rung E Urdu a blog of worldsfamous poetry of past & present era
آبجُو سے اُٹھی بھاپ میں آنکھ کا پھُول جلتا رہا
اک رہٹ سے مِرے خواب بہتے رہے اور میں چلتا رہا
میں نے دیکھے اندھیرے میں ڈُوبے ہوئے پھُول کِھلتے ہوئے
خواب کا ذائقہ میرے اندر ہی اندر پِگھلتا رہا
پتہ پتہ گِرا خاک پر رات تنہائی سے اٹ گئی
کروٹوں پر نئی کروٹیں کھیت میں ہل بدلتا رہا
رہے گا کب تک یہ رقص بے جان پتھروں پر
کوئی گِرائے عمود حیرت کے دائروں پر
مِرے لیے عرش پر کوئی جال بُن رہا ہے
بہت سی آنکھیں لگی ہوئی ہیں مِرے پروں پر
کھلی ہوئی کھڑکیوں سے رستے لٹک رہے تھے
ہمارے پہرے کہ بس جمے رہ گئے دروں پر
تو کیا سرہانے نیا کوئی قہقہہ اگا ہے
جو دکھ اچانک ہی پائنتی سے لگا کھڑا ہے
زمین پایوں سے کھاٹ کے چڑھ رہی ہے ایسے
کہ جیسے سارا فلک مجھی پر جھکا ہوا ہے
عصا کو دیمک نگل رہی ہے میں جان بیٹھا
کمر سے پہلے ہی حوصلہ ٹوٹنے لگا ہے
رکی ہوئی موج ہے کہ تیراک رک گئے ہیں
لہو کے طوفان زیرِ پوشاک رک گئے ہیں
تمام معروض میری آنکھوں میں گندھ گئے تھے
مگر اچانک شعور کے چاک رک گئے ہیں
یہ اونچے اونچے پہاڑ جیسے زمیں کے جوہر
بس ایک لمحے کو ہو کے بے باک رک گئے ہیں
رُخِ سیاہ سنوارا نہیں گیا مجھ سے
چمکتے دن بھی ستارا نہیں گیا مجھ سے
دُعا کو ہاتھ بھی تھے اور فلک قریب بھی تھا
میں رو دیا کہ پُکارا نہیں گیا مجھ سے
میں زندگی سے فقط ایک دن ہی چاہتا تھا
وہ ایک دن بھی گُزارا نہیں گیا مجھ سے
