نہ ذکر آشنا نے قصۂ بیگانہ رکھتے ہیں

 نہ ذِکرِ آشنا نے قصۂ بے گانہ رکھتے ہیں

حدیثِ یار رکھتے ہیں یہی افسانہ رکھتے ہیں

چمن میں سرو قد گر جلوۂ مستانہ رکھتے ہیں

برنگِ طوقِ قمری ہم خطِ پیمانہ رکھتے ہیں

نہ اُلجھو اس قدر بے وجہ سُلجھانے میں زُلفوں کے

دلِ صد چاک تو ہم بھی برنگِ شانہ رکھتے ہیں

نِگہ ٹک ابرُو و چشمِ بُتاں پر کیجیو زاہد

کہ یہ مُحرابِ مسجد کے تلے میخانہ رکھتے ہیں  

کریں گے بیعتِ دستِ سبُو پیرِ مغاں تجھ سے

کہ شوقِ شرب مے ہے مشربِ رِندانہ رکھتے ہیں

نصیر اس شوخ سے کہنا کہ پیشِ چشمِ حیرت میں

تصوّر روز و شب تیرا ہم اے جانانہ رکھتے ہیں

شاہ نصیر دہلوی