در و دیوار کا بدلا ہوا حلیہ لکھیں

 در و دیوار کا بدلا ہوا حلیہ لکھیں

اس حویلی کا کوئی دوسرا نقشہ لکھیں

نہ کنیزوں کا وہ جھرمٹ نہ بہی خواہوں کا

دل کی مانند محل کو بھی اکیلا لکھیں

پار جو ہم نے کیا آگ کا دریا وہ تھا

زندگی اب تجھے بیتا ہوا لمحہ لکھیں

وفا میں پیکر ایثار بننا کتنا مشکل ہے

 وفا میں پیکر ایثار بننا کتنا مشکل ہے

کسی کے پیار کا حقدار بننا کتنا مشکل ہے

مسائل ہر قبیلے کے سمجھ لینا تو ہے آساں

قبیلے کا مگر سردار بننا کتنا مشکل ہے

تصادم ہے یہاں باہم مفادات خصوصی ہیں

یہاں پر غیر جانبدار بننا کتنا مشکل ہے

کہیں بہار کہیں خار زار کی صورت

 کہیں بہار، کہیں خار زار کی صُورت

جدھر بھی دیکھو وہی انتظار کی صورت

جسے بھی دیکھو مسائل کی بِھیڑ میں گُم ہے

ہر اک جبیں ہے کسی اشتہار کی صورت

ہتھیلیوں پہ نمایاں ہے جبر کی تحریر

اسی کو کہتے ہیں کیا اختیار کی صورت

حیات درد مسلسل بھی انتشار بھی ہے

حیات دردِ مُسلسل بھی، اِنتشار بھی ہے

قرار ڈھونڈنے والو! کہیں قرار بھی ہے؟

شمیم گُل سے سُلگتا ہے دامنِ احساس

کہ تیری نکہتِ پوشاک شعلہ بار بھی ہے

زمانہ خُود نظر آتا نہیں زمانے کو

کہ دل کا آئینہ آلودۂ غُبار بھی ہے

اچھے اچھے پیارے پیارے لفظ یہ سارے آپ کے نام

 خوشبو پھول صبا اور شبنم دل کی دھڑکن تاج محل

اچھے اچھے پیارے پیارے لفظ یہ سارے آپ کے نام

آپ کی دل کش قربت پا کر جاگ اٹھی ان کی تقدیر

رنگ برنگے پھولوں کے یہ جھلمل گجرے آپ کے نام

گلشن جاں کی پتی پتی موجِ نسیمِ عطر فشاں

رنگ بہاراں پھول شگوفے سب گلدستے آپ کے نام