بس اک نگاہ میں قصہ تمام ہوتا ہے

 بس اک نِگاہ میں قِصہ تمام ہوتا ہے

تو کیا یہ واقعی اتنا سا کام ہوتا ہے؟

کسی کے سرد رویے پہ خامشی کا لحاف

یہ انتقام بھی کیا انتقام ہوتا ہے

کبھی کبھی کوئی لقمہ کہیں کہیں کوئی کام

حلال ہوتے ہوئے بھی حرام ہوتا ہے

ہجر کی راہ کسی کے لیے آسان نہیں

 ہجر کی راہ کسی کے لیے آسان نہیں

منع کرتا ہوں تو ہو جایا کرو، جان نہیں

اب میں چپ چاپ یہی دیکھ رہا ہوتا ہوں

کون اس بزم میں کس بات پہ حیران نہیں

اس کو چھوڑا ہے بہت سوچ سمجھ کر میں نے

سو پریشان تو رہتا ہوں، پشیمان نہیں

عشق نے جب بھی کسی دل پہ حکومت کی ہے

 عشق نے جب بھی کسی دل پہ حکومت کی ہے

تو اسے درد کی معراج عنایت کی ہے 

اپنی تائید پہ خود عقل بھی حیران ہوئی 

دل نے ایسے مِرے خوابوں کی حمایت کی ہے

شہرِ احساس تِری یاد سے روشن کر کے

میں نے ہر گھر میں تِرے ذکر کی جرأت کی ہے

مولا کسی کو ایسا مقدر نہ دیجیو

 مولا! کسی کو ایسا مقدر نہ دیجیو

دلبر نہیں تو پھر کوئی دیگر نہ دیجیو

اپنے سوال سہل نہ لگنے لگیں اسے 

آتے بھی ہوں جواب تو فر فر نہ دیجیو

چادر وہ دیجیو اسے جس پر شکن نہ آئے 

جس پر شکن نہ آئے وہ بستر نہ دیجیو

کیسی آسودگی جب تلک مر نہیں دیکھتے

 کیسی آسودگی جب تلک مر نہیں دیکھتے

جن کے پیشِ نظر عشق ہو، سر نہیں دیکھتے

جیسے میں دیکھتا ہوں جو مجھ کو دکھائی نہ دے

آپ کیوں اپنے من چاہے منظر نہیں دیکھتے

اور تو ایسی کوئی شکایت نہیں ہے، مگر

آپ میری جگہ خود کو رکھ کر نہیں دیکھتے

میں نے چاہا تو نہیں تھا کہ کبھی ایسا ہو

 میں نے چاہا تو نہیں تھا کہ کبھی ایسا ہو

لیکن اب ٹھان چکے ہو تو چلو اچھا ہو

ہم تو یہ بھی نہیں کہتے کہ ہمیں کیا مطلب

اس کو ہوتا ہے کوئی غم تو بھلے ہوتا ہو

تم سے ناراض تو میں اور کسی بات پہ ہوں

تم مگر اور کسی وجہ سے شرمندہ ہو

درگزر جتنا کیا ہے وہی کافی ہے مجھے

درگزر جتنا کِیا ہے وہی کافی ہے مجھے

اب تجھے قتل بھی کر دوں تو معافی ہے مجھے

مسئلہ ایسے کوئی حل تو نہ ہو گا شاید

شعر کہنا ہی مگر غم کی تلافی ہے مجھے

دفعتاً اک نئے احساس نے چونکا سا دیا 

میں تو سمجھا تھا کہ ہر سانس اضافی ہے مجھے

آپ جیسوں کے لیے اس میں رکھا کچھ بھی نہیں

آپ جیسوں کے لیے اس میں رکھا کچھ بھی نہیں

لیکن ایسا تو نہ کہیے کہ "وفا" کچھ بھی نہیں

آپ کہیے تو نبھاتے چلے جائیں گے، مگر

اس تعلق میں اذیت کے سِوا کچھ بھی نہیں

میں کسی طرح بھی سمجھوتہ نہیں کر سکتا

یا تو سب کچھ ہی مجھے چاہیے یا کچھ بھی نہیں

کہاں ہٹتا ہے نگاہوں سے ہٹائے ہائے

کہاں ہٹتا ہے نگاہوں سے ہٹائے، ہائے 

وہی منظر کہ جسے دیکھ نہ پائے، ہائے 

کیا پتہ ساری تمنائیں دھواں ہو گئی ہوں

کچھ نکلتا ہی نہیں دل سے سوائے، ہائے 

یاد آتی ہوئی اک شکل پہ اللہ، اللہ 

دل میں اٹھتی ہوئی ہر ٹِیس پہ ہائے، ہائے 

جو بھی جینے کے سلسلے کیے تھے

جو بھی جینے کے سلسلے کیے تھے

ہم نے بس آپ کے لیے کیے تھے

تب کہیں جا کے اپنی مرضی کی

پہلے اپنوں سے مشورے کیے تھے

کبھی، اس کی نِگہ میسر تھی

کیسے کیسے مشاہدے کیے تھے

مرے حواس پہ حاوی رہی کوئی کوئی بات

مِرے حواس پہ حاوی رہی کوئی کوئی بات

کہ زندگی سے سوا خاص تھی کوئی کوئی بات

یہ اور بات، کہ محسوس تک نہ ہونے دوں

جکڑ سی لیتی ہے دل کو تِری کوئی کوئی بات

خوشی ہوئی، کہ ملاقات رائیگاں نہ گئی

اسے بھی میری طرح یاد تھی کوئی کوئی بات

کوئی اتنا پیارا کیسے ہو سکتا ہے

کوئی اتنا پیارا کیسے ہو سکتا ہے

پھر سارے کا سارا کیسے ہو سکتا ہے 

تجھ سے جب مل کر بھی اداسی کم نہیں ہوتی

تیرے بغیر گزارا کیسے ہو سکتا ہے

کیسے کسی کی یاد ہمیں زندہ رکھتی ہے

ایک خیال سہارا کیسے ہو سکتا ہے

نہیں کہ پند و نصیحت کا قحط پڑ گیا ہے

نہیں کہ پند و نصیحت کا قحط پڑ گیا ہے

ہماری بات میں برکت کا قحط پڑ گیا ہے

تو پھر یہ ردِ مناجات کی نحوست کیوں

کبھی سنا کہ عبادت کا قحط پڑ گیا ہے

ملال یہ ہے کہ اس پر کوئی ملول نہیں

ہمارے شہر میں حیرت کا قحط پڑ گیا ہے

عرض الم بہ طرز تماشا بھی چاہیے

عرضِ الم بہ طرزِ تماشا بھی چاہیے

دنیا کو حال ہی نہیں حلیہ بھی چاہیے

دل یہ بھی چاہتا ہے کہ سب کچھ بیان ہو

اندر کی بات کا اِسے پردہ بھی چاہیے

اے دل! کسی بھی طرح مجھے دستیاب کر

جتنا بھی چاہیے اسے جیسا بھی چاہیے

نہیں ایسا بھی کہ یکسر نہیں رہنے والا

نہیں ایسا بھی کہ یکسر نہیں رہنے والا

دل میں یہ شور برابر نہیں رہنے والا

جس طرح خامشی لفظوں میں ڈھلی جاتی ہے

اس میں تاثیر کا عنصر نہیں رہنے والا

اب یہ کس شکل میں ظاہر ہو خدا ہی جانے

رنج ایسا ہے کہ اندر نہیں رہنے والا

ایک تصویر کہ اول نہیں دیکھی جاتی

ایک تصویر کہ اول نہیں دیکھی جاتی 

دیکھ بھی لوں تو مسلسل نہیں دیکھی جاتی 

دیکھی جاتی ہے محبت میں ہر اک جنبشِ دل 

صرف سانسوں کی ریہرسل نہیں دیکھی جاتی 

اک تو ویسے بڑی تاریک ہے خواہش نگری 

پھر طویل اتنی کہ پیدل نہیں دیکھی جاتی 

ٹوٹنے پر کوئی آئے تو پھر ایسا ٹوٹے

ٹوٹنے پر کوئی آئے تو پھر ایسا ٹوٹے

کہ جسے دیکھ کے ہر دیکھنے والا ٹوٹے

تُو اسے کس کے بھروسے پہ نہیں کات رہی 

چرخ کو دیکھنے والی! تِرا چرخہ ٹوٹے 

اپنے بکھرے ہوئے ٹکڑوں کو سمیٹے کب تک 

ایک انسان کی خاطر کوئی کتنا ٹوٹے 

یہ وہم جانے میرے دل سے کیوں نکل نہیں رہا

یہ وہم جانے میرے دل سے کیوں نکل نہیں رہا

کہ اس کا بھی مِری طرح سے جی سنبھل نہیں رہا

کوئی ورق دکھا جو اشکِ خوں سے تر بتر نہ ہو 

کوئی غزل دکھا جہاں وہ داغ جل نہیں رہا 

میں ایک ہجرِ بے مراد جھیلتا ہوں رات دن 

جو ایسے صبر کی طرح ہے جس کا پھل نہیں رہا