صبح طرب کو کون پکارے ہم کو ہے غم کی شام بہت

 صبحِ طرب کو کون پکارے ہم کو ہے غم کی شام بہت

پہروں پہروں جب دل تڑپے، ملتا ہے آرام بہت 

صبحِ وصل اور صبحِ مسرت سب کے لیے کب ہوتی ہے

ہم سے غم کے ماروں کو ہے مے خانے کی شام بہت 

زخم ملے اور خنجر بھی کچھ خار و سنگ و نشتر بھی

ہم نے یارو شہرِ وفا میں پائے ہیں انعام بہت 

جو تبسموں سے ہو گل فشاں وہی لب ہنسی کو ترس گئے

جو تبسموں سے ہو گلفشاں وہی لب ہنسی کو ترس گئے 

ہمیں شہریار حیات تھے، ہمیں زندگی کو ترس گئے 

یہ عجیب صبح بہار ہے، کوئی زندگی کی کرن نہیں 

ہمیں خالقِ مہ و مہر ہیں، ہمیں روشنی کو ترس گئے

یہ چمن ہے کیسا چمن جہاں تہی دامنی ہی نصیب ہے

یہ بہار کیسی بہار ہے؟، کہ کلی کلی کو ترس گئے

کبھی نغمہ غم آرزو کبھی زندگی کی پکار ہم

کبھی نغمۂ غمِ آرزو کبھی زندگی کی پکار ہم 

کبھی خاک کوچۂ یار ہم کبھی شہریارِ بہار ہم

کبھی چل پڑے تِری راہ میں تو حدِ جنوں سے گزر گئے 

تِرے انتظار میں ہو گئے کبھی نقش رہگزار ہم

ہمیں کشتگان حیات سے ہیں جنون عشق کی عظمتیں 

کبھی ہنس پڑے تہِ تیغ ہم کبھی جھوم اٹھے سرِ دار ہم

کہاں سے آ گیا کہاں یہ شام بھی کہاں ہوئی

کہاں سے آ گیا کہاں، یہ شام بھی کہاں ہوئی 

نہ ہم نفس نہ ہم زباں، یہ شام بھی کہاں ہوئی 

بجھی نظر، بجھے قدم، نہ راہبر، نہ ہمسفر 

نہ رہگزر نہ کارواں، یہ شام بھی کہاں ہوئی 

نہ شمعِ دل نہ شمعِ رُخ، نجومِ شب نہ ماہِ شب 

نگاہ و دل دھواں دھواں، یہ شام بھی کہاں ہوئی 

کیا یونہی حریف رسن و دار ہوئے ہیں

کیا یونہی حریفِ رسن و دار ہوئے ہیں

دیوانہ ہوئے، تب کہیں ہشیار ہوئے ہیں

ہستی کو نکھارا ہے مِری آتشِ غم نے

شعلوں پہ جو سوئے ہیں تو بیدار ہوئے ہیں

موقوف نہیں زندہ دلی صحنِ چمن پر

ہم دشت و بیاباں میں بھی گلبار ہوئے ہیں

انصاف کے قانون کا کیا خوب چلن ہے

انصاف کے قانون کا کیا خوب چلن ہے

اس دور میں جینے کی سزا دار و رسن ہے

افلاس کے مارے ہوئے انساں ہیں کہ لاشیں

ہر لاش پہ ارمانوں کے سائے کا کفن ہے

یہ جان کے ہر جورِ زمانہ ہے گورا

شاید غمِ دوراں تِرے ماتھے کی شکن ہے