عشق مجبور فغاں اے دل ناشاد نہیں

 عشق مجبورِ فغاں اے دلِ ناشاد نہیں

یہ تو اک حسن کی تائید ہے فریاد نہیں

لذتِ بے خودئ دید کی روداد نہ پوچھ

اک فسانہ ہے جو کچھ یاد ہے کچھ یاد نہیں

ایک پابندِ وفا،۔ ایک جفا کا پابند

عشق مجبور سہی حسن بھی آزاد نہیں

شراب و شیشہ و ساغر سبو و پیمانہ

 شراب و شیشہ و ساغر سبو و پیمانہ

فدائے نیم نگاہی تمام مے خانہ

قدم قدم پہ مشیت نے پاؤں چومے ہیں

یہ کس مقام سے گزرا ہے تیرا دیوانہ

کبھی کبھی تو حرم کیا ہے بت کدہ کیا ہے

میں تیرے در سے بھی گزرا ہوں بے نیازانہ

خودی کی فطرت زریں کے رازہائے دروں

 خودی کی فطرت زریں کے رازہائے دروں

ادا شناس حقیقت ملے کوئی تو کہوں

خودی اگر ہے تو ہیں سرخرو حیات و ممات

خودی نہیں تو حیات و ممات خوار و زبوں

خودی وہ چیز ہے ناداں کہ جس کے بدلے میں

ملے جو دولتِ کونین بھی مجھے تو نہ لوں

سلجھے نہ کبھی آج تک اسرار من و تو

 سلجھے نہ کبھی آج تک اسرار من و تو

الجھے ہی رہے فطرت ادراک کے گیسو

واقف ابھی اس رمز حقیقت سے نہیں تو

اللہ کا بندہ نہ مسلماں ہے، نہ ہندو

معراجِ خودی ہے تِری پرواز پہ موقوف

تو چاہے تو خود عرش بنے تکیہ زانو

کس قیامت کا ہے بازار ترے کوچے میں

 کس قیامت کا ہے بازار تِرے کوچے میں

بکنے آتے ہیں خریدار ترے کوچے میں

تُو وہ عیسیٰ ہے کہ اے نبض شناسِ کونین

ابنِ مریم بھی ہے بیمار ترے کوچے میں

اذنِ دیدار تو ہے عام، مگر کیا کہیے

چشمِ بِینا بھی ہے بے کار ترے کوچے میں

ازل کے دن جنہیں دیکھا تھا بزم حسن پنہاں میں

 ازل کے دن جنہیں دیکھا تھا بزم حسن پنہاں میں

سمٹ آئیں وہی رعنائیاں تصویر جاناں میں

مِرا ذوق نظر اب اس مقام عاشقی پر ہے

جہاں الجھا ہوا ہے حسن بھی خواب پریشاں میں

بڑھا دے کاش کوئی وسعتیں انوار معنی کی

مجھے ترمیم کرنا ہے مذاق چشم حیراں میں