کس نے دیکھی ہے بہاروں میں خزاں میرے سوا

 کس نے دیکھی ہے بہاروں میں خزاں میرے سوا

کون کر سکتا ہے یہ قصہ بیاں میرے سوا

کس کو معلوم ہے صحرا کی ہواؤں کا مزاج

ریت پر کون بنائے گا مکاں میرے سوا

سب فقیرانِ شبِ ہجر وطن چھوڑ گئے

کون اب دے گا بیاباں میں اذاں میرے سوا

محفل میں امیدوں کا گزر ہے بھی نہیں بھی

محفل میں امیدوں کا گزر ہے بھی نہیں بھی

دھرتی پہ ستاروں کی نظر ہے بھی نہیں بھی

اک بات ابھی رات کے پردے میں پڑی ہے

اک شخص طلبگار سحر ہے بھی نہیں بھی

اک آگ جلی رہتی ہے اک آگ بجھی سی

یارو مِرے سینے میں جگر ہے بھی نہیں بھی

بند کمرے کے سبھی کردار چپ تھے

آئینہ

بند کمرے کے سبھی کردار چپ تھے

اک پرانی میز تھی دو کرسیاں تھیں

جن پہ کچھ بوسیدہ کاغذ رہ گئے تھے

آتے جاتے موسموں کا عینی شاہد

کھردری دیوار پر اک آئینہ تھا

آئینے کے سامنے کچھ دیر تھا میں

آئینہ مجھ پر ہنسا، میں آئینے پر

ریت پر اک نشان ہے شاید

ریت پر اک نشان ہے شاید 

یہ ہمارا مکان ہے شاید 

شور کے بیچ سو رہی ہے زمیں 

مدتوں کی تھکان ہے شاید 

درد کا اشتہار چسپاں ہے 

زندگی کی دُکان ہے شاید 

ہونٹ کی مہر ہیں ہم پاؤں کی زنجیر ہیں ہم

ہونٹ کی مہر ہیں ہم پاؤں کی زنجیر ہیں ہم

زندگی دیکھ تِرے خواب کی تعبیر ہیں ہم

زینتِ گنبد و محراب نہ ہم روحِ کتاب

سنگِ مینار کی مٹتی ہوئی تحریر ہیں ہم

ہم شرافت ہیں، ہمیں کون سراہے گا اب

اپنے اجداد کی ہاری ہوئی جاگیر ہیں ہم

اندھیرا کروٹ بدل رہا ہے

اندھیرا کروٹ بدل رہا ہے

کہیں تو سورج نکل رہا ہے

سمٹ رہا ہے بدن میں سایہ

چراغ چپ چاپ جل رہا ہے

ڈری ڈری سی ہے کوئی خواہش

خیال کچھ کچھ سنبھل رہا ہے

رفو کریں گے گماں کا دامن ہر ایک شک کو یقیں لکھیں گے

رفو کریں گے گماں کا دامن ہر ایک شک کو یقیں لکھیں گے

جہاں جہاں پر فلک لکھا ہے وہاں وہاں ہم زمیں لکھیں گے

زمانہ تب بھی یزید کا تھا،۔ زمانہ اب بھی یزید کا ہے

پہ ہم بھی ٹھہرے حسینؑ والے نہیں لکھا تھا نہیں لکھیں گے

تِری گلی سے گزر رہے تھے تو دل میں کیا کیا نہ بات آئی

کبھی یہ سوچا کہاں لکھیں گے کبھی یہ سوچا یہیں لکھیں گے

دل پہ یادوں کی ہے قائم حکمرانی ان دنوں

دل پہ یادوں کی ہے قائم حکمرانی ان دنوں

خود پہ نازاں ہے کھنڈر کی ہر نشانی ان دنوں

عاشقی نے لکھ دیا ہے سارا صحرا میرے نام

ہے جنوں کی خوب مجھ پر مہربانی ان دنوں

موسموں نے کر دیا ہے سارے زخموں کو ہرا

بڑھ گئی ہے غمکدے کی شادمانی ان دنوں

کہیں پہ یاد جواں ہے، کہیں نہیں بھی ہے

کہیں پہ یاد جواں ہے، کہیں نہیں بھی ہے

کہیں پہ رقص میں جاں ہے، کہیں نہیں بھی ہے

یہ ساری راکھ، کبھی بستیاں رہی ہوں گی

کہیں کہیں پہ نشاں ہے، کہیں نہیں بھی ہے

تپش بڑھی تو ندی بھی سِمٹ گئی جیسے

کہیں پہ آب رواں ہے، کہیں نہیں بھی ہے

ذرا سی آنکھ لگی تھی کہ خواب جاگ گئے

ذرا سی آنکھ لگی تھی کہ خواب جاگ گئے

نشیلی رات میں خانہ خراب جاگ گئے

نگاہِ ناز، مِری سمت اٹھ گئی تھی ذرا

ہتھیلیوں پہ مِری ماہتاب جاگ گئے

نکلتی جاتی ہے تصویر آئینے سے کئی

مجھ ہی میں جیسے کئی انقلاب جاگ گئے

بیاباں کو پشیمانی بہت ہے

بیاباں کو پشیمانی بہت ہے

کہ شہروں میں بیابانی بہت ہے

مِرے ہنسنے پہ دنیا چونک اٹھی

مجھے بھی خود پہ حیرانی بہت ہے

چلو صحرا کو بھی اب آزمائیں

سنا تھا گھر میں آسانی بہت ہے