کوئی راز نہیں کوئی بھید نہیں سب ظاہر ہے تو چھپائیں کیا

 کوئی راز نہیں کوئی بھید نہیں سب ظاہر ہے تو چھپائیں کیا

تم ضد پہ اڑے تم شک میں پڑے تم خود ہی کہو بتلائیں کیا

کوئی کرب نہیں کوئی درد نہیں چہرہ بھی ہمارا زرد نہیں

جب دل میں نہ اٹھے ٹیس کوئی پھر سچا شعر سنائیں کیا

ہم دل کو کیا ناشاد کریں کیا وقت اپنا برباد کریں

بے وجہ تمہیں کیا یاد کریں آنکھوں کو خون رلائیں کیا

وفاداری کا دعویٰ کر رہے ہو

 وفاداری کا دعویٰ کر رہے ہو

تو کیوں دنیا کی پروا کر رہے ہو

سمجھتے بھی ہو خوابوں کی حقیقت

مگر خوابوں کا پیچھا کر رہے ہو

اسی سے تم جھگڑتے بھی ہو ہر پل

اسی کی ہی تمنا کر رہے ہو

سنبھل سنبھل کے یہاں زندگی بسر کی ہے

 سنبھل سنبھل کے یہاں زندگی بسر کی ہے

بڑی طویل کہانی تھی مختصر کی ہے

تو مجھ کو خاک سمجھتا ہے خاک سمجھا کر

مگر یہ دیکھ کہ یہ خاک کس کے در کی ہے

وہ جس کی چھاؤں میں آنے سے جسم جل جائے

تِری مثال تو اے دوست! اس شجر کی ہے

وہی زمانہ وہی ماہ و سال اوڑھے ہیں

 وہی زمانہ وہی ماہ و سال اوڑھے ہیں

بہت دنوں سے تمہارا خیال اوڑھے ہیں

شعاع مہر نے مجھ سے کہا بہ وقت شام

عروج والے یہاں سب زوال اوڑھے ہیں

ادب سے بیٹھیے آ کر کے ہم فقیروں میں

یہاں کے ٹاٹ نشیں سب کمال اوڑھے ہیں

عجب ہوا کہ پرندے اڑان بھول گئے

عجب ہوا کہ پرندے اُڑان بھُول گئے

زمیں پہ رہنے لگے آسمان بھول گئے

ضرورتوں نے کچھ ایسا بنا دیا پاگل

ہم اپنا نام و نسب، خاندان بھول گئے

جب اس نے چاند ہتھیلی سے چھُو دیا مجھ کو

سفر کی جو بھی تھی ساری تکان بھول گئے