مرے خدایا بروز محشر مرا بھی تجھ سے سوال ہو گا

 مِرے خدایا بروزِ محشر مِرا بھی تجھ سے سوال ہو گا

کبھی تو آ کر ملوں گا تجھ سے، کبھی تو آخر وِصال ہو گا

ہے جس طرح کی گُھٹن یہاں پر کہ بس خدا کا ہی آسرا ہے

میں مر گیا تو یہ حکمِ ربی،۔ میں بچ گیا تو کمال ہو گا

میں چاہتا تھا پلٹ کے دیکھے تو اس کی آنکھیں بھی نم سی دیکھوں

میں سوچتا تھا کہ وقتِ رخصت اسے بھی تھوڑا ملال ہو گا

بے چراغ گھوموں میں راستہ نہیں ملتا

 بے چراغ گھوموں میں راستہ نہیں ملتا

کوئی بھی تسلی کا آسرا نہیں ملتا

گفتگو نہ کر پائے حال ہی سمجھ جائے

آدمی کوئی ایسا دوسرا نہیں ملتا

منزلیں الگ ان کی لوگ بھی جدا مجھ سے

میں بچھڑ گیا جس سے قافلہ نہیں ملتا

دیکھو ہماری آنکھ میں ویسی چمک نہیں

 دیکھو ہماری آنکھ میں ویسی چمک نہیں

دیکھو ہمارا رنگ بھی ویسا نہیں رہا

آنکھوں سے خوش گمانی کی پٹی اتر چکی

اب صاف دیکھتا ہوں میں اندھا نہیں رہا

اپنے بہت سے یار تھے جانے کہاں گئے

جب سے ہمارے ہاتھ میں پیسہ نہیں رہا

میں چاند تاروں کی ضوفشانی کا کیا کروں گا

 میں چاند تاروں کی ضوفشانی کا کیا کروں گا

بغیر تیرے میں زندگانی کا کیا کروں گا 

وہ بے دلی ہے کہ کوئی خواہش نہ کوئی ارماں 

میں سوچتا ہوں کہ اِس جوانی کا کیا کروں گا

میں جانتا ہوں کہ ساتھ تیرا کہاں تلک ہے

مجھے پتہ ہے میں اس کہانی کا کیا کروں گا

نہ خود سے ہم نکل سکے تو دائروں میں مر گئے

 نہ خود سے ہم نکل سکے تو دائروں میں مر گئے

یہ دیکھ کر ہے دُکھ ہوا کہ آئینوں میں مر گئے

کہیں کسی کی یاد میں چراغ روز و شب جلے

کہیں دِیے پڑے پڑے ہی طاقچوں میں مر گئے

بس ایک لفظ زندگی لکھا تھا پھر مِٹا دیا

اور اس طرح سے خود ہی اپنے کاغذوں میں مر گئے

خدا کا لاکھ شکر ہے کہ سب نہاں نہیں رہے

 خدا کا لاکھ شکر ہے کہ سب نہاں نہیں رہے

جو آستیں کے سانپ تھے وہ اب یہاں نہیں رہے

نہ پہلے جیسی سرکشی نہ دل میں کوئی خواہشیں

کبھی کبھی تو لگتا ہے کہ ہم جواں نہیں رہے

اور ایک دن ہم آپ کی یہ دنیا چھوڑ جائیں گے

خبر ملے گی آپ کو کہ؛ ہم یہاں نہیں رہے

یوں بے خبر ہوں حسرت دیدار کھینچ کر

 یوں بے خبر ہوں حسرتِ دیدار کھینچ کر

لایا گیا ہے مجھ کو سرِ دار کھینچ کر

نِکلا ہوں تیرے در سے میں ہر بار غمزدہ

پھر خود کو لے کے آیا میں ہر بار کھینچ کر

بیکار سا پڑا ہوں خود اپنی ہی ذات میں

اپنے ہی گِرد دائرہ بے کار کھینچ کر