محبت ہے اذیت ہے ہجوم یاس و حسرت ہے

 محبت ہے اذیت ہے ہجوم یاس و حسرت ہے

جوانی اور اتنی دکھ بھری کیسی قیامت ہے

وہ ماضی جو ہے اک مجموعہ اشکوں اور آہوں کا

نجانے مجھ کو اس ماضی سے کیوں اتنی محبت ہے

لب دریا مجھے لہروں سے یوں ہی چہل کرنے دو

کہ اب دل کو اسی اک شغل بے معنی میں راحت ہے

اپنی بہار پہ ہنسنے والو کتنے چمن خاشاک ہوئے

 اپنی بہار پہ ہنسنے والو کتنے چمن خاشاک ہوئے

اپنے رفُو کو گِننے والو! کتنے گریباں چاک ہوئے

دیوانوں کو کون بتائے آج کی رسم اور آج کی بات

اس نے انہیں کی سمت نظر کی عشق میں جو بے باک ہوئے

شعبدۂ یک طرزِ کرم ہے کیسی سزا اور کیسی جزا؟

موجِ تبسم جب لہرائی تر دامن بھی پاک ہوئے

محبت کرنے والوں کے بہار افروز سینوں میں

 محبت کرنے والوں کے بہار افروز سینوں میں

رہا کرتی ہے شادابی خزاں کے بھی مہینوں میں

ضیائے مہر آنکھوں میں ہے توبہ مہ جبینوں کے

کہ فطرت نے بھرا ہے حُسن خود اپنا حسینوں میں

ہوائے تُند ہے، گرداب ہے، پُر شور دھارا ہے

لیے جاتے ہیں ذوقِ عافیت سی شے سفینوں میں

خزاں میں آگ لگاؤ بہار کے دن ہیں

خزاں میں آگ لگاؤ، بہار کے دن ہیں 

نئے شگوفے کھلاؤ، بہار کے دن ہیں 

الٹ دو تختہ خزاں کی تباہ کاری کا 

بساطِ عیش بچھاؤ، بہار کے دن ہیں 

عذار گل کی دہک سے جلا کے کانٹوں کو 

لگی دلوں کی بجھاؤ، بہار کے دن ہیں 

ہر ایک پھول کے دامن میں خار کیسا ہے

ہر ایک پھول کے دامن میں خار کیسا ہے 

بتائے کون؟ کہ رنگِ بہار کیسا ہے ؟

وہ سامنے تھے تو دل کو سکوں نہ تھا حاصل 

چلے گئے ہیں تو اب بے قرار کیسا ہے

یقین تھا کہ نہ آۓ گا مجھ سے ملنے کوئی 

تو پھر یہ دل کو مِرے انتظار کیسا ہے 

مطرب دل کی وہ تانیں کیا ہوئیں

مطربِ دل کی وہ تانیں کیا ہوئیں

وہ تخیل کی اڑانیں کیا ہوئیں؟

کیا ہوۓ وہ ترچھی نظروں کے خدنگ

ابروؤں کی وہ کمانیں کیا ہوئیں؟

وہ ادائیں، جن پر ہوتی تھیں نثار

چاہنے والوں کی وہ جانیں کیا ہوئیں

اف یہ بد مست مے کدہ میرا

سینہ خوں سے بھرا ہوا میرا

اف یہ بد مست مے کدہ میرا

نارسائی پہ ناز ہے جس کو

ہائے وہ شوقِ نا رسا میرا

عشق کو منہ دکھاؤں گا کیونکر

ہجر میں رنگ اڑ گیا میرا

اپنی اجڑی ہوئی دنیا کی کہانی ہوں میں

اپنی اجڑی ہوئی دنیا کی کہانی ہوں میں

ایک بگڑی ہوئی تصویرِ جوانی ہوں میں

آگ بن کر جو کبھی دل میں نہاں رہتا تھا

آج دنیا میں اسی غم کی نشانی ہوں میں

ہائے، کیا قہر ہے مرحوم جوانی کی یاد

دل سے کہتی ہے کہ خنجر کی روانی ہوں میں

صاف ظاہر ہے نگاہوں سے کہ ہم مرتے ہیں

صاف ظاہر ہے نگاہوں سے کہ ہم مرتے ہیں

منہ سے کہتے ہوۓ یہ بات مگر ڈرتے ہیں

ایک تصویرِ محبت ہے جوانی گویا

جس میں رنگوں کے عوض خونِ جگر بھرتے ہیں

عشرتِ رفتہ نے جا کر نہ کِیا یاد ہمیں

عشرتِ رفتہ کو ہم یاد کِیا کرتے ہیں

دکھ محبت میں وہ پائے ہیں کہ جی جانتا ہے

دکھ محبت میں وہ پائے ہیں کہ جی جانتا ہے
اس قدر صدمے اٹھائے ہیں کہ جی جانتا ہے
یوں تو وہ ایک اچٹتی سی نظر تھی، لیکن
زخم اس طرح کے آئے ہیں کہ جی جانتا ہے
اب تو خاموش ہیں لیکن انہیں آنکھوں نے کبھی
ایسے طوفان ا ٹھائے ہیں کہ جی جانتا ہے

دل عجب انداز سے لہرا گیا

پھول سونگھے، جانے کیا یاد آ گیا
دل عجب انداز سے لہرا گیا
اس سے پوچھے کوئی چاہت کے مزے
جس نے چاہا، اور جو چاہا گیا
ایک لمحہ بن کے عیشِ جاوداں
میری ساری زندگی پر چھا گیا

کوئی باتوں باتوں میں باوفا جو کہہ گیا

کوئی باتوں باتوں میں ’باوفا‘ جو کہہ گیا
میرا زخم خوردہ دل دھک سے ہو کے رہ گیا
ضبط اس لیے کیا تھا کہ ’راز‘ ہو نہ فاش
اب میں اس کو کیا کروں، دل میں درد رہ گیا
میری بے زبانیاں کام آ گئیں کہ میں
غم کی ساری داستان اک نظر میں کہہ گیا

غم زدہ ہیں مبتلائے درد ہیں ناشاد ہیں

غم زدہ ہیں مبتلائے درد ہیں ناشاد ہیں
ہم کسی افسانۂ غم ناک کے افراد ہیں
گردشِ افلاک کے ہاتھوں بہت برباد ہیں
ہم لبِ ایام پر اک دکھ بھری فریاد ہیں
زندگی میں سینکڑوں غم ہیں ہمارے واسطے
سینۂ پُر خوں ہے دنیا، ہم دلِ ناشاد ہیں

آرزو کو روح میں غم بن کے رہنا آ گیا

آرزو کو روح میں غم بن کے رہنا آ گیا
سہتے سہتے ہم کو آخر رنج سہنا آ گیا
دل کا خوں آنکھوں میں کھچ آیا، چلو اچھا ہوا
میری آنکھوں کو مِرا احوال کہنا آ گیا
سہل ہو جائے مشکل ضبطِ سوزِ و ساز کی
خونِ دل کو آنکھ سے روز بہنا آ گیا