صحرا لگے کبھی کبھی دریا دکھائی دے

صحرا لگے کبھی کبھی دریا دکھائی دے 

حیران ہوں میں کیا ہے جہاں کیا دکھائی دے 

آواز کوئی ہو میں اسی کی صدا سنوں 

ہر سمت مجھ کو ایک ہی چہرہ دکھائی دے 

نادانیوں کا دل کی بھی کوئی علاج ہو 

بن کے وہ غیر بھی مجھے اپنا دکھائی دے

وہ مری بزم میں آیا ہو کبھی یاد نہیں

 وہ مِری بزم میں آیا ہو کبھی یاد نہیں 

حالِ دل کھُل کے سنایا ہو کبھی یاد نہیں 

اک سرِ راہ ملاقات تو تسلیم، مگر 

خلوتوں میں بھی بلایا ہو کبھی یاد نہیں 

قہقہے چھین کے آنسو مجھے دینے والے 

میں نے تجھ کو بھی رُلایا ہو کبھی یاد نہیں 

پھر سے وعدہ کرو مکر جاؤ

اس طرف سے ذرا گزر جاؤ

خشک پتوں میں رنگ بھر جاؤ

جی اٹھیں جاں بہ لب یہ دیواریں

آؤ، یہ معجزہ بھی کر جاؤ

روح تک تازگی سی پھیلا دو

بن کے خوشبو ذرا بکھر جاؤ

جہاں ڈبویا وہاں سے ابھر رہا ہوں میں

شمار لمحوں کا صدیوں میں کر رہا ہوں میں

عجیب وقت سے یارو! گزر رہا ہوں میں

یہ سارا فیض، اسی آتشِ دروں کا ہے

ہوا ہے کتنا اندھیرا، نکھر رہا ہوں میں

نظر نظر میں حکایت مِرے جنوں کی ہے 

صحیفہ بن کے دلوں میں اتر رہا ہوں میں 

دل جلانے کی بات کرتے ہو

دل جلانے کی بات کرتے ہو
آشیانے کی بات کرتے ہو
ہم کو اپنی خبر نہیں یارو
تم زمانے کی بات کرتے ہو
سارے دنیا کے رنج و غم دے کر
مسکرانے کی بات کرتے ہو