لٹا کے راہ محبت میں ہر خوشی میں نے

 لٹا کے راہِ محبت میں ہر خوشی میں نے

لیا ہے غم کا سہارا ابھی ابھی میں نے

نجانے کیوں تیری چشمِ کرم کو سہہ نہ سکا

تیرے ستم تو سہے تھے ہنسی خوشی میں نے

تیرے حسین تصور کو سامنے لا کر

شبِ فراق کو بخشی ہے چاندنی میں نے

کارواں لٹ گیا راہبر چھٹ گیا رات تاریک ہے غم کا یارا نہیں

 کارواں لٹ گیا راہبر چھٹ گیا رات تاریک ہے غم کا یارا نہیں

راہ میں بھی کوئی شمع جلتی نہیں آسماں پر بھی کوئی ستارا نہیں

یہ بہار و خزاں یہ خوشی اور غم یہ حسیں نازنیں دل کے پتھر صنم

سب سہارے ہیں بس چار دن کے لیے زندگی بھر کا کوئی سہارا نہیں

میری غیرت مِری آن کا امتحاں تیری سازش پہ بھاری ہے اے باغباں

جان دے دوں ابھی یہ تو منظور ہے، گلستاں چھوڑ دوں یہ گوارا نہیں

تجھ کو دریا دلی کی قسم ساقیا مستقل طور پہ دور چلتا رہے

تجھ کو دریا دلی کی قسم ساقیا 

مستقل طور پہ دور چلتا رہے 

رونق مۓ کدہ یونہی بڑھتی رہے 

ایک گرتا رہے، اک سنبھلتا رہے

صرف شبنم ہی شان گلستاں نہیں 

شعلہ و گل کا بھی دور بھی چلتا رہے

گلشن کی فقط پھولوں سے نہیں کانٹوں سے بھی زینت ہوتی ہے

گلشن کی فقط پھولوں سے نہیں کانٹوں سے بھی زینت ہوتی ہے

جینے کے لیے اس دنیا میں غم کی بھی ضرورت ہوتی ہے

اے واعظِ ناداں! کرتا ہے تُو ایک قیامت کا چرچا

یہاں روز نگاہیں ملتی ہیں، یہاں روز قیامت ہوتی ہے 

وہ پرسشِ غم کو آئے ہیں کچھ کہہ نہ سکوں، چپ رہ نہ سکوں

خاموش رہوں تو مشکل ہے، کچھ کہہ دوں تو شکایت ہوتی ہے

میں نے جب سے تجھے اے جان غزل دیکھا ہے

میں نے جب سے تجھے اے جان غزل دیکھا ہے

مسکراتا ہوا اس دل میں کنول دیکھا ہے 

جب ملی ہے میری نظروں سے تیری شوخ نظر

تیری پلکوں کی گھنی چھاؤں میں، میں نے اکثر 

جگمگاتا ہوا اک تاج محل دیکھا ہے

میں نے جب سے تجھے اے جان غزل دیکھا ہے

یوں بیخودی سے کام لیا ہے کبھی کبھی

یوں بے خودی سے کام لیا ہے کبھی کبھی

عرشِ بریں کو تھام لیا ہے کبھی کبھی

میں نے تجھے پکار لیا ہے تو ظلم کیا

تُو نے بھی میرا نام لیا ہے کبھی کبھی

اب تک نظر میں ہیں تِری پلکیں جھکی جھکی

یوں بھی تیرا سلام لیا ہے کبھی کبھی

چاند تارے بھی زیر قدم آ گئے

چاند تارے بھی زیرِ قدم آ گئے

یہ کہاں تیری چاہت میں ہم آ گئے

جب کبھی یاد ان کے ستم آ گئے

وہ تصور میں با چشمِ نم آ گئے

دفعتاً زلف رخ پر جو لہرا گئی

ایک مرکز پہ دیر و حرم آ گئے

تیرے جلوے اب مجھے ہر سو نظر آنے لگے

تیرے جلوے اب مجھے ہر سُو نظر آنے لگے

کاش یہ بھی ہو کہ مجھ میں تُو نظر آنے لگے

ابتدا یہ تھی کہ دیکھی تھی خوشی کی اک جھلک

انتہا یہ ہے کہ غم ہر سُو نظر آنے لگے

بے قراری بڑھتے بڑھتے دل کی فطرت بن گئی

شاید اب تسکین کا پہلو نظر آنے لگے

تم اپنے خط میں یوں لفظوں کا سلسلہ رکھنا

تم اپنے خط میں یوں لفظوں کا سلسلہ رکھنا 

ہر ایک لفظ کا مفہوم 'دوسرا' رکھنا

تمہارے لب کی مہک راز فاش کر دے گی 

لفافہ بند ناں کرنا، یوں ہی کھلا رکھنا

نہ اتنا ٹوٹ کے مِلیے کہ دل پہ شک گزرے 

خلوص میں بھی ضروری ہے فاصلہ رکھنا

دل کی تباہیوں کا تجھے کیوں ملال ہے

دل کی تباہیوں کا تجھے کیوں ملال ہے

جس کی یہ انجمن ہے اسے خود خیال ہے

چہرہ اداس اداس ہے، دل بھی نڈھال ہے

جو میرا حال تھا، وہی اب ان کا حال ہے

طوفاں کی زد سے بچ کے گزرنا نہیں کمال

موجوں میں غرق ہو کے ابھرنا کمال ہے

زندگی کی راہوں میں رنج و غم کے میلے ہیں

زندگی کی راہوں میں، رنج و غم کے میلے ہیں
بھیڑ ہے قیامت کی، اور ہم اکیلے ہیں

گیسوؤں کے سائے میں ایک شب گزاری تھی

آج تک جدائی کی دھوپ میں اکیلے ہیں

اب تو اپنا سایہ بھی، کھو گیا اندھیروں میں
آپ سے بچھڑ کر ہم، کس قدر اکیلے ہیں

راز ہے بہت گہرا بات اک ذرا سی ہے

راز ہے بہت گہرا، بات اک ذرا سی ہے
وہ ہیں سامنے پھر بھی چشمِ شوق پیاسی ہے
زندگی بھی برہم ہے، موت بھی خفا سی ہے
آج کل تو دونوں میں آپ کی ادا سی ہے
اپنی انجمن سے ہم یہ کہاں چلے آئے
ہر طرف اندھیرا ہے، ہر طرف اداسی ہے