نہ پوچھو کون ہیں کیوں راہ میں ناچار بیٹھے ہیں

 نہ پوچھو کون ہیں کیوں راہ میں ناچار بیٹھے ہیں

مسافر ہیں سفر کرنے کی ہمت ہار بیٹھے ہیں

اُدھر پہلو سے وہ اٹھے، اِدھر دنیا سے ہم اٹھے

چلو ہم بھی تمہارے ساتھ ہی بے کار بیٹھے ہیں

کسے فرصت کہ فرض خدمت الفت بجا لائے

نہ تم بے کار بیٹھے ہو نہ ہم بےکار بیٹھے ہیں

ستم دوست فکر عداوت کہاں تک

 ستم دوست فکر عداوت کہاں تک

کہاں تک وفا سے بغاوت کہاں تک

خلاف سلوک محبت کے خُوگر

خلاف سلوک محبت کہاں تک

مسلسل ستم کی حکومت کے بانی

مسلسل ستم کی حکومت کہاں تک

حق بنا باطل بنا ناقص بنا کامل بنا

 حق بنا، باطل بنا، ناقص بنا، کامل بنا

جو بنانا ہو بنا، لیکن کسی قابل بنا

شوق کے لائق بنا، ارمان کے قابل بنا

اہلِ دل بننے کی حسرت ہے تو دل کو دل بنا

عقدہ تو بے شک کھلا لیکن بہ صد دِقت کھلا

کام تو بے شک بنا لیکن بہ صد مشکل بنا

چمن ہے بہاریں ہیں گلباریاں ہیں

 چمن ہے، بہاریں ہیں، گلباریاں ہیں​

گھٹا ہے، پھواریں ہیں، میخواریاں ہیں​

ستم کوشیاں ہیں، جفا کاریاں ہیں​

یہ کس کے مٹانے کی تیاریاں ہیں​

بتو! تم خدا جانے کیسے خدا ہو​

کہ ستاریاں ہیں، نہ غفاریاں ہیں

اب ہم کو خوف قید زماں و مکاں کہاں

 اب ہم کو خوفِ قیدِ زماں و مکاں کہاں؟

اب جس جہاں میں ہم ہیں وہاں یہ جہاں کہاں

اب قلب میں وہ برقِ محبت طپاں کہاں

اب جسم میں وہ روحِ رواں و دواں کہاں

جورِ فلک سے تو مفر آساں ہے مگر

تیری نگاہِ لطف سے شکلِ اماں کہاں