اب ہم کو خوف قید زماں و مکاں کہاں

 اب ہم کو خوفِ قیدِ زماں و مکاں کہاں؟

اب جس جہاں میں ہم ہیں وہاں یہ جہاں کہاں

اب قلب میں وہ برقِ محبت طپاں کہاں

اب جسم میں وہ روحِ رواں و دواں کہاں

جورِ فلک سے تو مفر آساں ہے مگر

تیری نگاہِ لطف سے شکلِ اماں کہاں

وہ بد نصیب ہوں کہ تری آرزو مجھے

ناشادماں بھی رکھ نہ سکی، شادماں کہاں

جس باغ میں تمہارے قدم سے بہار آئے

اس باغ کی بہار کو خوفِ خزاں کہاں

وہ مےکدے میں شیخ کی تشریف آوری

وہ میری التماس کہ حضرت یہاں کہاں

آزاد اب قفس سے رہا بھی ہوئے تو کیا

گو آشیاں کی دُھن ہے، پر اب آشیاں کہاں​

آزاد انصاری