آنکھوں کے مے کدے میں ہوا بے حساب رقص

 آنکھوں کے میکدے میں ہُوا بے حساب رقص

تعبیر پا کے کر رہے تھے سارے خواب رقص

بے چینیوں کا نام غریبوں کی ناچ ہے

اب تو امیر لوگوں کا ہے اضطراب رقص

پہلے پہل تھا زندگی کا رقص ایک شوق

آگے چلا تو ہو گیا شوقِ عذاب رقص

معصوم پوچھتا ہے یہ کثرت کے تار سے

گردش کے ساتھ کیسے ہوا ہم رَکاب رقص

تہذیب سے نہ کوئی تمدن سے واسطہ

دورِِ جدید کا ہے سکھاتا نصاب رقص

نیرو تو بانسری ہی بجاتا رہا فقط

بستی کے میری کرتے رہے ہیں نواب رقص

جلتے ہوئے چراغ نے سورج سے کہہ دیا

آساں نہیں ہے تند ہوا میں جناب رقص

معنی بدل گئے ہیں یہاں اونچ نیٖچ کے

دنیا میں ہو گیا ہے جو عزت مآب رقص

انجام جانتا ہے وہ کچے گھڑے کا بھی

جاوید عشق دیکھ چکا ہے چناب رقص

سردار جاوید خان