لبوں تک آئی ہے اک لہر میرے سینے سے

 لبوں تک آئی ہے اک لہر میرے سینے سے

ہنسی میں ڈوب گیا ہوں نکل کے گریے سے

کواڑ کھول کے دیکھا تِری گلی کی طرف

سراب ہی نظر آیا مجھے دریچے سے

یہ مہر و ماہ یہ تارے بھی ماند پڑتے گئے

وہ شاہزادی جو نکلی تھی اپنے حجرے سے

کسی کے سحرِ نگاہی سے ہو عطا تو یہ ہو

یہ عشق ہوتا نہیں یوں کسی کے کرنے سے

خوشی کو آپ نے صاحب غلط شمار کیا

ہنسی تو پھوٹنے لگتی ہے کھل کے رونے سے

مجھ اس فقیر پہ کرتے ہیں رشک شہزادے

کہ شاہزادی کو نسبت ہے میرے حجرے سے

اسامہ جمشید