جتنے لوگ نظر آتے ہیں سب کے سب بیگانے ہیں

 جتنے لوگ نظر آتے ہیں سب کے سب بیگانے ہیں

اور وہی ہیں دور نظر سے جو جانے پہچانے ہیں

زنجیروں کا بوجھ لیے ہیں بے دیوار کے زنداں میں

پھر بھی کچھ آواز نہیں ہے، کیسے یہ دیوانے ہیں

بچ بچ کر چلتے ہیں ہر دم شیشے کی دیواروں سے

کون کہے دیوانہ ان کو؟ یہ تو سب فرزانے ہیں

راتوں کے اندھیروں میں یہ لوگ عجب نکلے

 راتوں کے اندھیروں میں یہ لوگ عجب نکلے

سب نام و نسب والے، بے نام و نسب نکلے

تعمیر پسندی نے کچھ زیست پر اُکسایا

کچھ موت کے ساماں بھی جینے کا سبب نکلے

یہ نور کے سوداگر خود نور سے عاری ہیں

گردُوں پہ مہ و انجم تنویر طلب نکلے

کوئی دھڑکن کوئی الجھن کوئی بندھن مانگے

 کوئی دھڑکن کوئی الجھن کوئی بندھن مانگے

ہر نفس اپنی کہانی میں نیا پن مانگے

دشت افکار میں ہم سے نئے موسم کا مزاج

بجلیاں تنکوں کی شعلوں کا نشیمن مانگے

رات بھر گلیوں میں یخ بستہ ہواؤں کی صدا

کسی کھڑکی کی سلگتی ہوئی چلمن مانگے

آئی خزاں چمن میں گئے دن بہار کے

 آئی خزاں چمن میں گئے دن بہار کے

شرمندہ سب درخت ہیں کپڑے اتار کے

میک اپ سے چھپ سکیں گی خراشیں نہ وقت کی

آئینہ ساری باتیں کہے گا پکار کے

انساں سمٹتا جاتا ہے خود اپنی ذات میں

بندھن بھی کھلتے جاتے ہیں صدیوں کے پیار کے

تھا پا شکستہ آنکھ مگر دیکھتی تو تھی

 تھا پا شکستہ آنکھ مگر دیکھتی تو تھی

مانا وہ بے عمل تھا مگر آگہی تو تھی

الزام نارسی سے مبرا نہیں تھی سیپ

لیکن کسی کے شوق میں ڈوبی ہوئی تو تھی

مانا وہ دشت شوق میں پیاسا ہی مر گیا

اک جھیل جستجو کی پسِ تشنگی تو تھی

وہ کھل کر مجھ سے ملتا بھی نہیں ہے

 وہ کھل کر مجھ سے ملتا بھی نہیں ہے

مگر نفرت کا جذبہ بھی نہیں ہے

یہاں کیوں بجلیاں منڈلا رہی ہیں

یہاں تو ایک تنکا بھی نہیں ہے

برہنہ سر میں صحرا میں کھڑا ہوں

کوئی بادل کا ٹکڑا بھی نہیں ہے