رنگ اردو دنیا بھر کے نامور کلاسیک اور نوجوان اردو شعراء کے شاہکار کلام پر مبنی بلاگ🌷Rung E Urdu a blog of worldsfamous poetry of past & present era
تمہیں کس نے کہا تھا تم مجھے چاہو، بتاؤ تو؟
جو دم بھرتے ہو چاہت کا تو پھر اس کو نبھاؤ تو
دئیے جاتے ہو یہ دھمکی؛ گیا تو پھر نہ آؤں گا
کہاں سے آؤ گے، پہلے مِری دنیا سے جاؤ تو
مِری چاہت بھی ہے تم کو اور اپنا گھر بھی پیارا ہے
نپٹ لوں گی میں ہر غم سے، تم اپنا گھر بچاؤ تو
دل سے اپنایا نہ اس نے غیر بھی سمجھا نہیں
یہ بھی اک رشتہ ہے جس میں کوئی بھی رشتہ نہیں
یہ بلا کے پینترے، یہ سازشیں میرے خلاف
رائیگاں ہیں، میں تمہارے کھیل کا حصہ نہیں
اے مِری خانہ بدوشی!، یہ کہاں لے آئی تُو
گھر میں ہوں میں اور میرا گھر مجھے ملتا نہیں
بے حد بے چینی ہے لیکن مقصد ظاہر کچھ بھی نہیں
پانا، کھونا، ہنسنا، رونا، کیا ہے آخر، کچھ بھی نہیں
اپنی اپنی قسمت سب کی،۔ اپنا اپنا حصہ ہے
جسم کی خاطر لاکھوں ساماں روح کی خاطر کچھ بھی نہیں
اس کی بازی اس کے مہرے اس کی چالیں اس کی جیت
اس کے آگے سارے قادر ماہر شاطر کچھ بھی نہیں
دونوں میں کتنا فرق مگر دونوں کا حاصل تنہائی
اپنوں میں دوری لاتی ہے وہ شہرت ہو یا رسوائی
جیون کے کورے کاغذ پر جینا ہوگا تحریروں میں
اجلے پنوں پر سیاہی سے کرنی ہوگی حرف آرائی
ہم ہیں اس کا ہی عکس مگر ہے بیچ میں جیون کا درپن
جب ٹوٹے گا جیون درپن تب ظاہر ہوگی سچائی
میں نے اپنا حق مانگا تھا وہ ناحق ہی رُوٹھ گیا
بس اتنی سی بات ہوئی تھی ساتھ ہمارا چھُوٹ گیا
وہ میرا ہے آخر اک دن مجھ کو مل ہی جائے گا
میرے من کا ایک بھرم تھا کب تک رہتا ٹوٹ گیا
دنیا بھر کی شان و شوکت جیوں کی تیوں ہی دھری رہی
میرے بیراگی من میں جب سچ آیا تو جھوٹ گیا
اکثر دکھائی دے جاتے ہیں
کہیں نہ کہیں
خوشی کے آنسو
لیکن
کیا کبھی کسی نے
غم کی ہنسی بھی سنی ہے
سچ ہے پیاسی ہوں میں
بے حد پیاسی
لیکن تم سے کس نے کہا
کہ تم میری پیاس بجھاؤ
کہیں زیادہ خالی ہو تم
مجھ سے کہیں زیادہ ریتے
وہ نہیں میرا مگر اس سے محبت ہے، تو ہے
یہ اگر رسم و رواجوں سے بغاوت ہے، تو ہے
سچ کو میں نے سچ کہا، جب کہہ دیا تو کہہ دیا
اب زمانے کی نظر میں یہ حماقت ہے، تو ہے
جل گیا پروانہ تو شمع کی اس میں کیا خطا؟
رات بھر جلنا جلانا اس کی قسمت ہے، تو ہے
