مُقابلے کی تھی فضا میں اس طرف نہیں گیا
کہ جس طرف گئی ہوا میں اس طرف نہیں گیا
میں جانتا تھا اس طرف بہشت ہی بہشت ہے
مگر میں آگ میں جلا میں اس طرف نہیں گیا
مجھے تو اپنی راکھ پر بھی انتہا کا ناز تھا
پرائی آگ ڈُھونڈتا میں اس طرف نہیں گیا
تھا اس طرف مِرا کوئی اور اس طرف کوئی نہ تھا
میں اس طرف کا ہو گیا میں اس طرف نہیں گیا
تِرے مِرے خیال میں بس اتنا ہی تو فرق ہے
تُو جس طرف چلا گیا میں اس طرف نہیں گیا
میں اس طرف کے واقعات سب سُنا چُکا تو پھر
یہ راز بعد میں کُھلا میں اس طرف نہیں گیا
سمندروں میں تیرگی بھی مُجھ کو روشنی لگی
چراغ کو اُچھالتا میں اس طرف نہیں گیا
بس ایک میں ہی تھا جو اپنے ساتھ ساتھ چل پڑا
بس اک تُجھے پُکارتا میں اس طرف نہیں گیا
حفیظ عامر
No comments:
Post a Comment