کاہے افسوس کروں جی کے چلے جانے کا

 کاہے افسوس کروں، جی کے چلے جانے کا

یہ تو ویسے بھی پجاری تھا صنم خانے کا

عشق والوں کو کبھی مات نہیں ہو سکتی

حسن فانی ہے، کسی کام نہیں آنے کا

لوگ کیا دشت میں آتے ہیں اجازت لے کر

کیا کوئی تخت نشیں ہوتا ہے ویرانے کا؟

دینے لگا ہے خواب میں مجھ کو دکھائی کیا

دینے لگا ہے خواب میں مجھ کو دکھائی کیا

ہونے لگی ہے خود سے مِری آشنائی کیا

دنیا! تِرے فریب میں آؤں بھی کس طرح 

مجھ پر کھلی نہیں ہے تِری بے وفائی کیا

دشمن کو میں نے بڑھ کے گلے سے لگا لیا

کل شب یہ ایک دم سے مِرے جی میں آئی کیا

یعنی یہ تیرا ہجر بھی اتنا کما لیا گیا

یعنی یہ تیرا ہجر بھی، اتنا کما لیا گیا

سینے میں بھر لیا گیا، سر پہ اٹھا لیا گیا

دشت ہی دشت تھا وہاں دیوار و در تو تھے نہیں

جس کو جہاں جگہ ملی، مسکن بنا لیا گیا

اپنا تو سب حسابِ جاں، دل پہ رقم ہے آج تک

جو بھی کہا سنا گیا، جو بھی دیا، لیا، گیا

آنکھوں سے کام ہم نے بہت ہی جدا لیا

آنکھوں سے کام ہم نے بہت ہی جدا لیا

پَل بھر میں ان کو دشت سے دریا بنا لیا

ہوش و خرد کی چلتی کہاں ان کے سامنے 

دل نے کہا تو پیار کا بیڑا اٹھا لیا

اب اور مجھ فقیر کو بھاشن نہ دیجیۓ 

سن سن کے کان پک گئے خطباتِ عالیہ

عجب اک خواب دیکھے جا رہے ہیں

عجب اک خواب دیکھے جا رہے ہیں 

جنوں میں رقص کرتے جا رہے ہیں

ہمیں ناخن کی حاجت ہو رہی ہے 

ہمارے زخم بھرتے جا رہے ہیں

وہ جس جانب ہمارا کچھ نہیں ہے 

اسی جانب یہ رستے جا رہے ہیں

کچھ نہیں ہے یار جانی خاک ہے

کچھ نہیں ہے یار جانی خاک ہے

یہ سراپا، یہ جوانی، خاک ہے

آج بھی جھڑتی ہے اپنے جسم سے 

یہ کوئی صدیوں پرانی خاک ہے

کیا کوئی پہچان پائے گا ہمیں 

ہم فقیروں کی نشانی خاک ہے

الٹ قسمت کا دھارا چل رہا ہے

الٹ قسمت کا دھارا چل رہا ہے

مگر پھر بھی گزارا چل رہا ہے

محبت بوجھ بنتی جا رہی ہے

خسارے پر خسارا چل رہا ہے

تعجب ہے، تمہارے فیصلوں پر

ابھی تک استخارہ چل رہا ہے 

دلا تو سوچ کوئی کام وام کرنے کا

دِلا تو سوچ، کوئی کام وام کرنے کا

یہ بارِ عشق تو سر سے نہیں اترنے کا

جنابِ ہجر! اگر آپ کی اجازت ہو 

کچھ اہتمام کروں آپ کے ٹھہرنے کا

ملال یہ ہے کہ ہم نے عبث گزار دیا 

ہمارے پاس جو لمحہ تھا کر گزرنے کا

یہ مانتا ہوں کہ مطلق میں پارسا نہیں ہوں

یہ مانتا ہوں کہ مطلق میں پارسا نہیں ہوں 

مگر جو سوچ رہے ہو وہ، باخدا نہیں ہوں

کبھی کبھی تو میں خود سے مکر ہی جاتا ہوں 

کہ آپ پوچھنے والے سے کہہ دیا، نہیں ہوں

اسے کہو کہ غمِ ہجر سے نکالے مجھے 

اسے کہو کہ میں ویسا ہرا بھرا نہیں ہوں

نصیبا جگمگانے کو نبی کا نام کافی ہے

ہدیۂ نعت بحضور سرورِ کائناتﷺ 

نصیبا جگمگانے کو نبیﷺ کا نام کافی ہے 

مِرے اس آشیانے کو نبیﷺ کا نام کافی ہے

کوئی اس نام سے افضل وظیفہ ہو نہیں سکتا 

ہمیں پڑھنے پڑھانے کو نبیﷺ کا نام کافی ہے

بتایا تھا بہت پہلے مجھے اک پیرِ کامل نے 

خدا کا قرب پانے کو نبیﷺ کا نام کافی ہے

سر کے رکھنے کو ترا نقش کف پا مانگیں

ہدیۂ نعت بحضور سرورِ کائناتﷺ  

سر کے رکھنے کو تِرا نقشِ کفِ پا مانگیں

اپنی اوقات نہیں ہے کہ کچھ ایسا مانگیں

بھیک ملتی ہے سوالی کا بھرم رہتا ہے

آؤ سرکارﷺ سے حسنین کا صدقہ مانگیں

عین ممکن ہے کہ جذبوں کو زباں مل جائے

ان کے دربار سے مِدحت کا قرینہ مانگیں

رکھا ہے پاؤں یار نے دل کے مکان میں

رکھا ہے پاؤں یار نے دل کے مکان میں
لو آج میری جان بھی آئی ہے جان میں
اک دن ترا یہ ہجر مکمل کروں گا میں
یہ عمر پڑ رہی ہے یونہی درمیان میں
لیجے حضور ختم ہوئی داستانِ عشق
میں آخری چراغ تھا اس خاندان میں

حیات کیسے کٹے گی ہنسی خوشی باقی

حیات کیسے کٹے گی ہنسی خوشی باقی
نہ دوستی ہے سلامت، نہ دشمنی باقی
پتہ چلا کہ کسی اور کے وجود سے تھی
بجھا چراغ، مگر روشنی رہی باقی
تمام شہر تو مسمار ہو چکا کب کا
مگر فقیر کی اب بھی ہے جھونپڑی باقی

میں نے یہ کب کہا تھا کہ سارا ادھیڑ دے

میں نے یہ کب کہا تھا کہ سارا ادھیڑ دے
جتنی بُنت خراب ہے، اتنا ادھیڑ دے
ان کا نصیب بس وہی صحرا کی خاک ہے
جن کو فراقِ یار کا لمحہ ادھیڑ دے
ممکن ہے اب کی بار میں آدھا دکھائی دوں
ممکن ہے تیرا ہجر یہ چہرہ ادھیڑ دے

روٹھتے ہی منا لیا خود کو

روٹھتے ہی منا لیا خود کو

کتنا خود سر بنا لیا خود کو

غم مسلسل خراج مانگتا تھا

اس کا ایندھن بنا لیا خود کو

ہائے دنیا! تِرے تعاقب میں

زندگی نےتھکا لیا خود کو