سر کے رکھنے کو ترا نقش کف پا مانگیں

ہدیۂ نعت بحضور سرورِ کائناتﷺ  

سر کے رکھنے کو تِرا نقشِ کفِ پا مانگیں

اپنی اوقات نہیں ہے کہ کچھ ایسا مانگیں

بھیک ملتی ہے سوالی کا بھرم رہتا ہے

آؤ سرکارﷺ سے حسنین کا صدقہ مانگیں

عین ممکن ہے کہ جذبوں کو زباں مل جائے

ان کے دربار سے مِدحت کا قرینہ مانگیں

ان کی چوکھٹ پہ پڑے شاہ و گدا رو رو کر

رحمتِ شہﷺ سے معافی کا اشارہ مانگیں

اذنِ سرکارﷺ سے توفیقِ ثناء ملتی ہے

ان سے فریاد کریں،ان سے خدارا مانگیں

جن کے سینوں میں مدینے کی تڑپ رہتی ہے

ان پہ کیا آن پڑی ہے، زرِ دنیا مانگیں

جھولیاں بھرتے ہیں اس طرح وہ سب کی انوؔر

پھر ضرورت نہیں رہتی کہ دوبارہ مانگیں

صغیر انور