دلوں کی عقدہ کشائی کا وقت ہے کہ نہیں

 دلوں کی عقدہ کشائی کا وقت ہے کہ نہیں

یہ آدمی کی خدائی کا وقت ہے کہ نہیں

کہو ستارہ شناسو،۔ فلک کا حال کہو

رخوں سے پردہ کشائی کا وقت ہے کہ نہیں

ہوا کی نرم روی سے جواں ہوا ہے کوئی

فریب تنگ قبائی کا وقت ہے کہ نہیں

یہ فضائے ساز و مضرب یے ہجوم تاج داراں

یہ فضائے ساز و مضرب یے ہجوم تاج داراں 

چلو آؤ ہم بھی نکلیں بہ لباس سوگواراں 

یہ فسون روئے لیلیٰ بہ عذاب جان مجنوں 

وہی حسن دشت و در ہے بہ طواف جاں نثاراں 

غم کارواں کا آخر کوئی رخ نہ اس سے چھوٹا 

وہ حدیث کہہ گئی ہے یہ ہوائے رہ گزاراں 

سب پیچ و تاب شوق کے طوفان تھم گئے

سب پیچ و تاب شوق کے طوفان تھم گئے

وہ زلف کھل گئی، تو ہواؤں کے خم گئے

ساری فضا تھی وادئ مجنوں کی خوابناک

جو روشناسِ مرگِ محبت تھے، کم گئے

وحشت سی ایک لالۂ خونِیں کفن سے تھی

اب کے بہار آئی تو سمجھو کہ ہم گئے

کچھ کرم ہم گوشہ گیروں پر بھی فرمایا کرو

کچھ کرم ہم گوشہ گیروں پر بھی فرمایا کرو

شہر میں آتے ہی رہتے ہو، ادھر آیا کرو

زندگی ہے دام اندر دام، دل کی کیا بساط

اک گرفتارِ بلا کو لاکھ سمجھایا کرو

ہمسفر برحق، مگر اک جائے رشکِ غیر ہے

آدمی کمبخت کوئی معتبر لایا کرو

کیفیت اس کی قبا میں وہ قد بالا سے تھی

کیفیت اس کی قبا میں وہ قدِ بالا سے تھی
گفتگو ساحل کی اک ٹھہرے ہوئے دریا سے تھی
زاویے کیا کیا دِئیے تھے تیرے رخ کو شوق نے
انجمن سی انجمن تھی،۔ اور دلِ تنہا سے تھی
جادۂ بے میل و منزل وقت کا اک خواب تھا
رہگزارِ حال بھی ملتی ہوئی فردا سے تھی

بیٹھو جی کا بوجھ اتاریں دونوں وقت یہیں ملتے ہیں

بیٹھو جی کا بوجھ اتاریں دونوں وقت یہیں ملتے ہیں

دور دور سے آنے والے رستے کہیں کہیں ملتے ہیں

وہم بھی ہو جاتا ہے دل کو لیکن اس میں تعجب کیا ہے

ایسے دشت کہ جن میں شمعیں آپ ہی آپ جلیں، ملتے ہیں

گہرے سرخ گلاب کا اندھا بلبل سانپ کو کیا دیکھے گا

پاس ہی اگتی ناگ پھنی تھی، سارے پھول وہیں ملتے ہیں

آمد گل سے جنوں کی ایک آسانی جو تھی

آمدِ گل سے جنوں کی ایک آسانی جو تھی

تازہ کر دی میں نے رسمِ چاک دامانی جو تھی

آپ اپنی محویت میں کیا کمالِ حسن تھی

خال و خط میں اسکے اک خوابوں کی حیرانی جو تھی

بُوےۓ گل میں پردۂ خلوت سا کوئی رمز تھا

رنگِ مے سے ہے، لبوں کی اک سخن دانی جو تھی

سنبھل نہ پائے تو تقصیر واقعی بھی نہیں

سنبھل نہ پائے تو تقصیر واقعی بھی نہیں

ہر اک پہ سہل کچھ آدابِ مۓ کشی بھی نہیں

اِدھر اُدھر سے حدیثِ غمِ جہاں کہہ کر 

تِری ہی بات کی اور تیری بات کی بھی نہیں

وفائے وعدہ پہ دل نکتہ چیں ہے وہ خاموش

حدیثِ مہر و وفا آج گفتنی بھی نہیں

ایک ہی شہر میں رہتے بستے کالے کاسوں دور رہا

ایک ہی شہر میں رہتے بستے کالے کاسوں دور رہا

اس غم سے ہم اور بھی ہارے وہ بھی تو مجبور رہا

کال تھا اشکوں کا آنکھوں میں لیکن تیری یاد نہ پوچھ

کیا کیا موتی میں بھی فراہم کرنے پر مجبور رہا

وہ اور اتنا پریشاں خاطر ربط غیر کی بات نہیں

لیکن اس کے چپ رہنے سے دل کو وہم ضرور رہا

نقشے اسی کے دل میں ہیں اب تک کھنچے ہوئے

نقشے اسی کے دل میں ہیں اب تک کھنچے ہوئے

وہ دورِ عشق تھا کہ بڑے معرکے ہوئے

اتنا تو تھا کہ وہ بھی مسافر نواز تھے

مجنوں کے ساتھ تھے جو بگولے لگے ہوئے

آئی ہے اس سے پچھلے پہر گفتگو کی یاد

وہ خلوتِ وصال، وہ پردے چھَٹے ہوئے

خواب اندر خواب گردش میں رہا

شاخِ مرجاں

خواب اندر خواب گردش میں رہا
تیرا چہرہ، تیرا آب اندام جسم
عقربِ ساعت سی لرزش میں رہا
ان تہوں میں بھی رہا گستاخ دست
غوطہ زن ہوکر غمِ دوراں بہت
تیرے پرتو نے نہیں کھائی شکست

تازہ ہوا بہار کی دل کا ملال لے گئی

تازہ ہوا بہار کی، دل کا ملال لے گئی
پائے جنوں سے حلقۂ گردش حال لے گئی
جرأتِ شوق کے سوا، خلوتیانِ خاص کو
اِک تیرے غم کی آگہی، تا بہ سوال لے گئی
شعلۂ دل بُجھا بُجھا، خاک زباں اُڑی اُڑی
دشتِ ہزار دام سے، موجِ خیال لے گئی

صلیب و دار کے قصے رقم ہوتے ہی رہتے ہیں

صلیب و دار کے قصے رقم ہوتے ہی رہتے ہیں​
قلم کی جنبشوں پر سر قلم ہوتے ہی رہتے ہیں ​
یہ شاخِ گل ہے، آئینِ نمو سے آپ واقف ہے ​
سمجھتی ہے، کہ موسم کے ستم ہوتے ہی رہتے ہیں​
کبھی تیری، کبھی دستِ جنوں کی بات چلتی ہے​
یہ افسانے تو زُلفِ خم بہ خم ہوتے ہی رہتے ہیں ​

نم خوردہ بہت شعلہ جاں ہے کہ نہیں ہے

نم خوردہ بہت شعلۂ جاں ہے کہ نہیں ہے
ہر موجِ نفس آج دھواں ہے کہ نہیں ہے
نازک ہیں بہت اس کے خط و خال کی باتیں
محضر بھی کوئی پردگیاں ہے کہ نہیں ہے
احوال بھی پوچھا تو حریفانِ جنوں نے
اب داد طلب وحشتِ جاں ہے کہ نہیں ہے

کیا ہوئے باد بیاباں کے پکارے ہوئے لوگ

کیا ہوئے، باد بیاباں کے پکارے ہوئے لوگ
چاک در چاک، گریباں کو سنوارے ہوئے لوگ
خوں ہوا دل، کہ پشیمانِ صداقت ہے وفا
خوش ہوا جی، کہ چلو آج تمہارے ہوئے لوگ
یہ بھی کیا رنگ ہے اے نرگسِ خواب آلودہ
شہر میں سب ترے جادو کے ہیں مارے ہوئے لوگ

فراق سے بھی گئے ہم وصال سے بھی گئے

فراق سے بھی گئے ہم وصال سے بھی گئے
سبک ہوئے ہیں تو عیش ملال سے بھی گئے
جو بتکدے میں تھے وہ صاحبانِ کشف و کمال
حرم میں آئے تو کشف و کمال سے بھی گئے
اسی نگاہ کی نرمی سے ڈگمگائے قدم
اسی نگاہ کے تیور سنبھال سے بھی گئے