جب سر زلف تا کمر پہونچا

جب سرِ زلف تا کمر پہونچا

اس کمر کو بہت ضرر پہونچا

ہلکی پہونچی سے بھی لچکتا ہے

نازک اس کا ہے اس قدر پہونچا

اے نسیمِ سحر! تُو اس گل کو

بے کلی کی مِری خبر پہونچا

رکھی ہرگز نہ ترے رخ نے رخ بدر کی قدر

 رکھی ہرگز نہ ترے رخ نے رخ بدر کی قدر

کھوئی کاکل نے بھی آخر کو شب قدر کی قدر

عزت و قدر کی اس گل سے توقع ہے عبث

واں نہ عزت کی کچھ عزت ہے نہ کچھ قدر کی قدر

راستی خوار ہے اس چشم فسوں پرور سے

ہاں، مگر منزلت مکر ہے اور غدر کی قدر

ادھر یار جب مہربانی کرے گا

 ادھر یار جب مہربانی کرے گا

تو اپنا بھی جی شادمانی کرے گا

دیا دل نظیر اس کو یوں کہہ کے اے جاں

کہو گے تو یہ پاسبانی کرے گا

پڑھے گا یہ اشعار بیٹھو گے جب تک

جو لیٹو گے افسانہ خوانی کرے گا

بیٹھے ہیں اب تو ہم بھی بولو گے تم نہ جب تک

 بیٹھے ہیں اب تو ہم بھی بولو گے تم نہ جب تک

دیکھیں تو آپ ہم سے ناخوش رہیں گے کب تک

اقرار تھا سحر کا ایسا ہوا سبب کیا

جو شام ہونے آئی اور وہ نہ آیا اب تک

محفل میں گل رخوں کے آیا جو وہ پری رو

ہو شکل حیرت اس کی صورت رہے وہ سب تک

نہ میں دل کو اب ہر مکاں بیچتا ہوں

 نہ میں دل کو اب ہر مکاں بیچتا ہوں

کوئی خوبرُو لے، تو ہاں بیچتا ہوں

وہ مے جس کو سب بیچتے ہیں چھپا کر

میں اس مے کو یارو! عیاں بیچتا ہوں

یہ دل جس کو کہتے ہیں عرشِ الٰہی

سو اس دل کو یارو! میں یاں بیچتا ہوں

مکھڑے کو ترے دیکھ کے رشک گل لالا

 مُکھڑے کو ترے دیکھ کے رشکِ گُلِ لالا

پھولے ہے پڑا دل میں ترا چاہنے والا

عالم کے چمن ساز نے یہ سرو کیا واہ

خوبی کی گلستاں میں عجب شان سے بالا

سب تن کو ترے دیکھ یہی کہتے ہیں اے گُل

اللہ نے، کس نور کا یہ عطر نکالا

صحن گلشن میں چلی پھر کے ہوا بسم ﷲ

 صحنِ گلشن میں چلی پھر کے ہوا بسم ﷲ

چشم بد دور بہار آئی ہے کیا بسم ﷲ

مصحف رخ پہ ترے ابروئے پیوستہ نہیں

مو قلم سے یدِ قدرت نے لکھا بسم ﷲ

اس قدر تھا وہ نشہ میں کہ یکایک جو گرا

میں نہ بولا پہ مرے دل نے کہا بسم ﷲ

جب ماہ اگھن کا ڈھلتا ہو تب دیکھ بہاریں جاڑے کی

جاڑے کی بہاریں

جب ماہ اگھن کا ڈھلتا ہو تب دیکھ بہاریں جاڑے کی

اور ہنس ہنس پوس سنبھلتا ہو تب دیکھ بہاریں جاڑے کی

دن جلدی جلدی چلتا ہو تب دیکھ بہاریں جاڑے کی

اور پالا برف پگھلتا ہو تب دیکھ بہاریں جاڑے کی

چلا غم ٹھونک اچھلتا ہو تب دیکھ بہاریں جاڑے کی

عشق پھر رنگ وہ لایا ہے کہ جی جانتا ہے

عشق پھر رنگ وہ لایا ہے کہ جی جانتا ہے

دل کا یہ رنگ بنایا ہے کہ جی جانتا ہے

ناز اٹھانے میں جفائیں تو اٹھائِیں، لیکن 

لطف بھی ایسا اٹھایا ہے کہ جی جانتا ہے

زخم اس تیغ نگہ کا مِرے دل نے ہنس ہنس

اس مزیداری سے کھایا ہے کہ جی جانتا ہے

مرا خط ہے جہاں یارو وہ رشکِ حور لے جانا

مِرا خط ہے جہاں یارو! وہ رشکِ حور، لے جانا

کسی صورت سے تم واں تک مرا مذکور لے جانا

اگر وہ شعلہ رُو پوچھے مرے دل کے پھپولوں کو

تو اس کے سامنے اک خوشۂ انگور لے جانا

جو یہ پوچھے کہ اب کتنی ہے اسکے رنگ پر زردی

تو یارو! تم گلِ صد برگ با کافور لے جانا

پھر آن کے منت سے ملا ہم سے وہ لالا

پھر آن کے منت سے ملا، ہم سے وہ لالا

المنتہ للہ تقدس و تعالٰے

کر قتل، مجھے تُو نے ہمیشہ کو جلایا

ظالم! تجھے جیتا رکھے اللہ تعالٰے

دیکھ اب تو مجھے ہر کوئی کہتا ہے یہی، آہ

”پھر قبر سے اللہ نے مجنوں کو نکالا“

نگہ کے سامنے اس کا جونہی جمال ہوا

نگہ کے سامنے اس کا جونہی جمال ہوا

وہ دل ہی جانے ہے اس دم جو دل کا حال ہوا

اگر کہوں میں کہ چمکا وہ برق کی مانند

تو کب مثل ہے یہ اس کی جو بے مثال ہوا

قرار و ہوش کا جانا تو کس شمار میں ہے

غرض پھر آپ میں آنا مجھے محال ہوا

سبھوں کو مے ہمیں خوناب دل پلانا تھا

سبھوں کو مے، ہمیں خونابِ دل پلانا تھا 

فلک مجھی پہ تجھے کیا یہ زہر کھانا تھا

لگی تھی آگ جگر میں بجھائی اشکوں نے 

اگر یہ اشک نہ ہوتے تو کیا ٹھکانہ تھا

نِگہ سے اس کی بچاتا میں کس طرح دل کو

ازل سے یہ تو اسی تیر کا نشانہ تھا

دوری میں قمر کی جب آتی ہے چاندنی

دوری میں قمر کی جب آتی ہے چاندنی

خوابیدہ حسرتوں کو جگاتی ہے چاندنی

مہ آسماں پہ ہوتا ہے دیکھ اس کو شرمسار

روۓ زمیں پہ ٹھوکریں کھاتی ہے چاندنی

کی یکدلی ہے، ہم نے جو کہہ بھیجا اے نظیرؔ

تم بِن ہمارے دل کو ستاتی ہے ہے چاندنی

ہم نے پوچھا آپ کا آنا ہوا یاں کس روش

 ہم نے پوچھا آپ کا آنا ہوا یاں کس روش؟

ہنس کے فرمایا لے آئی آپ کے دل کی کشش

دل جونہی تڑپا وہیں دلدار آ پہونچا شتاب

اپنے دل کی اس قدر تاثیر رکھتی ہے طپش

سیر کو آیا تھا جس گلشن میں کل وہ نازنیں

تھی عجب نازاں بخود اس باٹ کی اک اک روش

جدا کسی سے کسی کا غرض حبیب نہ ہو

جدا کسی سے کسی کا غرض حبیب نہ ہو

یہ داغ وہ ہے کہ دشمن کو بھی نصیب نہ ہو

جدا جو ہم کو کرے اس صنم کے کوچہ سے

الٰہی! راہ میں ایسا کوئی رقیب نہ ہو

علاج کیا کریں حکماء تپِ جدائی کا

سوائے وصل کے اس کا کوئی طبیب نہ ہو

کل سنا ہم نے یہ کہتا تھا وہ اک ہمراز سے

کل سنا ہم نے یہ کہتا تھا وہ اک ہمراز سے

دیکھتا تھا مجھ کو آج اک شخص عجب انداز سے

وہ نیازِ و عِجز تھا اس کی نِگہ سے آشکار

جس طرح سے تھک رہے طائر کہیں پرواز سے

تُو جو واقف ہو تو جا اس کو بُلا لا اس گھڑی

میں تسلی دوں اسے کچھ شرم سے، کچھ ناز سے

رخ تو وہ ماہتاب سا دیکھا

رخ تو وہ ماہتاب سا دیکھا

تن بھی موتی کی آب سا دیکھا

کی نِگہ چشم پر تو اس کو بھی

ساغرِ پُر شباب سا دیکھا

پیرہن، برگِ گل پہ جوں شبنم

عرقِ تن، گلاب سا دیکھا

کیا خوب سودا نقد ہے اس ہات دے اس ہات لے

دنیا دار المکافات ہے

دنیا عجب بازار ہے کچھ جنس یاں کی سات لے
نیکی کا بدلہ نیک ہے، بد سے بدی کی بات لے
میوہ کھلا میوں ملے پھل پھول دے پھل پات لے
آرام دے آرام لے دکھ درد دے آفات لے
کلجگ نہیں کر جگ ہے یہ، یاں دن کو دے اور رات کو لے
کیا خوب سودا نقد ہے اس ہات دے، اس ہات لے

کدھر ہے آج الٰہی وہ شوخ چھل بلیا

کدھر ہے آج الٰہی وہ شوخ چھل بلیا

کہ جس کے غم سے مِرا دل ہوا ہے باولیا

تمام گوروں کے حیرت سے رنگ اڑ جاتے

جو گھر سے آج نکلتا وہ میرا سانولیا

تجھے خبر نہیں بلبل کے باغ سے گل چیں

بڑی سی پھولوں کی اک بھر کے لے گیا ڈلیا