میں تو سمجھا تھا جس وقت مجھ کو وہ ملیں گے تو جنت ملے گی

میں تو سمجھا تھا جس وقت مجھ کو وہ ملیں گے تو جنت ملے گی

کیا خبر تھی رہِ عاشقی میں ساتھ ان کے قیامت ملے گی

میں نہیں جانتا تھا کہ مجھ کو یہ محبت کی قیمت ملے گی

آنسوؤں کا خزانہ ملے گا، چاک دامن کی دولت ملے گی

پھول سمجھے نہ تھے زندگانی اس قدر خوبصورت ملے گی

اشک بن کر تبسم ملے گا،۔ درد بن کر مسرت ملے گی

کسی صورت بھی نیند آتی نہیں میں کیسے سو جاؤں

کسی صورت بھی نیند آتی نہیں، میں کیسے سو جاؤں

کوئی شے دل کو بہلاتی نہیں، میں کیسے سو جاؤں

اکیلا پا کے مجھ کو یاد ان کی آ تو جاتی ہے

مگر پھر لوٹ کر جاتی نہیں، میں کیسے سو جاؤں

جو خوابوں میں مِرے آ کر تسلی مجھ کو دیتی تھی

وہ صورت اب نظر آتی نہیں، میں کیسے سو جاؤں

رخ سے پردہ اٹھا دے ذرا ساقیا بس ابھی رنگ محفل بدل جائے گا

رخ سے پردہ اٹھا دے ذرا ساقیا! بس ابھی رنگِ محفل بدل جائے گا

ہے جو بیہوش وہ ہوش میں آئے گا، گرنے والا ہے جو وہ سنبھل جائے گا

لوگ سمجھے تھے یہ انقلاب آتے ہی نظمِ کہنہ چمن کا بدل جائے گا

یہ خبر کس کو تھی آتشِ گُل سے ہی، تنکا تنکا نشیمن کا جل جائے گا

تم تسلی نہ دو صرف بیٹھے رہو، وقت کچھ میرے مرنے کا ٹل جائے گا

کیا یہ کم ہے مسیحا کے رہنے ہی سے، موت کا بھی ارادہ بدل جائے گا

وعدہ شام فردا پہ اے دل مجھے گر یقیں ہی نہ آئے

وعدۂ شامِ فردا پہ اے دل مجھے گر یقیں ہی نہ آئے تو میں کیا کروں

ان کی جھوٹی تسلی کے طوفان میں نبضِ دل ڈوب جائے تو میں کیا کروں

میں نے مانگی تھی یہ مسجدوں میں دعا، میں جسے چاہتا ہوں وہ مجھ کو ملے

جو مِرا فرض تھا میں نے پورا کِیا، اب خدا بھول جائے تو میں کیا کروں

سارے جھگڑے اگر میرے جینے کے ہیں تو گلا گھونٹ دو میں بھی بیزار ہوں

موت اب تک تو دامن بچاتی رہی، تُو بھی دامن بچائے تو میں کیا کروں

اس واسطے دامن چاک کیا شاید یہ جنوں کام آ جائے

اس واسطے دامن چاک کیا شاید یہ جنوں کام آ جائے

دیوانہ سمجھ کر ہی ان کے ہونٹوں پہ مِرا نام آ جائے

میں خوش ہوں اگر گُلشن کے لیے کچھ میرا لہو کام آ جائے

لیکن مجھ کو ڈَر ہے، اس کا گلچیں پہ نہ الزام آ جائے

اے کاش ہماری قسمت میں ایسی بھی کوئی شام آ جائے

اِک چاند فلک پر نکلا ہو، اِک چاند سرِ بام آ جائے

یہاں کانپ جاتے ہیں فلسفی یہ بڑا عجیب مقام ہے

یہاں کانپ جاتے ہیں فلسفی یہ بڑا عجیب مقام ہے

جسے اپنا اپنا خدا کہیں، اسے سجدہ کرنا حرام ہے

مِری بے رُخی سے نہ ہو خفا، مِرے ناصحا! مجھے یہ بتا

جو نظر سے پیتا ہوں میں یہاں، وہ شراب کیسے حرام ہے

جو پتنگا لَو پہ فِدا ہُوا تو تڑپ کے شمع نے یہ کہا

اسے میرے درد سے کیا غرض، یہ تو روشنی کا غلام ہے

مجھے قید کرنے والے تجھے یہ خبر نہیں ہے

مجھے قید کرنے والے تجھے یہ خبر نہیں ہے

تِری ذہنیت کا غم ہے، غمِ بال و پر نہیں ہے

یہ اداس کیوں ہوئے تم مجھے کچھ خبر نہیں ہے

ابھی داستانِ غم بھی تو شباب پر نہیں ہے

میں چمن کی ذمہ داری ابھی اپنے سر نہ لوں گا

مِرے باغباں کا وعدہ، ابھی معتبر نہیں ہے

میں نظر سے پی رہا ہوں یہ سماں بدل نہ جائے

میں نظر سے پی رہا ہوں یہ سماں بدل نہ جائے
نہ ٭جُھکاوو تم نگاہیں، کہیں رات ڈھل نہ جائے
ابھی رات کچھ ہے باقی، نہ اٹھا نقاب ساقی
تِرا رِند گِرتے گِرتے کہیں پھر سنبھل نہ جائے
مِری زندگی کے مالک مِرے دل پہ ہاتھ رکھ دے
تِرے آنے کی خوشی میں مِرا دَم نکل نہ جائے