عشق کے سودے سے پہلے درد سر کوئی نہ تھا

 عشق کے سودے سے پہلے دردِ سر کوئی نہ تھا 

داغِ دل خندہ زن،۔ زخمِ جگر کوئی نہ تھا 

جوہری کی آنکھ سے دیکھے جواہر بیشتر

لعلِ لب سا لعل، دنداں سا گُہر کوئی نہ تھا 

خوبصورت یوں تو بہتیرے تھے، لیکن یار سا

نازنیں، نازک بدن، نازک کمر، کوئی نہ تھا

وحشی تھے بوئے گل کی طرح سے جہاں میں ہم

وحشی تھے بُوئے گُل کی طرح سے جہاں میں ہم 

نکلے تو پھر کے آئے نہ اپنے مکاں میں ہم 

شیدائے رُوئے گُل نہ ہیں شیدائے قد سرُو 

صیّاد کے شکار ہیں اس بُوستاں میں ہم 

نکلی لبوں سے آہ کہ گردُوں نشانہ تھا 

گویا کہ تیر جوڑے ہوئے تھے کماں میں ہم 

کوچۂ یار میں چلیے تو غزل خواں چلیے

کوچۂ یار میں چلیے تو غزل خواں چلیے

بلبلِ مست کی صورت سے گلستاں چلیے

دن کو ملتا نہیں وہ ماہ، نہیں تو کہتا

رات بھر کے لیے، گھر میں مِرے مہماں چلیے

پاؤں میں تار ہے رفتار کی طاقت باقی

پیچھے پیچھے تِرے اے عمرِ گریزاں چلیے

ہوائے دورِ مئے خوشگوار راہ میں ہے

ہوائے دورِ مئے خوش گوار راہ میں ہے

خزاں چمن سے ہے جاتی بہار راہ میں ہے

گدا نواز کوئی شہسوار راہ میں ہے

بلند آج نہایت غبار راہ میں ہے

شباب تک نہیں پہونچا ہے عالمِ طفلی

ہنوز حسنِ جوانیِ یار راہ میں ہے

چاند کہتا ہے غلط یار کے رخساروں کو

چاند کہتا ہے غلط یار کے رخساروں کو

نسبتِ ذرۂ خورشید نہیں تاروں کو

اے صنم ہووے نہ خورشید قیامت طالع

دھوپ میں تو نہ بٹھا اپنے گنہگاروں کو

حسنِ یوسف کو ترے حسن سے نسبت کیا ہے

پھونک دے گرمئ بازار خریداروں کو

سر کاٹ کے کر دیجیے قاتل کے حوالے

سر کاٹ کے کر دیجیے قاتل کے حوالے

ہمت مری کہتی ہے کہ اِحسان بلا لے

ہر قطرۂ خوں سوز دروں سے ہے اک اخگر

جلاد کی تلوار میں پڑ جائیں گے چھالے

یوں دیتے ہیں وہ عاشقِ بے صبر کو بوسہ 

جیسے کوئی صدقہ کرے بھوکے کے حوالے

غم نہیں ثابت قدم کو گو جہاں گردش میں ہے

غم نہیں ثابت قدم کو گو جہاں گردش میں ہے

قطب کو جنبش نہیں ہے آسماں گردش میں ہے

حیف ہے بے نشہ اس مے خانے میں انساں رہے

روز و شب جام مہ خورشید یاں گردش میں ہے

تیغ ابرو جس قدر چاہے برش پیدا کرے

چشم فتاں یار کی مثل فساں گردش میں ہے

پاس رسوائی سے دل مردے کا سا جبر ہے

پاسِ رسوائی سے دل مردے کا سا جبر ہے

ضبط نالہ ہجر کی شب میں فشارِ قبر ہے

صاف میرے آنسوؤں کا تار ہے اِس کی جھڑی 

دیدۂ تر کا کسی عاشق کے رومال ابر ہے

پہلے پروانے سے مغز شمع میں لگتی ہے آگ

بے تأمل حسن بھی ہے، عشق اگر بے صبر ہے

سرخ مہندی سے نہیں اس بت خوں خوار کے ہاتھ

سرخ مہندی سے نہیں اس بتِ خونخوار کے ہاتھ

دست آویز مِرے خوں کی لگی یار کے ہاتھ

بندگی کی یہ تمنا ہے کوئی لے جو ہمیں

بکتے ہیں کوڑیوں کے مول خریدار کے ہاتھ

نیم جاں دل ہے طلب گاہ سلوکِ شمشیر

آبرو اپنی ہے اب ابروئے خمدار کے ہاتھ

بلائے جاں مجھے ہر ایک خوش جمال ہوا

بلائے جاں مجھے ہر ایک خوش جمال ہوا

چھری جو تیز ہوئی، پہلے میں حلال ہوا

گرد ہوا تو اسے چھوٹنا محال ہوا

دلِ غریب مِرا مفلسوں کا مال ہوا

تِرے شہید کے جیبِ کفن میں اے قاتل

گلال سے بھی ہے رنگ عبیر لال ہوا

برنگ آئینہ یاں رہ نہیں عشق مجازی کو

برنگ آئینہ یاں رہ نہیں عشق مجازی کو

صفائے قلب نے حاصل کیا ہے پاکبازی کو

ہماری خاک کو اے شہ سوارو عرش دکھلایا

خدا ہمت زیادہ دے تمہاری تُرک تازی کو

مآل کار ہے دعوٰئ باطل کا پشیمانی

خدا سے اے بتو سیکھو طریقِ کارسازی کو

داغ دل زخم جگر ہے نعمت الوان عشق

داغِ دل، زخمِ جگر ہے، نعمت الوانِ عشق

سیر اپنی جان سے ہو جاتے ہیں مہمانِ عشق

نعمت دنیا کو کر دیتا ہے تلخ اس کا مزا

شیرۂ جاں سے ہے شیریں حلوۂ دکانِ عشق

زلفِ لیلیٰ سے سوا ہر سطر سودا خیز تھی

ہو گیا دیوانہ مجنوں پڑھتے ہی دیوانِ عشق

نکلتی کس طرح سے ہے جان مضطر دیکھتے جاؤ

نکلتی کس طرح سے ہے جانِ مضطر دیکھتے جاؤ

ہمارے پاس سے جاؤ تو پھِر کر دیکھتے جاؤ

نسیمِ نو بہاری کی طرح آئے ہو گلشن میں 

تماشاۓ گل و سرو و صنوبر دیکھتے جاؤ

جدھر جاتے ہو ہر گھر میں سے یہ آواز آتی ہے

مسیحا ہو جو بیماروں کو دم بھر دیکھتے جاؤ

چھپ کر رسوا ہوئے انکار ہے سچ بات میں کیا

چھپ کر رسوا ہوئے انکار ہے سچ بات میں کیا

اے صنم! لطف ہے پردے کی ملاقات میں کیا

کوئی اندھا ہی تجھے ماہ کہے اے خورشید

فرق ہوتا نہیں انسان سے دن رات میں کیا

یار نے وعدۂ فردائے قیامت تو کِیا

شک ہے اے نالۂ دل تیری کرامات میں کیا

ہے جب سے دست یار میں ساغر شراب کا

ہے جب سے دستِ یار میں ساغر شراب کا

کوڑی کا ہو گیا ہے کٹورا گلاب کا

صیاد نے تسلئ بلبل کے واسطے

کنجِ قفس میں حوض بھرا ہے گلاب کا

دریائے خوں کیا ہے تِری تیغ نے رواں

حاصل ہوا ہے رتبہ سروں کو، حباب کا

بلا اپنے لیے دانستہ ناداں مول لیتے ہیں

بلا اپنے لیے دانستہ ناداں مول لیتے ہیں

عبث جی بیچ کر الفت کو انساں مول لیتے ہیں

نہ پوچھ احوال بے درد اپنے بیمارِ محبت کا

زمیں اس کیلئے اب تو عزیزاں مول لیتے ہیں

میں اس گلشن کا بلبل ہوں، بہار آنے نہیں پاتی

کہ صیاد آن کر میرا گلستاں مول لیتے ہیں

توڑ کر تار نگہ کا سلسلہ جاتا رہا

توڑ کر تارِ نگہ کا سلسلہ جاتا رہا

خاک ڈال آنکھوں میں میری قافلہ جاتا رہا

کون سے دن ہاتھ میں آیا مِرے دامانِ یار

کب زمین و آسماں کا فاصلہ جاتا رہا

خارِ صحرا پر کسی نے تہمتِ دُزدی نہ دی

پاؤں کا مجنوں کے کیا کیا آبلہ جاتا رہا

ہے نرالی کشش عشق جفا کار کی راہ

ہے نرالی کششِ عشق جفا کار کی راہ

چاہِ کنعاں میں ملی مصر کے بازار کی راہ

رہ نما یاد الہٰی کا ہوا عشقِ صنم

پہنچے ہم کعبۂ مقصود کو کہسار کی راہ

کثرتِ شوق نے از بسکہ کیا عرصہ تنگ

مردہ نکلا نہ مِرا کوچۂ دل دار کی راہ

اللہ ہووے بلبل ناشاد کی طرف

اللہ ہووے بلبلِ ناشاد کی طرف

گلچیں جو بولتا ہے تو صیاد کی طرف

برسوں سے قدِ یار کا مضموں نہیں بندھا

مدت ہوئی گئے نہیں شمشاد کی طرف

چلنے میں کی جو شوقِ شہادت نے رہبری

گردن جھکائی کوچۂ جلاد کی طرف

کوئی عشق میں مجھ سا افزوں نہ نکلا

کوئی عشق میں مجھ سا افزوں نہ نکلا

کبھی سامنے ہو کے مجنوں نہ نکلا

بڑا شور سنتے تھے پہلو میں دل کا

جو چِیرا تو اک قطرۂ خوں نہ نکلا 

بجا کہتے آئے ہیں ہیچ اس کو شاعر

کمر کا کوئی ہم سے مضموں نہ نکلا