کہ میرے دل میں ترا گھر ہوا تو کیسے ہوا

میں ایک بوند سمندر ہوا تو کیسے ہوا

یہ معجزہ مِرے اندر ہوا تو کیسے ہوا

یہ بھید سب پہ اجاگر ہوا تو کیسے ہوا

کہ میرے دل میں تِرا گھر ہوا تو کیسے ہوا

نہ چاند نے کِیا روشن مجھے نہ سورج نے

تو میں جہاں میں منور ہوا تو کیسے ہوا

دن میں بھی حسرت مہتاب لیے پھِرتے ہیں

دن میں بھی حسرتِ مہتاب لیے پھِرتے ہیں

ہاۓ کیا لوگ ہیں کیا خواب لیے پھرتے ہیں

ہم کہاں منظر شاداب لیے پھرتے ہیں

در بہ در دیدۂ خوں ناب لیے پھرتے ہیں

وہ قیامت سے تو پہلے نہیں ملنے والا

کس لیے پھر دلِ بے تاب لیے پھرتے ہیں

چھو لیں گے ہم جب سوچیں گے

چھو لیں گے ہم جب، سوچیں گے

پھول ہیں یا وہ لب، سوچیں گے

پھولوں جیسے لوگ ہیں کیسے

دل ٹوٹے گا تب سوچیں گے

دیکھ رہے تھے کیوں مجھ کو تم

دل ہی دل میں سب سوچیں گے

ہے فصل گل تو دل میں اتر جانا چاہیے

ہے فصلِ گل تو دل میں اتر جانا چاہیے

ہر سمت خوشبوؤں کو بکھر جانا چاہیے

راہِ وفا میں جاں سے گزر جانا چاہیے

جب یہ نہ ہو تو شرم سے مر جانا چاہیے

گرداب سے بھی صاف گزر جانا چاہیے

یا کشتی انا سے اتر جانا چاہیے

کبھی حریف کبھی ہمنوا ہمیں ٹھہرے

کبھی حریف، کبھی ہم نوا ہمِیں ٹھہرے

کہ دشمنوں کے بھی مشکل کشا ہمیں ٹھہرے

کسی نے راہ کا پتھر ہمیں کو ٹھہرایا

یہ اور بات کہ پھر آئینہ ہمیں ٹھہرے

جو آزمایا گیا شہر کے فقیروں کو

تو جاں نثارِ طریقِ انا ہمیں ٹھہرے

اب کے سفر میں پچھلے سفر سا مزا نہ تھا

اب کے سفر میں پچھلے سفر سا مزا نہ تھا

تلوے میں میرے جیسے کوئی آبلہ نہ تھا

یہ کیا کہ دو قدم پہ ہی سانسیں اکھڑ گئیں

پہلے تو چلتے چلتے کبھی ہانپتا نہ تھا

میں اس کے نام پہلے بھی لکھتا تھا خط، مگر

کاغذ تو اس طرح سے کبھی بھیگتا نہ تھا

میاں دیکھا نہیں جاتا کریں کیا دیکھ لیتے ہیں

میاں، دیکھا نہیں جاتا، کریں کیا دیکھ لیتے ہیں

یہ دنیا جو دکھاتی ہے تماشا دیکھ لیتے ہیں

وہی منظر، وہی مایوس چہرے گھر سے باہر تک

ہے عادت دیکھ لینے کی لہٰذا دیکھ لیتے ہیں

جو بس چلتا تو آنکھوں کو کبھی رسوا نہ کرتے ہم

عجب اک خواب ہے جو بے ارادہ دیکھ لیتے ہیں

لبوں کے سامنے خالی گلاس رکھتے ہیں

لبوں کے سامنے خالی گلاس رکھتے ہیں

سمندروں کی طرح ہم بھی پیاس رکھتے ہیں

صدائیں دیتے اسے تو ضرور سن لیتا

ہم اس کے آگے کہاں التماس رکھتے ہیں

ہر ایک گام پہ روشن ہوا خدا کا گماں

اسی گماں پہ یقیں کی اساس رکھتے ہیں

ہمارے ساتھ امید بہار تم بھی کرو

ہمارے ساتھ امیدِ بہار تم بھی کرو 

اس انتظار کے دریا کو پار تم بھی کرو

ہوا کا رخ تو کسی پَل بھی بدل سکتا ہے

اس ایک پل کا، ذرا انتظار تم بھی کرو 

میں ایک جگنو، اندھیرا مِٹانے نکلا ہوں

رِدائے تِیرہ شبی تار تار تم بھی کرو 

جس دن سے کوئی خواہش دنیا نہیں رکھتا

جس دن سے کوئی خواہش دنیا نہیں رکھتا

میں دل میں کسی بات کا کھٹکا نہیں رکھتا

مجھ میں ہے یہی عیب کہ اوروں کی طرح میں

چہرے پہ کبھی دوسرا چہرا نہیں رکھتا

کیوں قتل مجھے کر کے ڈبوتے ہو ندی میں

دو دن بھی کسی لاش کو دریا نہیں رکھتا

نواح جاں میں کسی کے اترنا چاہا تھا

نواحِ جاں میں کسی کے اترنا چاہا تھا

یہ جرم میں نے بس اک بار کرنا چاہا تھا

جو بت بناؤں گا تیرا تو ہاتھ ہوں گے قلم

یہ جانتے ہوئے جرمانہ بھرنا چاہا تھا

بغیر اس کے بھی اب دیکھیۓ کہ زندہ ہوں

وہ جس کے ساتھ کبھی میں نے مرنا چاہا تھا

دیکھا جو آئینہ تو مجھے سوچنا پڑا

دیکھا جو آئینہ تو مجھے سوچنا پڑا

خود سے نہ مل سکا تو مجھے سوچنا پڑا

اُس کا جو خط مِلا تو مجھے سوچنا پڑا

اپنا سا وہ لگا تو مجھے سوچنا پڑا

مجھ کو تھا یہ گماں کہ مجھی میں ہے اک انا 

دیکھی تِری انا تو مجھے سوچنا پڑا 

تمہارا وعدہ خدائی قرار تھوڑی ہے

تمہارا وعدہ خدائی قرار تھوڑی ہے

چمکتی شے کا کوئی اعتبار تھوڑی ہے

رئیس شہر! تِرا انتظار تھوڑی ہے

تِرے کرم پہ مِرا انحصار تھوڑی ہے

جنوں میں حد سے ہم اہلِ جنوں گزر جائیں

ہمارا اہلِ خرد میں شمار تھوڑی ہے

دیار شب کا مقدر ضرور چمکے گا

دیارِ شب کا مقدر ضرور چمکے گا

یہیں کہیں سے چراغوں کا نور چمکے گا

کہاں ہوں میں کوئی موسیٰؑ کہ اک صدا پہ مِری

وہ نور پھر سے سرِ کوہِ طور چمکے گا

تِرے جمال کا نشہ شراب جیسا ہے

ہماری آنکھوں سے اس کا سرور چمکے گا

کمی ذرا سی اگر فاصلے میں آ جائے

کمی ذرا سی اگر فاصلے میں آ جائے 

وہ شخص پھر سے مِرے رابطے میں آ جائے 

اسے کرید رہا ہوں طرح طرح سے کہ وہ 

جہت جہت سے مِرے جائزے میں آ جائے

کمال جب ہے کہ ، سنورے وہ اپنے درپن میں 

اور اس کا عکس، مِرے آئینے میں آ جائے 

کہاں کہاں نہ ہوا لے گئی اڑا کے مجھے

کہاں کہاں نہ ہوا لے گئی اڑا کے مجھے

ستم یہ کس نے کیا ہے دھواں بنا کے مجھے

بہت اداس ہوا آئینہ دکھا کے مجھے

زمانہ دیکھ چکا ہے ہدف بنا کے مجھے

ابھی تھمی بھی نہ تھیں سسکیاں کہ رات گئے

کسی کی چیخ نے پھر رکھ دیا ہلا کے مجھے

خوب نبھے گی ہم دونوں میں میرے جیسا تو بھی ہے

خوب نبھے گی ہم دونوں میں، میرے جیسا تُو بھی ہے
 تھوڑا جھوٹا میں بھی ٹھہرا، تھوڑا جھوٹا تُو بھی ہے
 جنگ انا کی ہار ہی جانا بہتر ہے اب لڑنے سے
 میں بھی ہوں ٹوٹا ٹوٹا سا، بکھرا بکھرا تُو بھی ہے
جانے کس نے ڈر بویا ہے ہم دونوں کی راہوں میں
 میں بھی ہوں کچھ خوف زدہ سا، سہما سہما تُو بھی ہے