دردِ دل کو داستاں در داستاں ہونے تو دو
شہرِ قاتل میں ذرا امن و اماں ہونے تو دو
میری آہِ نِیم شب منزل نمائے شوق ہے
نالۂ دل کو رحیلِ کارواں ہونے تو دو
اور بھی نا قدردانئ ہُنر یاد آئے گی
ہمنشینوں کو ملال رفتگاں ہونے تو دو
دل اِدھر مائل ہوا ہی تھا کہ وحشت بڑھ گئی
اس کی چاہت کو ذرا آتش بجاں ہونے تو دو
خانۂ بیرنگ بھی ہے شیشۂ صد رنگ بھی
دل کو پہلے بے نیازِ اِین و آں ہونے تو دو
سرخئ خُونِ تمنا، آبرُوئے عشق ہے
آرزُوؤں کا لہُو رنگِ بیاں ہونے تو دو
ہے نہاں مشقِ سخن میں فکر و فن اوجِ سخن
ہاں زمیں شعر کو برق آسماں ہونے تو دو
ڈاکٹر طلحہ رضوی برق دانا پوری
No comments:
Post a Comment