زندگی بھر مجھ سے وہ برہم رہا

 زندگی بھر مجھ سے وہ برہم رہا

روبرو لیکن مِرا سر خم رہا

میرا دامن آنسوؤں سے نم رہا

دل کے جانے کا نہایت غم رہا

آسماں سے یوں اتر کر آ گئی

گلستاں شرمندۂ شبنم رہا

مدعائے دل جو میں نے کہہ دیا

مدتوں وہ مجھ سے پھر برہم رہا

عمر ساری قید میں اپنی کٹی

جرم پھر بھی حضرتِ آدم رہا

کاکلِ پیچاں سنواری تو مگر

پیچ و خم جو تھا وہ پیچ و خم رہا

زندگی میں کوئی بھی اپنا نہ تھا

بعد مردن مدتوں ماتم رہا

اسلم شوریدہ سر سے پوچھیے

کیا جنونِ شوق کا عالم رہا

اسلم بارہ بنکوی

محمد اسلم صدیقی