تم میرے پاس آؤ تو کوئی غزل کہوں

 تم میرے پاس آؤ تو کوئی غزل کہوں

عہدِ وفا نبھاؤ تو کوئی غزل کہوں

نغمے بکھیر دوں گی محبت کی راہ میں

تم میرے ساتھ آؤ تو کوئی غزل کہوں

کیوں دور دور رہ کے بسے ہو خیال میں

ویران گھر سجاؤ تو کوئی غزل کہوں

مہندی رچاؤں گی میں تمہارے ہی نام کی

دُلہن مجھے بناؤ تو کوئی غزل کہوں

دل بن کے تو دھڑکتے ہو پہلو میں رات دن

اپنا کبھی بناؤ تو کوئی غزل کہوں

چھت سے اتر کے آ گئی آنگن میں چاندنی

ایسے میں تم بھی آؤ تو کوئی غزل کہوں

کیوں سر جھکائے بیٹھی ہو خاموش اے صبا

چہرہ ذرا دکھاؤ تو کوئی غزل کہوں

پروین صبا